Zan zeka i zatkhawm uh Missions Conference 2010 programme tawh kisai Toupa hon pi dan pulaak le'ng chi'n tamlou ka hon taklang hi. EBC Saptuam Delhi in Toupa vualzawlna i tante
Toupa gam nasepna leh tangthupha phuanzakna ah bangchi'n manpha zaw leh gahsuang zaw in i zang thei ding hiam chih dotna liantak mi tamtakte' lungsim ah om hi a thei in, leh Saptuam michihte Toupa gam nasepna ah kihel in bangchi'n Amah tawh kinaih sem in kal i suan thei hiam chi a tuabang lampi zawnna hi ding in Workshop-Seminar leh Motivation kithuah "Missions Conference 2010" lamzangtakin October 30-31, 2010 in i zang uhi. Kuamah mimal, pawl/Department chial tuam om hetlou hinapi'n Toupa gam nasepna awlmoh tampite lakah mimal bangzah hiam te i paikhawm thei ua lungtun huai mahmah hi.
A masa ni'n mi 80 vel ki paikhawm a, a ninih ni'n bel Biakin ki dim hi. Hiai hunte ah EBC mite kia paikhawm hi louin pawl dang apan zong Toupa gam kekletna nasep lunglut mi bangzah hiam hong kihel gige uhi. Rev L Kham Kho Lun, GS in Conference hon na nei in program kipan hi. Hun masa pen ah EBC pumpi huap a Missions nasepna tawh kisai panlakna om lellel te leh local saptuamte panlak theihna dan om thei khenkhat heutupa Rev S Vungminthang apan seminar paper- "EBC Church and Fulfilling the Great Commission" chih pansan in sinsakna manphatak om hi. Hiai hun ah Pa N Suakzathang, Chairman (TBMC) pitu in pang hi. EBC pen established church ahih man in thugin leh thusinsak kingakna kichiantak nei kipawlna ahih ban ah kivaipuakna tawh kisai a centralized system zui i hihman in tulai a mission agency khenkhat tawh theihkhelh louh ding ahihdan bang, local saptuamte'n Toupa apan Amah gam kekletna ding a puakgik i neihte kithukimna kichiantak leh sepkhiak dan ding kichiantak tawh sem a kizang thei i hihdan bang, Headquarters tungtawn a mission field ki hong te ah naktak a panla thei i hihdan te tel in thu poimoh tamtak sinkhiak in om hi.
Ni masa hun nihna ah, i omna mun North India ah bangchileh Toupa gam kekletna tawh kisai in EBC Saptuam manphatak in kizang thei ding hiam chih lampi zonna in Pu Lalchuangliana apan seminar- "Evangelism and Church Planting in North India: Challenges and Opportunities" chih pansan in presentation manphatak om hi. Aman sahkhua leh minam tawh kisai a North India dinmun tangpi hon taklat banah CONCERN tungtawn a Toupa gam kekletna dia nna asepdan uh hon taklang a, navak huai mahmah hi. Natives mite zang a lohchingtak a sep theih ahihdan bang, hanthawntu leh panpihtu hihna nna ei tawh kituak hun mahmah ahi diam chih bang ngaihtuahna hon pe hial hi.
Ni nihni Missions Motivation hun ah heutupa Rev L Kham Kho Lun apan Mission nasepna thukin ahihdan ngaihkhiak in om hi. Tu mahmah a sep ding nna, gingtu tengteng tung a mohpuakna Pathian in hon piak ahihdan leh midangte paulam a nei a eimah sep ding semlou a om thei hilou i hihdan bang phawk thak in om hi. Hiai programme zat hun a Toupa Pathian in Saptuam mipite' tawt ding lampi hon kawk muhte enchian a tua lampi tawn a kalsuan thei chiat ding in Saptuam neitu Toupa Pathian in a mite hon vualzawl in hon makaih chiat hen aw! [Pics at photo gallery]
