EBCC Delhi in kum paisate in Tuailai Beacon kichi BYF-te malakna in ana suahkhe zel ua, Pathian nasepna (ministry) thupitak hi in ka ngai hi. Khopi saptuam khawng adia poimoh mahmah ahi a, Mission/BYF kia hilou in saptuam pumpi in kum teng in hichibang suahkhe theizel le’ng deihhuai ka sa mahmah hi. Huan, hiai in i saptuam koilam nga, bang tan tung chih etna leh maban pai didan lamlahna hi diing ahihman in, poimoh mahmah hi.
Ahihleh kum 9 sung bang eimah khutsuak ngei Biakinn a i kikhop lai in i saptuam koilam nga a, bang priority nei i hi hiam chih makaite leh saptuam mipi’n i ngaihtuah taktak ngaita hi in ka thei hi. A tuunglam kum 2/3 paisa sung in bel Biakinn luah himahle’ng a sung a vanzat diing a poimoh aloutheilou tampi kaihkhop ngai omlai ahihman in hiaite mah sikhop lai bel i hi a, ahidi mah ahi. Himahleh hiai kia i buaipih theikei diing a, ei sung kia i buaipih gige theikei diing hi. Pathian in Delhi a mun-le-mual honpia a, ei a ngei luah a i omlai in a sung a vanzat di, memberte kep leh etkol di kia sikhop diing in Pathian in hon lamen diing in ka gingtakei hi. Kim-lekiang a Jesu Khrist kua hihiam chih theilou khamangthangte kiang a tanchinhoih tangkoupih diing in Pathian in Delhi a hon koih in mun-le-mual honpia hi diing in ka um tinten hi. Hiailam i ngat diing uh Pathian hon deihna leh koihna san tak ahih ngei leng ka lamen hi.
Upa Committee in leng hiai lam mah phawk in kum paisa 2004 sung in gammial lam i mitsuan ma in ei saptuam sung kikeklian (consolidate) phot in i priority tangthupha genna lam ahihdante khawng kitheihsiamsakna (awareness) pan lehang chihna in Youth/Missions Promotor neih diing tup a nei in bangtan hiam mahmah leng ana kitung hi. Himahleh, Dorcas Hall a i heutute toh kimu a a kigenkhawm chiang in mahni local kia sep dia kuitung(sustain) lou diing ahi chih hon muhpih ua, a poimoh leh hiai lam pang ngiim a neikawm a Assistant Pastor a lemtang hun a koih diing in hon hasuan ua, hiai a tung a project pen kidinkhawl tadih phot hi. Lehlam khat ah bel Pathian in a tung a i gen bang a eisung kia kibuaipih dia hon deihlou a i kiim-i kiang a awiloute lam nga dia hon deih ziak a lampi dang hon kawkmuh ahi zaw diam chih bang hon ngaihtuah sak hi.
EBC Kumsim Khawmpi 57na, 2005 a Agenda (thusun) diing ngaihtuahkhawm ahihlai in “Delhi a Biakinn i neih toh kiton a Mission Centre i na chih pen Khawmpi in hon pomsak in hiai toh kituak in a poimoh bangbang hon semkhia hen” chih thusun a kipiak suk leh BOT in hon ngaihtuah in “Mission Director in study hon bawl phot hen” chi in pekhia uhi. Ahi di mah leng ahi. Khawmpi in Mission Centre chi a puankhiak mawk pen a omzia omlou diing ahihman in study team in hoihtak a hon etkhiak ua, Mission Centre hithei takpi ding hiam, hileh bang ministry pan diing? Kua minamte kiang a banga tangthupha gen diing? Semtu bangchi bang poimoh diing? Field status adia sum-le-pai bangchi bang a sen ngai diing chih leh hithei taktak diing hiam chih hon suichet masak uh ngai diing ahihman in a kum a sim leng lutthei ahi. Hiai thusun a kingaihtuah lai a ka lungsim a honglang mahmah khat tuh hiai lam mah nga dia Pathian in hon deihziak a eisung kipuahhoih masa ni chih pen hon masawn sak nawnlou hi diing in ka um hi. Hiai mah hong paisuak a, Delhi chiangchiang tung theitate tuh huai Manipur lam khawng a i buaipihte mah buaipih lou a kalsang suan diing a Pathian hon teelte i hi diing uh chih ka gingta hi.
Himahleh, vaipau lah siamlou hang a, sappau leng lah huchipi a Pathian thugen theihna diing tan theilou hang a chih i lungkhamna hi diing in ka um hi. Huchibang i pattheih hun chiang in huchibang sem dia ksinsiamsate semsak diing hang a, ei a sum-le-pai leh a tha thoh a pang diing i hizaw hi. Tunung zek chiang in i tate, Delhi khawng a laisim a neu apan ana khangkhia-te Pathian nasem dia hong kipia bang om diing ua, huaite’n amaute mah bang in ut dandan in Pathian thu hon gen ziahziah ta diing uhi. Hiai diing in i kiman hia? Kum 10 Delhi a omtate’n innsung leh kholak a leng hindi medium zang theita hilou i hihia maw!
Hiaite’ thumkawm in buhneipa ngen lehang aman honpe mahmah diing hi. Saptuam heutu hilelte leh hong hitou zel diingte’n leng hiai lam mah vision a nei a maban i sawn touh uh deihhuai sak in om mahmah hi. Huchi leh kum bul teng a Tukum bang sem diing i hia, bang project nei diing? chi a kidot dot om nawnlou diing a, mimal, dept. leh inkuan chih in bangzah ka pia/thoh thei dia chih hizawta diing hi. Unau Mizote ei sang a tanchinhoih dong masa zaw ahih dungzui un hiai lam ah etton taak mahmah uh ka sa hi. Kum teng in a diak in tuailai ppawl in Mission Field Visit/Work Camp chih alou-theilou a a ngaih uh ahi. Hiai a diing in kum bul apan in kisa pah ngal ua, Missions field uh khat vehkhe zel uhi. Huchibang tualsung saptuam hih theih kal ngaklah huai mahmah hi. Hichibang hih thei diing in i kimanta hia?
[ Saptuam pum huam a Policy guan diing toh kisai panpihtu ahih lamen in TBMC Souvenir Peace On Earth, 2005 apan neukha puahpha a suahthak ahi.]
