Na khedapte (shoes) tuh siik (iron) leh daal (brass) ahi dia,
na damsung teng na tha haatna leng a om ding. Diu 33:25 (KJV).
Kum thak, 2010 abul pan ding a i kisak lai in, mi khenkhatten tuu kum thak in bang honpuak dia aw, bang kachi de aw! Ka tuahpha diam, tuahse diam chi a patau leh thawmhau tak a om gugiugiau bang om theih ahi. Mi khenkhatte, kingakna taaklou khutlam ensak, aisan sak, Horoscopete enen chih banga iom khak ding uh lauhhuai kasa. Kristiante, i leitung hinkhua, nitenga khualzin banga ipaina ah, kingak na ding, lam honhilh a hon kawkmuhtu, Bible nei i hihman in, huai a i muh thute, tamlou atung a i taklat apat in kikum leng uthuai i sa hi.
I taang teel, Mosi in Pathian tungtawn a Israel namte abanban a a vualzawlna a pat ahi. Revised Version ah, “A kongpi kalhnate, siik (iron) leh dal/sumsan (brass) ahi ding achi. Huai in tuh, muanhuai theitawpa a khopi kulh kongkhakte, meelmate apat hoihtak a venbit ding agenna ahi. Huchia, asunga teeng mite, bittak a a om theihna ding un. Atangpi thu in, singkhuah/singtum te, galmuan huna kalhna ding in hoih hun mahleh, meelma, amau suse thei dingte a pat hoihtak a veenbit leh; akip leh muanhuai na ding in, siik khawng a kalh a ngai hi. Baihsamtak a hihsiat theih ahihlouh ziak in. Hiai ah Pathian in i khalam vualzawlna honpiakte muanhuai dan i mu thei. Pathian, chingtu leh kemtu a neite a ding in nak khamuanhuai na mai zen e!
Bangteng hileh, tuni’n King James Version a pen dan in i taangteel uh enleng uthuai kasa. Gendan tuamtuam in le agen theih tham ding. Asher namte, leinuai a gou om, siik leh thilmanpha omte a vualzawlna apiak genna le ahi thei. Gam hausa leh changkangte, leinuai a gou manpha haute ahi uh. Lampi dik, Pathian thutak lampi a napai leh, na siikna, napaina tuh hauhsakna goumanpha bang ahi chihna leng ahi thei. Revised version in a margin ah, A khe a ding in venbitna a nei ding achi. Bangteng hileh, siik a kibawl khedap kichi thil om mengmeng ahi kei. Huaiziak in, hiai in agen tuptak tuh, Pathian in atate a venbitna tuh achituam biik, thil vantang hilou ahi i chi ut hi.
Bangchi bang in kum thak i pal galkai dia? Bangchi bang lampi ahia i tot ding? I lampi tot ding a haksa diam? ahih kei leh anuam/baihsam diam? I LST taang sim in, lampi haksa maithei dan in agen hi. Carpet/puan neemtak kiphah lampi tawtna ding in, siik khedap hial angai kei ding. Kum 2010 i paina ding ah, Aircondition inn sung a TV remote tawi a tutna ding in, siik a kibawl hial khedap buh angai kei ding. Thupil ah, haksa omlou in anuam a om kei achi. Zawlnei hikei mahleng, tu kumthak 2010 tawn a i paina ding uah, guam leh mual i tuah hun uh om ding in ka gingta hi. Salam thil ah hi in, i Kristian khualzinna ah hitaleh, silk puan nem a kibawl khedap leh, lampi Road roller a nawtmam sa ahi kei. (Nas 14:22). Pathian thupiak tuh, ‘mailam nawt in pai un’ chih ahi. I Pathian in zaw a tate lampi haksa tawn in paisak mahleh, siik khedap piak ding achiam hi. I LST sim tang tawpna ah bang achi a? “na damsung teng na tha haatna leng a om ding.” hon chilai zawmah hi. Ni khat mai hilou in, DAMSUNG TENG chih ahi. Na ma ah Toupa paisak in. Jesu Krist toh machiang suan a na pai peuh leh, siik khedap but ding a honpe dinga, na lampi leng taang pha deuhdeuh ding hi. Prov 4:18 ah, “Midiktat lampi tuh phalvaak hong taangkhia, sunlai tan a vakpha semsem bang ahi” achi. Toupa na makhelh kei nakpeuh leh, na lampi tot ding ataangpha deuhdeuh ding..
Thugentu khat in, vangam ah angel upa pen leng, Pathian kiang a sawt a om luattak ziakun a naupangpen bang meel apu lai uh achi. Pathian kiang ah zaw kum 1000 a bei chianga leng a kipan tuung mah banglai ding ahihziakin. Leitung ah ahihleh, Alovera, anti-ageing chih khawngte kinuh nuh in, mai vunte kang thak saksak mah le uh, aphatuam sawt taktak kei. Hun in bangteng ahon thahsak a, atawp chiangin hun in hon sisak thouthou di. Huaiziak in, hun kichi tuh I melma abang mai hi. Himahleh, Pathian kiang i tun chiangin zaw huai ahi nawn kei dia, a upapen inle anaupang pen melmah apu gige ding. Nisa leh satna in hon haai kaat nawn tak louh ding ziakin. Na damsung nite bang in na hatna leng a om ding. Kum 70/80/100 tan lel ding hilou in, i damsung tantan ahatna honpiak om gige ding. Kumthak i bulpat na ah, hiai in bang a hon hasuan thei a?. Kua ahia hiai thuchiam honpe pa? Ei hon bawlpa ahia, hun leh nite honpepa ahi a, tangtawn donga hon itpa ahi a, a thilhihtheihna in phaktawp neiloupa ahi a, eite adia hong kipe pa ahi.
Toupa Pathian in kum 2010 sungin, na thuakzoh vuallouh ding bang a lang dinmun te a om zel tham ding, a mah lam na ngat gige ding a deihdan ahihziak in. Himahleh, na taksap leh ngetlouh in advance in ahatna tha ahon pe khol kei ding. Ray Stedman kichi laigelhtu khat in tuh, Kristian kichi tuh, lauhna himhim neihlou, kipak gige leh, buaina nei gige ahi achi hi. I niteng hinkhua ua, buaina leh haksatna i thuak lai a leng, patau leh lauthawng hetlou a, kipaktak kawm a i om theih chiang kia in, khovel/melma setan in, beihtham, ngaihsak tham hon sa pan phet ding ahi. Thugentu khat in, hiai Bible tang pansan a thu agen na ah, hichin azou achi uhi. “ I Toupa Jesu Krist khe a siikkilh akilh ziak un eiten siik khedap nei thei i hi” achi hi.
Jesu Krist tellou in tukum thak bangchin ipal paisuak dia chih ithei kei. Himahleh, amah toh iton nak peuh leh, bangteng hongtung mahleh, kipak kawm in ithuak mualsuah in, ipai galkah thei ding. Unaute, I tangtawn inn ding vangam lam zuan a ipai na ah, ilampi ading a vualzawlna siik khedap ipoimoh. Mailam nawt dia kipatkhiat ahunta. Pathian in Iraelte kiang a, ‘Hiai taang ah na omsawt hunta uh, Giahphual phel unla malam ah pai un” achih bang in, Amalam apan kikou aw in, ‘Malam nawtin in kalsuan ta un’ achi. Amah toh niteng a tonkhawm a napai leh, bang chi bang lungkiakna buannawite na lampi ah ommah leh, hangsan tak leh kipaktak kawma, “Na thu bang hihen” na chi thei hi. Simtu it, Kumthak 2010 khalam leh salam a vualzawlna tampi na muh na kum leh, na lungtupte na mualsuah na kum hi ding in Toupan honvualzawl ta hen.
Aw haksatna, maang mel muhna,
Lungkimtakin ka honpom dia;
Deihthohtak in ka hon kem dinga,
Haksatna adang a omlai hiam?
