MOBILE MANG -By Upa Khamkhanpau
April 26/2014 ni a mobile phone ka peimang khak ua, 01/05/2014 a muhkik / lak kik ahih toh kikal sungin ngiahtuahna ah thil tuam tuam om hi. Ngaihtuahna ah Pastor te bang hilh a, ‘honna thumpih un’ chih ding pen kisuanlahna liantak om hi. ‘Kha mangthang’, Pathianin leng a it mahmah te muhkik/lakkik ahih na dia thumsak dia chial hileh thutuam, mimal thil mang toh kisai a Pastorte buaisak louh ding chihlam ka lungsim ah om pah phot hi. Icloud account pansan a ‘Find My IPhone’ I lut leh a moble phone omna mun (ana ‘enabled’ na mun uh) chiangtakin hong kilang thei hi. Va pai veng veng a ngam leh khat thu a va lakkhiak mawk theih hilou hi. Palikte kiang a report bawlkhin, FIR copy le nei khin ta, amau theihpihlouh a gamtat mawk hong lemtang ta lou a le!
Hiai vanmang pen it huai, ka leisa, ‘kei a’ hita mawk leh zong – vanlaizom (internet/icloud) apan muthei in, a omna mun theihtheih dan om mahleh a kemtu (neih ana sawm) midang khat ana hi ta. Tuamun apan bang chileh ki lakik thei ding, bang chidan a kei khut hong tungkik thei ding hiam chih tuh buaihuai pi suak hi. Ngaihtuahna ah Pathian in ei mihingte, a biktakin ‘tatsa/leisa’ te bangchitukin hon it de aw….. chiangtak mai a I gamtatna hon mu gige, I ngaihtuahna tanpha theisuakvek Pathian bangchitukin I lunggim sak mah de aw…..” chihte om hi. “Kha mangthang” I chihte leng mang ta veng veng hileh thutuam, manglou unchin, a neitu (guta) dangkhat kiang a om, a neitu taktak (Toupa’n) mu gige di hizomah, tuate va lakik a a neitu diktak kiang a piak ding tuh ei gingtute’ mohpuak ahi. Tuading in bang ‘strategy’ I zang a, I panlak dan leh vanzatte kibang kim vek lou maithei, a situation zilin. Hiai mobile mang toh kisaiin hon thumpih tampi a om ua, tua banah IB lam a I heutu lian nihte’ panlakna te bang, icloud a ana follow den pawl toh (information thak om bang bang palikte kiang a va pelut zel) tua te teng teng hong kigawm khawmin gutate lungsim khoih hi kha di, Police Station, Domestic airport ah May 1, 2014 in naute toh kipaktakin ka va lakhe hiau uhi. Bangteng hileh Pathian in honpi…Aman hon pi chiin ka kipak mahmah uhi.
Toupa’n a itte itpih a ama kiang lam a pikik thei dingin kimanna leh hihtheihna hon pia hen aw.
