Pathian vualzawlna tang a, ‘tukum sawt hina e!’ chih hun ding leng omlou a, kum 2010 honpi tung; Toupa Pathian kiang ah kipahthu ka gen masa hi. Huaiban ah, A gam nasepna dia hihtheih suah a hongpang Saptuamte navek un i Toupa Jesu min in Kumthak Chibai kon buk hi. Pathian honpidan leh kepdante gelh a gelh seng diing vual ahikei, himahleh tutung April 1, 2009 – December 31, 2009 sung a Pathian honpidante hiai anuai a bang in kon gelh hi.
April 1,2009 – Dec. 31,2009:
Nasepdan tangpi a gen in naupangte laihilh banah amaute tungtawn a anu-le-pate tangthupha tutzel ahi a, tuition, home tuition leh spoken English class chihte in a community tawh hon kingainasak hi. Hiaite tungtawn in lawm leh vual muhtheih bang leng omzel banah, Pathian thu a lunglut mahmah bang leng muhbeh omtou zel. Toupa thupha hi!
Tuaban ah, i saptuam sung bangah leng deihsakna tang in a diak in BYF & Prayer Cell khenkhatte lak ah bang hun piak in ka om a, na tung uah lungdam thu kon gen hi. A diak in ka lunglut leh ka vei mahmah Delhi tuailaite lak ah bang Toupa hon piak ‘thuhing’ bangzah hiam toh houlimna hunte piak a ka om ziak in ka lungsim a nuam mahmah hi. Toupa honpiak thuhing ka gente a thupi in hichiin kon taklang hi;- 1) Lungkimna thuguk, 2) Gift of God(Spirit) hatna thuguk, 3) Nungzui leh tankhawm kibatlouhna, 4) Servant leh Slaves omzia, 5) Lawmhoih (thuguk i gen theihna pa/nu lawmhoih ahi), 6) Ze-etna leh khemna kibatlouhna (nihvei, mun tuam tuak ah genta), 7) Mihingte i hamphatdan uh.
Tua kia thamlou in mimal leh innkuan khenkhat toh bang leng khalam thu a houlimna nuamtaktak ka neih khak zeuhzeuh man in nuam ka sa petmah hi. (Ken zaw Pathian thu a kipahna ka neih louhngal gen diing/kup diing ka nei vak kei). Pathian vualzawlna khalam kia a dong hilou in, Salam mahmah bang ah leng dong in a poimoh leh kulte Toupa’n hon pezel a, HAMPHA chih hon hilhchian semsem hi. “A mite di’n thilhoih a it ngeilou” chih khawng hong dik toutou hi. Moonlight ministry adia zat diing poimoh leh kul hon pe khempeuh tung ah kipahthu kon gen a, Toupa’n na thilhoih hihte u ziak in na tung uah kipahna hontun hen!
Nisim 28-9-2009 in Innlam ka va zin a, Pathian lemgel ahingei dia, Vangai Division EBC Kumsim Khawmpi bang va uap kha in, Report na leh sharing hun nuamtak ka va zangkha hi. Tuazoh in Imphal ah u-le-nau, pi-le-pute vehkual in hun ka zang a, huai hun mah in Langol BYFte toh nitak hunk hat ka zangkhawm kha uh; Nuam himai! Kumsim Khawmpi bang leng vatel kha zomah. Toupa hoih hi. Tuazoh in Pearsonmun ah ni 3 ni tuang in, kikhopna zan 2 Moriah biakinn tel in ka nei ua, Lungkimna thuguk leh Reportna in hun ka zang hi. Banah, sun khat Dorcas Hall ah Pu Vungkham @VK Tonsing in hon va phakpih a, heutute Rev L Kham Kho Lun, Rev Luaichinthang & Rev Paukhanmang Guite te toh ka va kimu ua, ka houlim zek chichit uhi. Heutupa Kham Kho Lun in, “Manipur ah leng Muslimte lak ah, missionary kuamah om nailou,: a chih in hon chou mahmah hi. Rev Luaichinthang in, “HQ is always stand behind you” a chih in lungsim nuamsak mahmah hi. Banah heutupa Paukhanmang Guite in,”Delhi saptuamte priority – Mission & Care ahi,” a chih in lungsim hon khoih mahmah hi. Amaute’n thumsakna hon neihkhit ua, thumna ah leng kon phawktou zel diing chi uhi. Toupa hoih hi.
Tuateng banah, Pathian’ pina leh mi kiphal bangzah hiamte tungtawn in Aizawl khopi bang ka va mukha a, nuam mahmah. Pa Lalkhanhaute inn a kinga in, Pastor N Tuanglang inn a giak kawm in, huai ah Tuailai Day 2009 ka zang kha hi. Pastor N Tuanglang in amah huntan 2 hon neksik a, Reportna leh thutak genna hun in ka zang hi. Pa Lalkhanhau in leng huchimah bok in a huntan kimkhat honpia a,Testimony genna hun in ka zang hi. Aizawl ah ni 2 ka nituang a, nuam mahmah. (Ahihhang, Ka ihmu ngam chiahkei, a innte uh a san theihluat ziak in leh kawl lak ngen a teeng ahihziak un...) Tua zoh in Shillong ah giaklut in, Upa Khamthianmung (ka pu)te inn ah. Huai hun in Pastor M Zalian’ pa toh ka kidinhou khazel ua, aman a genna ah – “Na strategies hoih ka sa, strategies neiloupi a, nasep zaw a dan omlou deuh ahi” chi hi. Pathian hehpihna toh October 26,2009 in Delhi kongtung kik hi. Tua nung sawtlou in Pa H Chinzason thusiamna leh amah tungtawn in ka nau Kimngaihlun in Apperal Merchandizing Training na diing hon mu a, tu’n Noida ah a omlel. Toupa kou di’n hoihna e!.
Khristmas toh kisai:
Tangthupha genna diing a hunlempen ‘Khristmas’: Dec 20,2009 in hunkhat Hindu background apante toh ka neikhawm ua, piching 8 leh naupang 12 hongpha uh. Thugen in keimah ka pang a, “Bangziaka Jesu hong pian kul ahia”? chih thupi zang in, Pathian kha ompihna ka tang mahmah uhi. Alak ua mikhat Laxman Verma in dotna hiai hon dong – “Jesu Khris na gen bang in leh thutak ka muh bang in ka gingta. Ahihleh bangchin ke’n hotdamna ka neita chih/hotdam ka hita chih assurance ka neithei dia?” Banah, Somnath Jha in “Jn 15:1-5 tungtawn in hong kimusuah a,Jesu Khrist, a lal leh hondampa in sangthei hi. Toupa’n thupina tang hen.
Huan, Dec 23,2009 in Muslim background te toh ka neinawn ua, Pathian’ Kha pina’n buailou leh kisikna bangmah omlou in ka zang thei uh. Piching 16 hong pha ua, Imam/hafiji (Majid a heutupa) leng hongtel a, Yunesh’ zi (Bhabhi) tanupi/ annhuan a zang in bangkim feltak in zoh ahi. Thugen in Okhla apan Nazir Ahmed a hongpang a, thutak vah mahmah uhi. Praise The Lord!
Nidang a Yunesh’ zi (Bhabhi) pen hon doutu leh a pasal toh kimuh hon phallou sek pen, tutung in kikhekna lamdang tak nei in hong kihel a, Pathian’ kha in nasem ahi chih muhtheih in om hi. Banah, Hafiji in “Nang leng na ngaihdan hon gen in, ken leng ka ngaihdan kon gen zel diing” chi hi. Kuamah heh saklou, lah compromise nei himhim lou a nasep pen in zia nei mahmah leh detdou di’n gintakhuai a, huai mahmah i sepdan uh ahi. Ebenezer!
Dec 25,2009 kikhop tawp in Trans-Yamuna, North Delhi & Central Delhi fellowshipte deihsakna tang in amau toh hun nuamtak ka zangkhawm ua, banah, itna thilpiak zong honpia ua, ka kipak petmah hi.
Toupa’n thupina tang hen! Huan, tu kumthak 2010 hun in ELC Munirka Pastor T Lalpu hon chialna bang in amau lak ah hun ka va zang hi. Toupa’n thupha hon piak “A nasem di’n Zomite Toupa muan hihang” chih thupi zang in hun ka zang uhi.
Hiaitan honpi leh hon khotuah i biak Pathian ahi. Thupina a vek in Amah i khusak hi. Hiai khovel a i honsan leh omsan uh Amah nasep ahi, chih leh Pathian nasepna pen ah COURSE hilou in LIFE TIME ahi chih phawk thak ni. U-le-naute, Part time hi’n full time hitaleh, i sepna peuh (Toupa hon koihna peuh) LIFE TIME a semthei zel di’n Toupa’n hon vualzawl chiat hen!.
