EVANGELICAL BAPTIST CONVENTION CHURCH, DELHI
KNP HEUTUTE LEH NU LEH PATE SEMINAR
(Kiginni, October 13, 2001 - 10.00 to 15.00 Hrs)
Text: "Toupa na Pathian tuh na lungtang tengteng in, na kha tengteng in, na lungsim tengteng in leh na hatna tengteng in na it ding ahi." Marka 12:30 -
Inspirational Hymn: "Kris Suangpi kip tungah ka ding, Mun dang piaunel tum theihna hi" (Biakna Late 93)
Introduction:
I gam khantouh leh siamna' saan dungzui in, niteng hinkhua a hoihzawkna ding leh masawnna ding, laibu bang leng tampi a kigelhta hi. Damtheihna lam chi lehang laibu gen louh in, daktol mahmah leng i hauta hi. Inkuan hindan, Naupang etkol dan chi lehang, ei pau mahmah in zong laibu kigelh tam simta hi. Huaiziak in, tuni a i seminar ah, thu thak leh gen khak ngei nailouh bangmah lamet ding om in ka gingta kei hi.
Ei solkal nasemte abul a i kipatna leh kipat dan kibang vek i hi uh. Tuni a khosakna hoih deuh leh sang deuh i chihte leng, dinmun niam leh khosakna niam chik a kipan ngen i hi. Huaiziakin, i khantouhna ding in, bang chi bang hinkhua i zui hiam chih kietdik ngai gige hi.
Nu leh Pate mawh puakna-
Laisiangthou in, na nu leh na pa pahtawi in, a chi a; huchi a pahtawi tak hi ding in, nu leh pate’n leng i hih ding, mohpuakna, tampi om hi. Ephesate 6:4 - Huan, nou pate aw, na tate uh hih thangpai kei unla, Toupa thuzohna ah leh hilhna ah kem zaw un. Deutoronomy 6:7 - Na tate uh phatuamngai tak in na sinsak ding ua, na in ua na tut lai bang un, lampi a na pai lai bang un, na lup lai bang un, na thoh chiang bang un na gen zel ding uh. Tate sinsak ding hi, pate mohpuakna hi zaw tham ahi chih i mu thei hi.. Nute kia na a i koih uh dik lou hi. Pathian deih bang a tate Toupa thuzohna a leh thuhilhna a kemte Pa enhuai leh hampha hi ding hi.
Niteng hinkhua a i et in leng i tate’n a nute uh sang in a pate uh ngaisang zaw gige uh hi. Kampau, khohei leh chindan leng pate omdan zui zaw uh hi. Huaiziak in, i inkuan sung a i kihou dan, i zite i sap dan, insak inkhang toh i kitanau dan leh, thil bangkim nulepa a pan zilkhia uh hi. Sardarji nupa in, naungek a ta ding un la ua, hong pau thei zok leh ut na hang e, bang mi a hi hiam chih i theihna ding in, chi zawmah uh hi. I tate’n ei hih bangbang, ei hih dandan hon zui ding uh hi.
Tate kep ding tuh nu leh pa mohpuakna a hi chih i muta hi. Nu leh pa kal ah leng pate’ dinmun poimoh zaw hi. Pasal tuh zi lutang ahi ngala Eph.5:23. Huchi ahihleh pate’n inkuan a etkol dan hong poimoh mahmah hi. A pian ua kipan a a kiphatmohte uh theisiam lou ahihna uah, i hihsak nasat ngai ahi. Tai sang in pahtak in thu a mang thei zaw uh hi.
Tate etkol dan ah i thuneihna zang in, i tate a thuman louh zek chiang un i sawi in i gawt pah uh hia? I thugen a hon ngaihsak kei uh leh i tate etkol dan kivel thak ngai hi. Pathian in bel, ITNA in hon pan hi. Johan 3:16 ah Pathian in khovel a it mahmah a, huchiin, a Tapa tang neihsun a pia hi. Rom 5:8 Himahleh Pathian in a hon itna a langsakta mikhialte i hih lai a Kris i sik a a sihna ah.
Mahni hinkhua a kipak leh hindan dik a om, naupang nu leh pa thumang, lawmte toh kituak leh pahtak huai, nu leh pate sahkhua gindan zui leh biakinn khat a kaikhawm tate i deihpen, kinepna leh duhthusam ahi. Hileleng, deihtalua hang chih manin, i enkol khauh (control) law kha hia? Tate thumang leh hoihna ding in, pate etkol dan poimoh hi. Gum tak leh khauh tak a etkol sang in, nu leh pate’n i tate panpih (parental support) pe thei leng lohching zaw ding hi. Parental support i chih pen, i tate’n ah amau it taktak i hi chih a theihna ding ua, i niteng kithuahpih dan a i etsak ding ahi. I deih bang a hong om louh chiang un leng i itna ensak thouthou leng, i Toupa Pathian hon it gige bang in.
PATHIAN DAN / THILSIAMTE DAN (Law of Nature)
A tung in Pathian in lei leh vante siam hi. Huai toh kiton in mihingte, ganhingte, ni leh kha, van aksite om ding dan leng sehsa in koih vek hi. Genesis bung khatna ah, Pathian in vak hong om hen a chi a, ...Huchiin Pathian in vak leh mial a khenta; Vak Sun a chi a, Mial Jan a chi. Huchiin, Sun leh Jan i neita hi. Sun vak sung i nasep- silbawlna ding hun ahi a; jan mial i khawlna ding hun in hon bawlsak hi.
Tuni in, sun hun i zatdan leh zan hun i zatdan i na ngaihtuah kha ngei uh hia? I damtheihna leh damtheihlouhna san hithei ding in i ngaihtuah kha ngei hia? Daktolte muhkhiak dan in, mihingte’n hiai Pathian thilsiamte dan zui leng, tua i natna leh damlouhna tamzawte vei lou ding i hi chi hial uh hi.
Damtheihna
Damtheihna hi mi tengteng poimoh ahi. Piching i hi hia, tangval i hi hia, naupang; ahihkeileh, ginngtu i hi hia, gingloutu; i vek in i poimoh dan kibang vek hi. Tamtak in, damtheihna toh kisai laibu i simta in, ngaihdan hoih pipi i nei ngei ding hi. Huchi in leng, hiai a nuaiate i na ngaihtuah kha ngei hiam, tuni in, ngaihtuah leng hoih ka sa hi. Huaite laka khat - ihmut - sut le.
Ihmut
I na kisinsak dan in, ihmut tam luat hi thadah chihna lam deuh ahi. Hileleng, mihing in, dakkal 24 sung in dakkal 8 bek ihmut poimoh i hi chih Misiamte’n mukhia uh hi. Damtheihna ding in, nek hoih leh taksa kisawizawinate zom a poimoh ihmut kham ahi chi uh hi. Ihmut i kham louh chiang in i sisan hoih kiam in, natna dou theihna zong kiam hi. Tawlhuai leh lungkiakna piangsak hi. Zunkhum bang, pawng thau leh gilgai bang neih baih hi. Tumlam gam a natna tamzaw ihmutkham louh ziak in sui lut uh hi.
Sam Laibu 127 ah, Toupa’n ami deihtak bel ihmut ape nak ngal a, achi hi. Khamuang tak in ka lum ding a, ih leng ka ihmu ding: Toupa, nang mahmah na hi, kei kia a leng bit tak a hon omsak gige. Sam 4:8. Pathian in Elija lam saupi pai ding a a sawl ma in, hoihtak a a ihmut sak khit in, nek ding pia hi. Huchi in juniper sing nuai ah a lum a, a ihmuta hi; huan ngai in, angel in hong khoih a, a kiang ah, Thou inla ne in, achi a.
Nidang lai in, i pipute’n ihmut leh taksa kisawizawina, khut nasep lam na kitasam lou uh hi. Hileleng, nek leh dawn lam deih bang zou lou hi. Tuni in, Pathian hehpihna in eite’n nek leh tak i mu hoihzaw deuhta uh hi. Hileleng, i nasep dan hong kikheng leh i khosak dan kikhengta a, sun leh jan leng theihkhen theih louh khop hial ding in, electric meivak bang kinei hi. Huaiziak in, i hun zatdan kivel thak ngai hi. Bang hun in i lum a, bang hun in i thou a. Inkuan kithuahkhawmna in bang i zang a; T.V., Cinema leh kholakvakna in hun bangzah i seng a? Tate homework leh laisim chiang in, bang i na hih a, i etpih ngei uh hia?
Namdangte leh a pathiante
Pathian, na kim ua mite pathiante na be ding uh ahi kei. Toupa na Pathian ujaw Pathian mullit hat ahi. Toupa na Pathian uh na tung uah a heh ding a, lei a kipan a hon hihmang kha zenhouh ding. Deuteronomy 6:14
Puja leh festival tuamtuamte:
- DIWALI - Firework leh crackers kia ahi kei
- Holi - Rong kinuh kia hiam, thaban chongbah kia a hi kei
- Raksha band - Rakhi kibutsak kia hikei
- Prasad- a pathian kiang a latsa ahi
SINSAK DINGTE
Nu leh Pa pankhawm ding
Sunday Skul kai theih ma a sinsak ding khenkhatte:
Pian apan kum 4 leh 5 tan - Insung tuh thilhoih chiteng zil patna ahi. Marka 12:30; Diut.6:7
- Zun leh ek thak hun
- Lup hun, thoh hun, mawl hun khensak
- Annek hun, annek dan leh an hoih leh hoih lou khensak
- Sianthouna - khut sil, khe sil, kipumsil leh hanawt sinsak
- Silh leh teen khen leh mahni van (kimawlna toy leh a dangdang) meltheih sak
- Paukam (mahni pau), kamsiam leh omdan hoih sinsak
- Pathian thu leh Late a don leh -Bible tangthu a khim ihmutna a zat ding
- Inkuan kikhop neih pih teitei ding
- Sang a hon neih chiang ua, Uzaw leh Nauzaw om ding dan sinsak
- Tate a dia Nu a it pen, ngaih pen leh a nel pen uh - hih tup ding
Sunday Skul hong kai chiang ua- theihtuak khenkhatte:
- Sunday Skul kai sak teitei ding
- Nu leh Pa a zahtak bang un, a heutu, sinsaktute a zahtak ding uh
- Kimuh chil a kihoupihna, Zingpha, Nitak pha khawng sinsak
- Tate skul kai leh kailouh etchet gige
- Hihding a (assignment-homework) piakte hih ngeingei
- Tate lawm leh kithuahpihte theih ngeingei
- Computer, Internet leh telephone zat leh a hun zat dan leh a ut lam uh etdik
- T.V. leh Music et leh ngaihkhiak etdik pih leh control a hoih.
- Laibu, milem bu laibu sim ding, a ginna uh hatsak dingte telsak phal sak
- Naupangte ihmut baih ding, zan hah sawtsak louh ding
- A nek uh leh dawn uh etpih gige
- Ahong let deuh chiang un - a tempaina uh theihsiam pih ding
A tawp pen in - HOLIDAYS
Suti a hawng nai chiang in insung na, SUNDAY SCHOOL HOME WORK, School home work TE HIH DIA phatuam tak a jang dia hun ana bawl di. Kithalop huai tak a lat sak, makaih di. Thil ki thalop huai ahi chih lat sak, a gah a hawng hoih ding ziak in. Kholak vak chih te ki thalop sak louh di. Suti chia kholak vak leh miveh hiam hihpih pen louh di. Mimal leh insung masawn nang ana gel a, makaih leh hihpih di. Tate aneu a lian, a kum dung zui ua na phatuam tak gel sa neih leh piak a makaih.
Pasal-te (husbands) te inkuan lupen ahi uh chih tate lak a latsak gige.
Pa-te’n (Inkuan a lu pen) nute tate lak a pahtawi leh ngaihsang etsak siam in nute a thanuam sak. Nupa tuh a hithei tan a tate leh midang jak leh , muh dia kikalh , kisel louhdi. Nu lungkim leh pahtawi lawhte tuh thanuam, zaidam. Nu suk zum, khasia, kalh, enghou lawh te tuh hong thadah, hong fel lou, man tak hong hilou deuh deuh. Tate na i sep sak chiang a, na nu hiam na pa hiam huh aw chih louh di. Amau na mah ahi chih latsak di. Na nu hiam na pa hiam in hawn makaih thei in te chih zawk di. Tate lawh ching muh tuh a uthuai mah mah ahih ziak in, i lung lut in i ki mansa vek ding un i ki lamen hi.
Noah in tui chim tun ding Pathian gen a gingta a, kuamah dang in a gintak louh lai un leng aman tuh khua keu mahmah mahleh, long a bawl a, Pathian hunchiam a hawng tun in, amah leh a inkuan pihte a suakta ta uhi. Seminar a hawng tel teng teng Toupa’n hawn vual zawl ta hen.
Laisiangthou ah Pa tuh zi lutang ahi achi. Lutang hihna/vaihawmna itna na asem nahia?
- Naupang kepna (khalam) bangchi in na hih a, na hih dan hawih na sa hun hia?
- Hiaite tawh kisai in Baibul chang theisiam louh na nei hia?
