“HICITAN HON MAKAIHTU TOUPA AHI...”
[April 25, 2010 – June 26, 2011]
By- Upa Chinsum
Sawmkua leh kuate dam a om, huangsung nuam a nuamsa a a-omlai ua, tang a mangthang ‘khat’ pen zong di’a kuankhia ‘Belampu muanhuai’ Jesu Khrist ahi. Tua Belampu hoih dungsun a EBCC Pawlpi in khawneu leh khawlian (khawpi) a belamte cinna/ etzuina a neih touh zel lai in EBCC Central Delhi biakna kikhop, skul hall khat mai hitalou a Christ Methodist Church, 1 Butler Road, Tiz Hazari mun a worship service 26/06/2011 (Nipini) 1400 hours apan pan thei a i om nawntak mai uh; TOUPA eidi’n hoihna e! Hiai 26/06 program a BYF CD in Mr V Nunlian tungtawn a gelhkhiak la “Hicitan Hon Makaihtu TOUPA ahi...” a honsak siahsiah un lung akhoih a, 25.04.2010 - 26.06.2011 tuun/ huam kim le sak in a om hi. Ebenezer!
Hun paisa etkiikna: Saptuam heutute kal suanna Rev Khamkhanchin, EBCC Delhi local pastor apan sungin ‘EBCC Central Delhi’ biakna kikhop pat di, a pat ni di bikhiasa (fix) pen paisuak lou hi. Rev Chin in Delhi a nutsiah nung in Rev Nenglian @ Rev Lian hongpai hi. TOUPA muhsak leh pii-na bang zel in EBCC Central Delhi biakna kikhop pat di Rev Lian leadership (as head of the Ministerial Committee) na nuai ah sutzop touh ahi. Atom in, 25.04.2010 (Nipini) in EBCC CD biakna kikhop pat ahong hita – BM Gange Girl’s Sr. Secondary School , Razniwas Marg, North Delhi ah. Tua EBCC Delhi adia ciamtehtham ni (red-letter day) in EBCC Delhi biakna ngeina kikhop khak thrap ahi! Huci’n Saptuam makaite thusiamna tawh dawh a om Bus-te leh mahni gari a paite Rajniwas Marg a skul hall (biakinn hilou) khat ah biakna kikhop masa zang di’n kizuih lut ngeingai ahi.
Thiltuah touhte tamlou: EBCC Delhi , Delhi leh Central Delhi biakna (mun nih ah) 25.04.2010 apan piangta, mahleh tualsung Saptuam kemtu (Pastor) 2 vaneih diing thubaih hilou hi. Rev Lian in TOUPA apan hatna leh pilna dong kawm in Delhi metro-city ah local Saptuam 2 kepna naa hon pan tou keukeu hi. Abul a i gen ‘Belampu muanhuai’ dungsun a, belamte itna tak tawh hon etkol touh cia’n Sian lemgel a thiltung ahingei dia, (Rev Lian) damthei in, a’ pianna Nu leh Pa DELHI ah hong om khazek thei uh. A’ pa Rev Songkhothang (retd. Pastor) in Pastor Lian naa gik mahmah bangtan hiam ah honghuh (assist) kha thei sawnsawn, TOUPA hoih hi. December 2010 EBC Kumsim Khawmpi in “EBCC Central Delhi” pomna neita. Hallelujah!
EBC HQ Kumsim Khawmpilian 2010 ah Pastor ordain thak 5 (nga) om. Tuate local saptuam tuamtuamte poimawh (need) enkawm in heutute’n honhawm uhi. Delhi honbaan nailou deuh! EBCC Delhi leh Central Delhi lawi-upa cingkamte’n Pastor (Rev Lian) kithuahpihna lam tuamtuam ah kithuahpih zomtou, sisan a A’ leisa saptuamte’ ma ah TOUPA ana pai zel. Mihing gam a ding kawma a chang-a ka ngaihsut cia’n, Rev Lian’ tavuan giksa in na tawlpih thei zelzel ing. A’ muanna (or lamet) TOUPA a nga-lou Saptuam kemtu khat himaizen leh, Kiginni nitak leh Nipini zing tenga mahni kithangpaihsuah theih diing hidan in mu ing. Ahizong, laphuaktu’n, ‘A haksatna mun ah om mahle’ng TOUPA Nanglou kuadang muang lou diing...’ ana cih ngeungeu cihpih thei Local Pastor khat, EBCC Delhi leh EBCC Central Delhi in i neihkop khak hampha hang. Tua bek hilou, a naa (h.t. biakna program bawl leh etzui nisim 25.06.2010 apan) kibehlap hitamahleh amah lamsang a khalam antun (spiritual food package), luikhiak di an lum vitvit tasam vetlou Pastor neihkhak cih khawng DELHI (EBCC Pawlpi a om)te hamphatna ahive.
Genzek lai le’ng. Program neu leh lian, dahna leh kipahna vai, mun tuamtuam across the denominational barrier a khalam-an Rev Lian tungtawna hong pai, zak khak zelzelte’n honchawm thei a, DELHI a omton khak bekthamlou in Jesu Khrist hakkol puakkhawm khak bang hampha kisak vungvung hun a tam hi. A’ naa a sep uh TOUPA’N, Rev Lian & innkuan leh a kep uh saptuam/ sapkhiak (call out people) te A hoihna tawh honzui zom zel hen aw!
Mailam hun saulou: Christ’s Methodist Church , biakinn mun kilawm leh siangthou petmah ahi. Biakna kikhop zat patna hun 26.06.2011 ah BYF Delhi in “Aw a lamdang e...” (T PKT) siamtak in honsa siahsiah uh. A lamdang Jesu Khrist hon itna pansan a i tanau hiam, tawndan i kibatpih hiam le hilou, ‘Methodist’ pawlpi changkang mahmah khat in ei ningnengte tua CMC biakinn zang thei dia hon na laaklut taak pen uh TOUPA thupha, A vualzawlna ahi. Tua vualzawlna zanghek (abuse) hihlouhna di’n Rev Ashwani Francis thugen, i.e. the power of commitment... a person cannot have two commitments at the same time, cih thute ngaihsut kiikkiik tuaklua. Upa Chin Khenthang in, “Vualzawlna i zat hoih sung vualzawlna ahi a, i zat hoihlouh cia’n vualzawlna ahi gige kei” ana ci.
TOUPA’N pha asakleh, ni khattei (Amah seh hun ah) local Pastor dang khat Delhi ah sawllut in a hong om ngei dia, EBCC Delhi & Central Delhi huamsung ah belam gilkialte leh lammangte etzuina kichup seem (Pastor nih etkolna nuai ah) a hongpai lai diing. Ei deihdan leh utdan golpen sakna hinkhua apan TOUPA deihdan deihpihna a hongtung lai di’a, ei tup ek thu leh kisaan thu mawk hitalou in Khrist (ei a hing pen) in thu nei in ahonpi hithit di’a; tuni a method hoihlua/ fellua nei (Methodist)te gamtatdan dongkholh i sakphialte zong ‘awlkha in’ eite paidan (method) ngeina hong hih hun a om ngei diing – TOUPA kipahlam, A’ deihlam zon pipen a nei a, Amah vai hawmsak i hih peuh leh. Hici tan hon makaihtu lah Amah ahisi a. Selah.
Simtute, TOUPA thupha maw!
