Revive Us Again!

Bangchibang halhthakna ahia i poimoh uh?

Laisiangthou ah, Sam gelhtu’n, Nangmah a na mite a kipah theih na ding un, na hon hihhalh nawn kei dia hia, Toupa aw, chi hi (Sam 85:6). Hiai tangtel tutung Goscent Revival Week (Oct. 19-23, 2010) a thupi dia heutute’n hon tel uh ahi.

Hun paisa a thiltungte apan halhthakna pian zia , hong ki patdan leh Pathian Kha Siangthou nasepdan te bangtan hiam i thei chiat ding uhi. Tuhun in leng eite lakah halhthakna poimoh i hi i chih laiin tua halhthakna hong tun dingdan leh halhthakna i deihdan a ki bangkim vek khol kei ding. Himahleh, i deih leh lamet pen bel halhthakna ahi veve hi. Khenkhat ten minam suahtaakna din halhthakna poimoh ihi a chihlai un, pawl khat ten minam ki bawl hoihna din halhthakna poimoh ihi achi uhi. Khenkhat ten pankhawmna ding leh kipumkhatna dingin halhthakna i poimoh hi a chihlai un, pawl khat ten pankhawmna lou in halhthakna om theilou ding hi chi uhi. Tuabang mah in, khenkhat ten khelh kisikna lou in halhthakna om theilou ding hi achih lai un, pawl khat ten bel awlmohna leh deihna taktak lou in halhthakna om theilou ding hi chi uhi. Tuabang eimah deihdan, muhdan leh lametdan halhthakna a poimoh mahmah lai in, tuate sang a poimoh zaw bel Kha Siangthou nasepna tungtawn a halhthakna ahi ichilou thei kei hi. A halhthaktu ding ei mihingte himah lehang, hon halhthaksaktu ding bel Pathian mah hi veve hi. Amah apan hi lou halhthakna tuh bangzahta a etlah huai hi’n hong ki lang mahleh khemna lel hi zaw ding hi. Tua ahihman in, Toupa Pathian mah i sap a, amah apan halhthakna kia lunggulh pen a i neih ding ahi.

I tangtel ah, halhthakna hongpai dingdan ki gen kei mahleh tua halhthakna gah (fruit) dingbel Pathian a kipahna ahi chi hi. Huai tuh Pathian apan or Pathian a kinga kipahna ahi. Hiai apan sinlai om thei khenkhat bel- Halhthakna poimoh kua te hiam?

Pathian a kipahna neiloute. A kipahna Toupa a kinga loute hi pah ding chihna ahi. Na kipahna koiah kinga hiam? Nek-leh-taak hauhna, neih-leh-lam kiningchinna ah maw, or pilna leh siamna ah? Midangte’n thupi hon sakna uah maw or dinmun poimoh tak neihna ah? Huai bel midangte sang a tungnun zawkna a kinga kipahna leh lungkimna hinkhua ahi. Tuabang hinkhua zang ihih in bel halhthakna i poimoh mahmah chihna ahi. Bangchi bang halhthakna i poimoh hiam?

Hinkhua kikhek halhthakna bang, khelh kisikna halhthakna bang, ki bawlphatna halhthakna bang, ki thutuahna leh ki pumkhatna halhthakna bang i poimoh hi. Thamlou in, Pathian naihsem thei dinga halhthakna i poimoh hi. Hiai te tengteng ban ah i poimoh halhthakna bel Toupa Pathian tunga kipak gige hinkhua nei thei dinga halhthakna ahi. Khovel haksatna tamtak i tuahtouh laiin, tua i haksatnate sanga Toupa tunga i kipahna a letzawk ding ahi. Khovel thil leh kim-le-kianga thiltung ten a pii kipahna hinkhua hilou a, bangchibang lohchinna leh lohsapna, lungkiatna leh vuallelhna hong tun hun a leng Pathian a kipahna tawh hinkhua a zang thei gingtu ihih ding kisam a, tuabang dinga halhthakna poimoh hilim lou i hiam hon chisak hi. Tuabang diingin, Toupa maiah kiniamkhiak in, lungsim niamlakin, omdan giloute lehngatsan in, thum le’ng Aman hon ngaidam dinga, thil thupi leh thil kisel, i muh ngeilouhte uh hon musak ding hi. Toupa aw, nangmah a na mite a kipah theih na ding un, na hon hihhalh nawn kei dia hia...