(Nunglam etna & Ma-lam hun Saulou)
- 1.Phawklai bang i phawklouh lai bang a-le, itna a hongsam, dawhzawhna tawh hong enkol, i biak Pasian ahi. Toupa hoih hi, Toupa lian hi; Ama’n eite limtak hongkem hi. EBCC Delhi tuma, tulel leh tunung diing et in, honpii Pa hoih ziak leh muanhuai mahmah ziak in, kilawphuaipi dinmun ah ding hang. Ebenezer!
- EBCC Delhi in, saptuam kemtu dia hongpai masa (heutute honsawl) Rev Paukhanmang te innkuan, Jesu Khrist min a ana vaidawn ni February 12, 1995 ahi. Anuam-ahaksa thuaka Toupa min a sep theih bang sep zawh a Rev Mang leh innkuan in Delhi a nutsiat ni uh January 12, 2001 ahi. Rev Mang, Delhi a nutsiat nunga South Korea a M.Th. (OT) zoukhia, tulai tak in EBC HQ Dorcas Hall ah Director (Institutions) in tu hi.
- Toupa’n, Delhi a A’ belamte cingtu diing tasam lou in koih. Rev Tunson te innkuan January 18, 2001 in Delhi hongtung litlit uh. Amau innkuan tawh EBCC Delhi in hun nuam, hun haksa thuakkhawm tou a, Toupa deihlam bang ahia? cia I zonkhawm hun uh; kikhakna program May 14, 2006 a Saptuam in a neih tawh kiton in hongbei nawn phot hi. Rev Son in Delhi a nutsiat nung Bangalore apan M.Th.(Urban Ministry) zoukhia, tu’n EBCC Bangalore cingtu in panglel.
- Rev Tunson khit a EBCC Delhi cingtu dia hongpai Rev Khamkhanchin ahi. Rev Chin leh innkuan February 02, 2006 in Delhi hongtung uh a, a’ tha khek diing Pastor Tunson tawh Saptuam innpi-a teengkhawm in kha 3 val bang asuk-atou ah kithuah/ kilamlak man uh. Pastor Chin te innkuan in kum 4 cinglou deuh Delhite hon ompih nung un, sinna sangzaw M.A. (in Family & Marriage Counselling course) zom di’n... Toupa deihsakna tang in January 13, 2010 in Dallas (USA) hon zotsanta uhi.
- Ma-lam en fenfan (forward looking) kawma, Local Upa Committee in 22.01.2010 (2.00PM) a Toupa min a kithuahkhawmna a neihpih taak, Pastor Nenglian te innkuan January 07, 2010 in Delhi hongtung uh. Pastor Lian ahihleh 1974 kum a piang, Pastor (Retd) Songkhothang’ tapa; ACTS, S Korea a M.Th. (NT) zouthak, EBC Pawlpi theologian te laka a ‘fresh’ lawitak ahi. A thesis, “Spiritual Rebirth: An exegetical study on John 3:1-21.” Nuam.
“Maciang suan hang ciautui luang bang
Nite kiam in hon tonpih;
Hiai lei i nusia pah ta diing,
Thangvan inn nuam manoh in..”.
