Tulel dinmun et in ei zoumite khang a ding in India khopi tuamtuamte a i pemlut saan laitak uh hia muh theih in om. Tua toh kitawn in naupang piang a percentage en lehang hun paisa toh teh in khopi a piang/urban born sang pen ding hi. Thu khat ah, i gam Kristian gam ahihlouh man in, khopi/urban a piang a khanglian i chihte crossed culture a khanglian ana himai uhi. Hichibang cosmopolitan mun ah sahkhua leh tawndan leh pau dettak neiloute a ding in mahni hihna/identity nutsiat/nelhsiah baihsam mahmah ding hi. Abiik tak in ei zoumite Kristian sahkhua a dia first generation chih bang ana hilaite a ding in pilvan huai mahmah suak hi. Kristian gam a piang a khanglianten bel Kristian inkuan kikepna/kisinsakna kichiantak ana nei uhi. Hiai bang inkuan kisinsakna pen Naupang Sunday School in bangchikmah chiang in a khekkhia thei/zou kei ding hi. Hiaiziak tak in, khopi lian a khosate'n inkuan kikepna ngai poimoh in tuabang kikepna nuai ah naupangte ana khangkhesak uhi.
I kipatna uh enkik zual lehang. Singtang khoneu khakha ah, sun leh jan a leng haksatna omlou a kimu tuah thei gigete i hi uh. Huan, loukuan, school kai leh na dangdang i sep inleng i seppihte i mi isate leh gindan leh tawndan i ki batpihte ngen ahi uhi. Hiai bang environment ah, ngaihdan, gindan leh tawndan bangpi i innsung ah sinkhia in kihilh theikei lehang leng i khotang in hon sinsak theihna chiang a nei mahmah hi. Hiai bang kisinsakna ahun tawk i chi het kei a, tuabang mun a khang kheten tuni tan in, taksapna leh buchin zohlouhna aki thei thakthak lai hi. Hiaibang dinmun a khangkhia naupangte Pathian thu leh laa lam a hon makaih leh kisinsakna pe ding in Sunday school i na zang uhi. Phat leng i phattuampih chiat ua, tuabang kisinsakna nuai a ginom tak a ana khangkhiate tuni tan in a omna munmun uah zat theih pawl in ana pang teitei uhi.
Hiai atung a Sunday school phattuamna i gen pen khoneu/rural context ah dik mahmah mai thei hi. Hitamahleh, tua i tenna leh khosakna munte Kristian environment, community khat compact a tenkhawm theihna mun ahi kei. Huaiziak in, inpua kan lehang tawndan/gindan leh pautuam toh kisai kha pah hi. Huan, khopi a teeng naupangte theihna lam ah khoneu a teengte sang in advance jaw ua, huan chindan tuam toh ki adjust thei pahpah uhi. Hiai bang dinmun ah, i society lah i gentak mah bang in compact lou a, i naupangte gindan/tawndan toh kisai a sinsak ding poimohna Iian mahmah hi. Huaiban ah, naupangte'n (i khang/ Kristian i hihna a sawt nailouh ziakmah hiam) Kristian sahkhua pen adik a, tua lou dang sahkhua zuih theihlouh ahi chih ngaihdan aneih naksang un, sahkhua dangte doctrine leh principle khawng toh ei’ a tehkak pahpah achindan uh ahi. Huan, eilawi i kisinsakna himhim bang leng ngaihkhawkna taktak (seriousness) om leh omlouh thei baih mahmah uhi.
Khopi ah inkuan i kisinsakna, salam hi' khalam hitaleh, akibang kim kei a, tua dungzui in naupangte sensitivity bangleng akibang het kei hi. Hiai bang kallak ah apoimoh mahmah ahih leh biakna limsak leh zahtaak dia naupangte sinsak ahi. Khenkhat in biakna munpen kimuh khawmna leh kithuah khawmna lel dan a ngaihdan neih theih mawk hi. Hiai in naupangte thuzoh baih mahmah thei hi. Tuabang biakna mun leh hun zahtaakna omlouh chiang in, adangte biakna leh biakna munte zaktaak dia sinsak a omte bang in leng hichiding mah ahijaw maw chih ngaihdan hon nei thei mawk uhi. Hiai pen tua i zatdan/paidan Sunday school a dakkal khat leh nih sung a bawlhoih leh hihdik theih ahi khawlkei maithei hi. Aziak tuh, tua i paidan/kisinsakna i zatpen singtang kho neuneu a, sing omlouhna a gua chih bangdan deuh hilel lai ahihman in. Tuaban ah, heutu i neihte bangleng hiai bang naupang fel leh intelligent taktakte hilh leh makaih ding in training leh kisakkholhna bukimnei omkhollou uhi. Tua ding a akul moh bang kisinsakna Saptuam inleng kipe zoulou/khalou himaithei hi. Huan, i teaching method leh a structure mahmah bangleng thring lawta (obsolete) hithei hi. Teaching aid/subject content chihte naupangte adia phatuam ahi na hia, environment toh kituak hia chihte et thak ngai kha ding hi. I paidan/chindan ahi chih thu a i mitdel sialkhau let mawk leh Sunday school i chih bang leng systemic tak a biakna leh Biaknamun kilawmlou tak a maingalna lel asuah khak ding lauhhuai mahmah hi.
Hiai bang din mun ah, naupangte biakna leh sahkhua toh kisai a, pikhelh khak theih ding ana hi hi. Tua bang a i kipikhelh leh gospel ziak a hiaitan tungte i kiakniam nawn khakding uh alauhhuai mahmah hi. Hiai bang dinmun a naupangte Pathian thu leh la amakaihna phatuam zaw dia panla thei ding in, i ki et thak uh poimoh hi. Anuai a dotnate en thak mah leng:
- Tua Sunday school a teaching leh structure i zatte ahoih huntawk na hia?
- Hun tawklou hileh bang lampang ah?
- Kristian midang non-Kristian society ana khosate'n bang hihdan/kikepdan ana nei ua?
- Inkuan a biakna mun leh hun aleng omkhawm a kisinsakna khat neihkhawm ahoih zaw diam?
- Sunday school neite'n bang structure zang ahi ua? A teaching method uh bang ahia? Huan, subject content relevant na hia? Teaching staff kuate ahi ua?
- Khopi saptuam leh khoneu/i tenna gamlam ading Sunday school atuam design poimohta hia?
- Teaching leh a avanzatte naupangte adding in ahoih huntawk na hia?
- Bang lam pang ah akisam om a? Huan, hiai a adding in budget bangzah i khenkhe thei dia?.
- I saptuam leh Society in naupangte sahkhua lam akisinsakna ngai poimoh zou taktak lou i hi hia?
Midang namdangte genlouh ei sung mahmah apan bangleng eimi society selua ahihdan tampi i zata uh. Naupangte khankhiakna dia deih huailou sa pawlbang leng om tel dan ahi. Min population tam a pung semsem ding a lunggulh lai ua, eilawi in Delhi/Mumbai/Kolkata aleng eimi kitam lawta a, naupang adding in ahoih nawn kei, chih khawng, vuaijawl huai louh kia hilouin, moral leh sakkhua lam a makaite adding in warning bell ahi mai kei maw? Huaiziak in, khopi a ana teeng inkuan leh saptuamte'n hiai issue i et thak uh poimoh hilou hia?
