EBCC Central Delhi hong pian dan tomkim

Delhi ah EBCC saptuam in Pathian vualzawlna dong a, member a kipun beh zel lai in, kum 2005 vel apan in Nasirpur Dwarka a i Biakinn in hon dawl lou sakna a om banah, Delhi lian lua ahih­man in biakna mun tuam patkhiak hoihsak thu kigen zel hi. Kum 2006 bul in, Tualsung Baptist Saptuam Upa Committee (TBSUC) te lakah ‘Phalbi nilum awi kawm a houlimna topic’ chi in, hiai toh kisai in, na houlim kha sek uhi. Huchi’n hong kigen thang hiaihiai in, TBSUC meeting 28th July 2007 ni’n Pastor Khamkhanchin Ngaihte convenor na nuai ah study team bawlkhiak in om a, amah telin member 5 pha uhi. Study team in Nov, 2007 tan a amuhdan in ‘biakna tuam pan ding hial in, mipi kimin zou nai tadih lou’ chih ahi. Huchi’n TBSUC in kum 2(nih) banah etkikna (review) neih theih di’n thupukna bawl hi. Kum 2009 bullam in, hiai thu mah hong lian hiaihiai nawn mahleh apan khe hial ding mi kiom lou.

Trans-Yamuna & akiim ate’n 10th October, 2009 ni’n kikhopna gamlat ziak in, biakna tuam adeih thu uh Local Chairman kiangah ana tun uh. Pastor Chin makaih in Ministerial Committee (MC) in 15thNovember a genkhawmna nei in, biakna thak pat lem sakpih hi. Hiai ni MC meet­ing na mah ah, Central Delhi laka tengte’n leng lunglutna nei a, Biakinn luah ding khawng ana genkhawm hiauhiau ta ua, ana kisingsa vingvengta ahihman un, amau leng hichi bang in, meeting na ah thu sun ana bawl uhi. “Trans-Yamuna a omte’n agamlat ziaka anai zaw a biakna ding deih a angetna uh phalsak/lemsakpih himah leh, amau kia a haksatna/ khavatna/ taksapna (member tawm leh sum leh pai mah ah leng) lemtang lou tamtak om ngei ding ahihman in, saptuam in i thiltup khat uh leng hi gige hiven, Central Delhi-te toh ka kigawm ding ua, atung a igen biakna tuam khat pankhia di’n ka na kisa ding uh” chi’n ngen uhi. Hiai ni in, MC in meeting nawn chiang a area ding genkhawmna neih di’n thupukna lata hi. MC in 24th November 2009 ni’n Central Delhi, North Delhi, Ashram Area & Trans-Jamuna gawm ding leh January 24, 2010 a Church of North India (CNI), Kashmere Gate a Biakna masa pat di’n lemsakpih hi. MC thu­puknate TBSUC in leng pompih hi. Huchi’n maban kalsuan ding dan Pastor Nenglian Vualnam (Delhi a hong posting thak) & MC khut a ngak in om hi. CNI saptuamte’n amau sung a buaina tuamtuam a neih laitak uh ana hih manin, a Biakinnte uh zat din hon pekhia thei lou ua, biakna January 24, 2010 in kipan thei lou hi.

TBSUC in 20th March 2010 ni’n Saptuam thak adi’n ‘Interim Committee’ bawlkhiak lemsa hi. Hiai committee ah Upa 2 tel in, member 8 pha uhi. Pastor Nenglian makaihna in amaute lakah tanhawmna neih hi a, vaipua masa pen ding in amau sungah hichi banga kitelkhiakna om hi:

1. Chairman: Upa Tualzapau
2. Vice Chairman: Upa Jamkhothang
3. Secretary: Khamkhansuan
4. Finance Secretary (Local): Biakkhanmang
5. Finance Secretary (1/10): Thanghnun
6. Treasurer: Chinzason
7. Member: Pumchinkhup & Thangzalun

Commissioning service, 04thApril (Easter Sunday) ni’n Biakinnpi a neih in om ngal hi. Pastor makaih in Interim committee in meeting masa 8th April 2010 ni’n Upa Tualzapau’inn Minto Road ah nei in, saptuam thak min ding in “EBCC, Central Delhi” chih phuak in, kikhopna 25th April 2012 a, Main Hall, Gange Girls Sr. Secondary School, Raj Niwas Marg a neih pat di’n thu­puk uhi. Saptuam thak ah hiai hun in, milip naupangle simtel in 285 pha hi. Toupan thil thupitak hon hihsak a I kipak mahmah hi. Hiai patkhiat ahih apan tunitan dong saptuam kiamlam sang in punlam manoh in khangtouzel hi. (source- GAMCHIAM April 28, 2013)