Tukum 2012 kipat chila TBSUC thupukna bangin tukum apan EBCC Delhi in Missionary Vakna lamah kal sangzaw suan in tua lamah nakpitakin ki hanthawn le’ng ichi hi. Hiai Missionary Vakna toh kisai panlak dingdan leh sepkhiak dingdan tangpi TBMC (Missions Committee) in genkhawm in nasep hon panta uhi.
Missionary Vakna toh kisai a tuma a Headquarters (Dorcas Hall) tungtawn a i panlakdan uh bel hiai bang ahi. I saptuam’ Local Fund apan missionary khat vakna Rs. 4000/- leh Missions Committee panlakna tungtawn a Missionary nih vakna Rs. 8000/ - Dorcas Hall ah kha tengin ki khak gige hi. Huai omdan bel khakhat in EBCC Delhi in Dorcas Hall tungtawn in Missionary 3 ki vak chihna ahi. Local Fund omsa apan leh Kha tenga nipini masapen a ngap zahzah/kiphalna bangbang i piak-khawm te uapan Missionary Vakna ki kaikhawm jel ahi. Toupa hon pina ahi a, hihhoih i kisa a, i kipak mahmah hi.
Tuin, Local fund apan hiam Missions Committee apan hiam chihte omsak nawn lou in mimal/Inkuan chih in i ngap bangbang, in gap zahzah, i piak zoh tantan piak dingin panla le’ng chidan ihi. A sum ding zah (amount) fix omlou dinga, mimal/inkuan chihten Toupa apan vualzawlna i tan dan bangjel in leh i ki ngapna zahzah toh Missionary Vak ki hi chiat ta ding chihna suak hi. Tua banga i panlakna te Missions Committee in hon enkai ding uh a, hiai Missionary Vakna a panla dinga thuchiam/thupukna i bawl hunhun apan, kha tengin a kaihkhawmna leh Missionary Vakte chiamtehna hoihtak hon bawl ding uhi. Hiai Missionary Vakna a sum hong lut tengteng a vek sipsip in Dorcas Hall ah kha tengin kikhak gige ta ding hi. Kha tenga missionary vakna sum (amount) i khak khiak zah apan in EBCC Delhi te’n Missionary bangzah i vak uh hiam chih et theih gige dinga, Toupa hon pina ahih a, a vualzawlna tamsem i tan leh, i Missionary Vak zah uh kha tengin hong pung toutou ta ding hi. Huai pen TBSUC hiam Missions Committee hiam in hiai zah vak ni chi a hon thupuk uh hi nawn ta lou in, nang leh ken i panlakna zahzah a Missionary tam vak ki hi ta ding chihna ahi.
Amsapen ding in Nipini paita (05/02) in Biakna Kikhop hun ah Missionary Vakna pledge card ki hawm khia hi. Tua hun ah mi tamtak ten mahni ngap zahzah Toupa lakah thuchiam bawl in pledge card I pe kik siausiau uhi. Huai pledge card kipekik te pansan in Missions Committee in nasep hon sunzom ding uh a, etzui leh delhzui tuakte hon sai tou jel ding uhi. Huai hun a pledge card lakhalou ten chiklai peuh in Biakin ah lak theih gige ding hi. kikhel ta chih omlou dinga, baihlua chih leng omlou ding hi.
Huaijiakin, Toupa apan vualzawlna i tan bangbang Amah adingin suah khia ni. ‘A pekhia tamten nei tawm uh’ chih om ngeilou ahihman in Toupa a dingin tampi mahmah piak-khiak sawm chiat ni. Toupa hoihna ziak kia a Delhi a khosa ihihlam phawk in, leh Amah kianga kipahthugenna leh i ki pumpiakna hi dingin. Huchibang a hih thei dingin Toupa’n saptuam mipite hon ompih in hon makaih chiat hen aw.
Pledge Card hiai ah download theih ding-
