PRAYER CELL CONVENORS’ ORIENTATION PROGRAM
Ani : January 22, 2012 (Pathianni).
Ahun : 1.30 p.m.
Amun : Biakinn Basement.
Pathian phat na in Bl.No.400 (“Aw i vek in pang chiat ni….”) nuamtak a sakkhawmna kinei masa a, tua zoh in Pastor sehna bang in Upa Thiankhanmuan in Pathian kianga ngetna thumna a neih ban ah Convenorte minlamna neizui hi (Convenor avek a 28 lak ah 24 tel ua, 3 kingen in 1 tellou hi).
Pastor Nenglian in ‘thumapi’ agenna ah nidang in tualsung saptuam sung ah khalam thu-leh-laa kisinsakna leh kivaipuakna lamzang zaw geelna in bial tuamtuam a kikhen in “Upa Bial” chih ki minvuah hi, chi. Hun hong pai tou zel in saptuam milip i hong khan touh dungzui in tua “Upa Bial” a kithuahkhawmna pen hong lemtang khinvek lou in, kalsangzaw suanna hi a ngai in, leh kichimat sem a pankhawm ding lunggulhna toh, a neu zaw a Cell Group neih ding ngaihsutna hong om in, hun bangtan hiam paita apan “Prayer Cell” kichi ah saptuam mite tamlou lou a kipawlkhawm in kithuahkhawmna i nei tou zel hi. Hiai “Prayer Cell” in “Upa Bial” kibawl te khengkhia hilou in Thumna leh Khalam thil a kithuahkhawmna jangkhai zaw ding ngimna a dinkhiak ahi lel zaw hi. EBCC Delhi sung ah 2008 kum in Prayer Cell 20 val om in tua te ah manphatak in ina kizangta. Tua bang kal ah tenna inn kituan vialvial te ihih taangpi man un Cell khenkhat hun teng a zat theih gige louh leng na om sek hi. Huaiziakin, a kal laklak ah bawlphat leh puahphat in om zel hi. Tutung in bel ki bulpat thakna hi ding a ngaihsun in Cell 28 a kikhen in atangpi in Cell khat ah inkuan 4/5 zel i koih ua, tua Cell teng ah makaitu ding “Convenor” khat chiat i koih uhi. Tu in i paidingdan uh kisinsakna (orientation) hun i zang uhi, chi in kisinsakna poimoh leh manpha tak anuai a point te tungtawn in pia hi:-
I. Prayer Cell in a tup:
i) Khalam thu-leh-laa a kipawlkhawmna jangkhai ahih ding.
ii) Thumkhawmna – kipahthu genkhawmna leh ki thumsak tuahna mun ahih ding.
iii) Khalam a i kipahna leh haksatnate genkhawmna mun ahih ding.
iv) Khalam thutak kisinsakna leh kikupna mun ahihding.
II. Convenor mohpuaknate:
i) Cell member list kipia a memberte a samkhawm in fellowship a neih pih zel ding. Hiai toh kisai in, kaal teng (weekly) a fellowship neih ding a lunggulh huai pen.
ii) Fellowship neihna ding mun leh hun a bikhiah ding.
iii) Khateng ading a ‘Thupi’ kipia pansan a kisinsakna leh kikupna a makaih ding.
iv) Sharing petu ding leh fellowship piitu ding a poimoh hun in memberte lak apan a sep ding.
v) Mahni Cell member hilou midang (EBC milou) sharing pe dia chial chiin a neihlouh ding ahi.
vi) Bial Upate (or TBSUC memberte) a tam theipen manphatak a zat ding ahi.
vii) Cell memberte’ haksatna theihpih a, taksa damlouhna toh kisai diak bang ah, Bial Upate/Pastor theihsak pahpah ding ahi.
viii) Cell member mundang a kituankhia, mundang apan hong paithak, omte abaih thei pen a Bial Upate/Pastor theihsak ding leh hong tungthakte Cell Fellowship a tel dia chial pah ding ahi.
III. Prayer Cell Fellowship paidingdan:
Prayer Cell fellowship pai dingdan taangpi(order) leh a telkha ding a lamet item te hiai bang ahi uh:-
i) Hun patna thumna (Pitu).
ii) Vaidawnna leh paikhawmte kipahpihna thupha (Pitu).
iii) Lasakkhawmna.
iv) Thupi putlakna leh sharing saulou (10 minutes).
v) Dotna leh dawnna – kikupkhawmna (15 minutes).
vi) Lasakkhawmna.
vii) Mahni hon sukha thilte sharing na hun.
viii) Kithumsakna leh Thumkhawmna hun.
ix) Lasakkhawmna.
x) Tawpna (pitu/sehtuam).
IV. Prayer Cell tungtawn a lamet:
i) Ki-unauna dik – kitheihsiamna leh kilainatna chii tuh a om ding.
ii) Khat leh khat ki-itna hong pung semsem ding.
iii) Pathian’ thutak theihna a ma suan ding.
iv) Khalam kipahna tamsem nei ding.
v) Khalam a puksia te adia lametna thak tuntu hi ding.
Pastor in hiai atung a bang a kisinsakna hun azoh in program zohna bawl dia achial bang in Upa Damsawmthang in Pathian kiang a thumna nei in hunkhakna nei hi.
*****
Convenor paikhawmte:
1) Lamlun Munluah, 2) Haukhenpau Guite, 3) Jimmy Dalkhanmuan, 4) N.Vumsuan, 5) Biaklun Shoute, 6) Jose T.Lian, 7) T.Songzalian, 8) Ginkhankam, 9) Khamchin, 10) Pausanglian, 11) Ginthanlian Valte, 12) Khummuansang, 13) L.Vungzakap, 14) L.B.Sang Khooptong, 15) Thuamsiam, 16) T.Chinkhanpau, 17) Chinhaugou, 18) Siamchinkhup, 19) Chinthianjuan, 20) Lianpu Tonsing, 21) Thangkhansiam, 22) K.Thangmuan, 23) Upa Chinsum, 24) Goukhangin.
Convenor kingente:
1) Paul Pauzakham, 2) Upa Kaithang, 3) T.Pumsuanlal.
Convenor tellou:
1) Kamkhanmang.
*******
Recorded by:
Upa Thiankhanmuan,
Secretary, Ministerial Committee
