Ka Pa
- K. Ginkhanthang
Bangmah kahihma akipan in Ka Pa’n hon na kem a, deihsakna leh itna bukim tawh hon makaih in tu in lianpi ahon suah ta hi. Tu a ka dinmun leh omna tan akipan a kanung et ciang in , ka Pa hon napii zel dan leh hon khual nate thupi kasa sem sem hi.
Laisimthei kahih akipan in a ma’n sintungbu leh laibul te phatuamngaitak in honna sinsak pah a, Skul tak tak a kalutma in Laibul teng kathei khin vek hi. Kanu bel laisim thei lou ahih hang in , nundan kilawm leh It na daan te ahon na sinsak ngiit-nget a, kei a ding in a zu-aham thuak a nasep-silbawl alin ngei kei hi. Zan chiang a Lupna tung a tangthu ngaihnophuai tak tak hon hilh te ziak in ken le ka tate hilh sawn ding tangthu tampi kathei den hi.
Ka Pa’n Nipi ni zingsang annek kikhopna hon neih pih zel a, Sam Laibu te leh Paunak te a kipan in Thutak a hon sinsakzel hi. Pathian zaw Itna ahi a , I ki ittuah leh Pasian thuawi /pasian deihdan zui ihi aci zel hi. Aman ‘ laisin leh laisiam apawimawhna theilua ahih man in , lai hon sin sak a a suante laithei hon suah vek hi. Hinkhua a diktat tak a sep/bawl leh hin ding ahihdan hon hilh hilh hi.
Amah Khota Skulpu (Village Teacher) hi a, singtang dawn kawm lak a om ahihhang in diktattak in skul kai kai hi. Aman a gen dan in , skulpu nna asepsung in, thildang jiak a buaina te chihlouh , a ma’ taksa damlouhjiak a skul kailouh chih nei ngei lou chi hi. Thupi kasa a, Pasian pii dan zong lamdang in manpha kasa mah mah hi. Laisim /Laisiam dia mi adeihsak dan ah kuamah khentuam anei hetkei cih ka theician hi, laisiam thei / hihthei dia agintak te bang skul kai ding in azawn zawn hi, amau a utkholkei uh chih man lel hi.
Tu in amah taksa kum 100 bang phata a , ahihhang in annek –tuidawn , sungtum-pusuah na ah kuamah panpih ngai nai lawm-lawm lou tadih hi. Pasian vualzawlna thupi kasa a ka lungkim mah mah hi.
Ka Pa’n a naupan lai pek in ( 1923 vel himaithei ) in Pathian thu awi ding in a min pia (entered ) hi. Skulpu nna a sep dek in , Naupangte makaih/hilhtu ding ahihman in Laizial atepsek pen tawpsan hi. Ama’n “Zu dawn kei un, sihbaih na ahi achi zel hi”.
Zilna leh Sepna , nekzon nate ziak in , ka let nung in ka hun tamzaw ka Pa kiang ah ka omkha nawn kei hi. Lungdam bawl hun leh akallak hun lem a In kachiah chiang in ,Aman ‘ Pasian kiang ah kipah thu gen in thumna tawh hon vaidawn khial ngeilou hi.
Ka thahat zawk lai -tleirawl /tangval lai in tup mu-mal neilou in sawtpi ka ki nuamtal kha hi. Laisiam-sepna neilou va kichih hial di lah thudik-kimkhat hilel . Ajiak tuh , Laisiam loupi hihman a sepna mu(zok) lou kihi ahihman in. Siam le bel sepna kimupah di hizaw leh kilawm. Tuabang hunte ah le kapa tuh sum-le-pai a kakingakna , kanget ngam pen ahi gige a , aneih liai nak leh kei a di tuh hon iit ngei het kei hi. Tuni tan in le , keimah in sum thalawh thei ta mah le’ng pawimawh sa a kanget ciang in ahon iit ngei kei hi. “Nang sumlawh ta nahihjiak in hiaizah/huaizah khateng in hon khak zel in “ acingei hetkei a, huai naksang in ama’n honpiak a utzaw gige lai hi.
A neulai in Laisim lunglut/utmah mah ahihdungzui in laizil pah hi. Ama’n Lower Primary(Lawr ) exam ding in Mualnuam khua akipan in Khawdungsei (Mizogam) ah kakuan achi hi. Imphal a Johnstone High School ah Pawl giat/Kua vasim khangei a ahihhang in sunzawm tou pek lou in Indian Army (Supply Corp) ah va tum/pang hi. Phai a laisim a omlai in siamthei mah mah a , All Manipur bang ah amin telpha zou zel ci hi. Ama’ khanvual te ahihleh Ojha (L) Manihar , Ojha (L) L. Ragui leh a lawi naupang in Pu Haokholal Thangjom tekhawng ahi chi in hon hilh hi.
Amau hunlai in le thu-le la / Political events ana omlawta /kipanta hi, Manipur singtangmite lak ah , adiak in. Huai te lak a khat tuh , Mr William Shaw leh Zamkithang( Pi Lhingjaneng Pa) Laibu gelh-The Thadou –Kuki Clans ah “ Under the Wings of Thadou kukis “ chi a singtangmi nam dang dang te tuansak khak ahih jiak in , Thadou hilou kichi teng tuh , ” Chikmah in Thadou khazak nuai ah om ngei khang “ chi in sousang mah mah uh hihtuak hi. Lungphouna (protest/rally) bang nei in , huailai a Manipur Political Agent kiang bang ah va kitom in Dawrkhaat bang va khia in , huai Laibu phiatmang sak ding in va gen uh hihtuak hi. Political Agent in bel , “ Mi laigelh diklou nasak ua leh a selthalna ding in Nou le Laibu bawl le uchin a set vawi , ken mi laibu gelh ka phiatmang thei mawk ding hiam ou“ ana chihsan lel hihtuak hi. A vahawh te bang heh-a-heh thei un chin , vaiphei te leader (amin kamangngilh zual ) bang in , “ Thisan suahna om ven ti “ chi laang lang ahi achi hi. Huai akipan khawng hilou di hia ? I hong huchih kheukhou ua , tuni tan a ihih vaiveng lah zen uh! Ka Pa’n zaw hichi in achi , “ Kuki a kipan itaikhiak chitchiat louh di uh hi a ; taikhia ihih mawng leh le minlian ana omsa Chin ikichih suk mai di uh tuh hi zen a , Khul Union peuh kichikhem khem in akhonung a deihdet tuanlouh di khat … Mautam ahongtun a Sazumei leh Sum khektheih ( mautam chiang a sazu tam, athat tam tam te sum a panpihna piak theih-solkal thupuan hi di ) ahong kichih leh ..Khul Union President Teba Kilong in Phai ah Milong Veng ah Pucca In khat atunkhiaklawh .. achi lel hi. Akhonung a , Paite tribe recognition leh ke u Ku , ke I Ki cih tepawl bel itheihsa in kawih le ! Tulai dan tawh le kibang tou tou pek zaw ahisim lim ve chihphet in om aka !
Pa’ te Ni in ka Pa pahtawina thilthupikhat hih zou in , hihthei leng kaut lamtak ahi. Sa lim lim , An khum khum gawh in luup leng le ama’n tuate thupi ngaihnawnkhollou phetlou in , nethei dawnthei ziah ziah nawn lou ding hi. Nik hoih puanhoih pen lei sak in tuam leng zong amah a ding in tek-kun nung in va kilawm luat bialbualna leh va kipahpih luatna di tawm mah mah kha ding hi. Akiang akhawsa hi hial mah lengle tuate hihzou vek din le kakingaihtuah tuan kei hi. Ahihhang in ka hihtheih , ka om na mun akipan kahihtheih zaw amah a ding a lungmuang leh tawldam tak a teklam hinkhua azat ding deihsakna leh a pethei Pa kiang a thumsak ana himaimah hi. Pathian in lah tuate a pethei ngal a !
Pa aw kumtampi ana damlai in la , lungmuangtak leh thawveng , chidam in na hinkhua ana zang in chi in ka deihsakna leh thumsakna ka hon lan hi.
…………………………………………………………………….
