KA NU
-By Upa T.Thiankhanmuan
Tukum (2014) adia ‘Nute Ni’(11-05-2014) hong nai nawn toh kiton in hon paai leh hingkhetu ka nu’ manphatdan nasatak in ka ngaihtuahna ah hong thaksuak hi. Tua amanphatna tampi te lak a khat, ka nu ka ngaihsang mahmah na, amah kampau leh hihna ka bilkha leh mitkha a mangtheilou khat ka taaklang nuam hi. Tua ma in amah tungtang tamlou:
Ka nu, (L) Zamniang, i zoudawn khaw kumlui te lak a khat Songtal ah apiang hi (a piankum geih chiamteh leh theihchet hikei mahleh 1922 veel hidia gintaak). Skul ana kai kha ngeikei a, lai asim/gelh theikei. Tagah a hinkhua napan in tulai te chihdan hileh ‘bitter experience’ tampi ana tuak hi. A neulai in a khua uah Gospel vaak tung nailou a, pi-pu ngeina a biakna (animism) a chiil touh in na om hi. Himahleh nungaknou (teirol) ahih lai veel in Mualnuam (Ngawnbung) tawn in tua Tanchin Hoih meivak pen Songtal ah puaklut in ompan ta hi. Hausa vaihawmte apan daalna nasatak om mahleh Pathian’ hehpihna khut in a lawnkhak khangnou bangzah hiam te’ lungtang ah tua ‘vaak’ na lut in ‘Pathian thu awi’ din na kipia ua, tua ahampha mite lak ah ka nu leh ka pa ana telkha uhi. Huai hunlai a te a etton taak na mahmah uh khat bel ‘Pathian thu awi’ a akipiak ua pan in a hindan uh ki pumkhek vilvel petmah a, a chiindan lui te uh tualkhia taktak uhi. Tua ban ah a principle khat uh bel: ‘mihing thu sang a Pathian thu i man zawk ding ahi’ chih ahi. Huaiziak tak in hausate’n ‘khawbawl’ kithoih aneih ua khosung mipi leh khualzin-gamvak te tanpha adia ‘zek’ tan ding tamtak a om hun in tuate Pathian Thu toh kituaklou chi a atan utlouh man un hehsan, gap leh gelgawtna nasa taktak nathuak uhi.
I gen ut pen ah lut nawn le – A’ tate lak a a naupangpen (nautum) ka hih ziak ahi diam ka nu’n hon it kholdiak ade aw ka chih nakhat a om a, thuchin-thutang tampi midang kiang a agen khollouh a’lungtangtawng a a’kep thu khenkhat bang leng hon kum hi in ka thei hi. Tua te lak a khat tuh, tagah ahihman a a neuchik apan a mi simmawh leh gelgawt (a taksa tung a apawn mang nawnlou omlai pawl om) a aom dan bang, a pichin nung leh ta-le-nau neih nung tanpha a ak bang a nektawm zong hinkhua a zattouh lai a mi muhsit leh enghouna adon tamtak hon hilh ka zak chiang in na kana sa thei mahmah hi. Hilele aman hon gen ka lungtang hon khoih mahmah tuh: “Laisiangthou in,‘gitlouh zawh in om kenla, hoihna in gilou zou zaw in’*, chi ahi; huaiziak a mi itung a khel a gilou mahmahte hoihtak leh siamtak a ikhawlh leh ei a vualzou kihi zaw mai ahi”, achi hi. Huai mah tuh ataktak (practical) a leng seemkhia ahih dan bangzah vei hiam tak ka mu hi. Tua ban ah ka ngaihtuahna hon sukha mahmah bel huchibang a aom hi apawlawng (superficial) mai hilou ahi chih ka muchiang hi.
Khawvel etdan a numawl, lai sim/gelh theilou himahleh huai te sang a manpha zaw Pathian’ thuhing atheih khomkhom kiptak a leen a ana hinpih in kei adia etton ding (example) thupi tak hon got ban ah hon chou in hon inspire mahmah a, sermon tampi sang in manpha leh thupi zawtham hi in ka ngai hi.
Tu in ka nu hon omlouhsan (d.03.09.1993) nung kum 20 vaal bang pai khin ta mahleh a’ manphatna ka muchiang semsem a, amah damlai in akiang ah kipahthu ana gen tam kha law kholkei mahleng tu in athak in ka lungtang apan in “NU, KA KIPAK”, kachi hi.
*Rome-te 12:21
*******
