Gam Lakna

Tangthupha tungtawn a gamthak la thei lai dia hun pha hon pia a, Missions Conference 2010 hon zangsak i biak Pathian min manpha suangin Saptuam mipite leh tangthupha tungtawn a gamthak la dia pan lasate tengteng na vek un itna chibai! Gingtute tengteng missionary dia hon samtu Toupa Pathian in Jesu Khrist tangthupha phuangzak dingin hon sawl a tua mohpuakna nang leh kei tungah nga hi (Matt. 28:19). Tua nasep sem ding leh Amah, Toupa Pathian, phatkhawm dinga ki pawlkhawm Saptuam mite ihi uhi. EBC Saptuam’ dinsan tuamah hi a, tua tangthupha puanzakna nna tuh i mission uh ahi. Jesu Khrist tangthupha phuangzakna nna sem a i ki zat chiangin Kha mangthang tampite Toupa Pathian kiangah pilut in om uh a, tua in Toupa Pathian naktakin pahtawi a, A Kumpigam keklet in om hi. Hiai nasep tuh tomchika gen in gam lakna i chi thei hi. Hiai gam lakna dinga theihtuah khenkhat i taklang ding- 1. Gam latu ding hihnate- Gam lakna dia poimoh masa bel Gam latu ding’ hihna/hatna omte theih masak ahi. Nun tapa Joshua in Mosi mun luah a Israel mite heutu a hong pan in amah a thilhihtheihna leh hatna omte thupi mahmah hi. Amasapen in amah tuh miten a muang ngam uhi (Deut. 34:9). Gam thak la thei dingin I Khristian hinkhua ah mite muanngam mi ihih ding kisam hi. Pathian ta ihihna ah mi dangte muanngam leh zuihtak/etton tak hinkhua zang ihih ding kisam hi. Joshua bel midangten a muan kia uh hi mai lou in, Pathian mahmah apan hanthawnna leh khamuanna thu ngah hi. Toupa Pathian in, na damsung teng kuamah himhim in hon nangzou kei ding: Mosi kianga ka om bangin nang kiangah leng ka om tei sin hi; ka hon juausan kei dinga, pai leng ka hon paisan sam kei ding hi, chi’n gen hi (Jos.1:5). Huaiziakin, Joshua gam la ding a hong kisakkhiak hun a amah hihna/thilhihtheihna leh hatna omte tuh amah mi hoihna leh chihtaknate banah Pathian apan hanthawnna leh kithuahpihna ahi. Tuni’n ei mimalmal ten leng Pathian apan tua bang i ngah chiat uhi. Jesu’n namchih kiangah pai unla... nungzuite bawl un...kei khantawnin khovel tawp pha in leng na kianguah ka om jel ding...hon chi hi (Matt. 28:19-20). Gamla ding a eimah i kisak kholh laiin, tua nasep sem thei dinga chitna hon pia Toupa Pathian hi a, hon ompih tawntung ding a thuchiam hon pia Jesu ahihmanin lungmuan huai mahmah hi. Toupa a dia gamlakna nasep Gingtute hinsan hi a, kuamah hiai dinga chinglou omlou ki hi zaw hi chih hon phawk thak sak mahmah hi. Tuabang ahihlaiin, i kipawlkhawmna Saptuam ah bangchin pan i la thei dia? Saptuam’ tungtawn in tua gamlakna nasep ah bangchin hattakin kal i suan thei dia chih tuh ngaihtuah thamching thu poimoh mahmah ahi. Mimalte’n Toupa adia gamlakna nna sem a eimah mun chiat a pan i lak laiin, i ki pawlkhawmna Saptuam tungtawn in bangchin pan i la thei dia chih tutung Missions Conference a i theihkhiak ut mahmah khat ahi. Tua dingin EBC pumpiin gamlakna nna bangchibang ki semta hiam chih leh local saptuamten bangchibang sem thei ding i hi hiam chih te ngaihsun khawm le’ng chi dan i hi. 2. Gamlak ding theihchetna-Gam lakna dinga poimoh thilhihtheihna leh hatna thupitak i neih khit chiangin i lak ding gam theihchetna ki tasam lai hi. Mosi in Kanan gam la dinga a ki sakkholh laiin, gam enkhetu ding mi sawl hi. Tua a misawlte’ zon khiak ding bel- a gam bangchibang gam ahia, a teng mipite a hat uhia hatlou, a tawm uhia tam uh, puanbuk a teng uhia kulhbang nei a teng uh, a gam lei hoih hia hoih lou, chihte ahi (Nam. 13:17-20). Tua bangte a theih khit uh chiangin panlak dingdan kichiantak hongpiang khia in hattakin kalsuan thei uhi. Tuni’n eiten leng tuabang a hattak leh lamzangtaka hiai gamlakna nna i sep theih na dingin theihtuak tampi om ding hi. Mosi sawl bang geih in enkhetu ding sawl thei naikei mah le’ng, tu leh tu a i hihtheih hoih pen khat tuh North India a Tangthupha phuanzakna leh Saptuam phuhna a ana madawk deuh kuahiam tungtawn in theihtheih dan i nei hiam chih ahi. Hun paisa a i theihna sang a picture chiang zaw leh kichian zaw hon kawk muh thei om khak leh chih lametna tawh Missions Conference i sawm ua Toupa Pathian in hon vualzawl ding i lam en mahmah hi. Huchibang, muhna kichiantak i neih theih hun chiangin Tangthupha tungtawn a gamlakna tawh kisai in panlakna lohchin huai zaw, gahsuang zaw i nei thei ding uhi. Tangthupha tungtawn a gamlakna tawh kisai in eimah a hihtheihna leh hatna a poimoh bangin i gamlak ding tawh kisai theihchetna leng poimoh hi. Toupa’n Saptuam mite tengteng Missions Conference tungtawn in Khrist a dia gamlakna a lohching zaw ding leh gah tam suang zaw dingin hon vualzawl chiat hen aw!