Project Nehemia
(a byf, ebcc delhi initiative)
MISSIONS MOTIVATIONAL TOUR- 2013
(a brief write-up)
EBCC Delhi Ministry Year Plan 2013 a kiguang “Missions Motivational Tour” kichi TBYF (Project Nehemia) tungtawn a sepsuahna Jul 26-31, 2013 sung Zodawn (Thanlon bial leh Guite kual) ah EBC School 17 leh saptuamte vehna neihin om hi. Delhi a kipan Pastor V Nenglian makaih in mi 15 hongkuan uhi. Amaute Jul 26 zing 6:40am in Rev S Vung Minthang, GS, EBC in thumna toh Dorcas Hall apan khakhia in Rev V Thangkhangin, Director (I) in Tour paite lamtonin vamakaih hi.
Huai ni mah zinglam in Chongkhojou Chiangpi ah, open natural AC nuamtak nuai ah, zingan ne in Zo huihkhisiang dik hithit uhi. Pathian’ hon piak Zogam nuam, mual-leh-guam kilawm takte lungkimtaka en in, lungsim a kipahnate siamtu Toupa Pathian’ kiang tun kawmkawm in, lamzangtakin BRTF saina a black-topping kibawl thak vom ngingei zuiin Thanlon vangkhua 2:00pm velin hongtung uhi. DS leh bialtu Pastor makaih in saptuam makaite leh school enkoltuten singpi tawh ana dawn’ uhi. Singpi dawn khit in, plan a tellou himahleh Bukpi leh Bethel khopi manawh uhi. Huai ah school te ana kikhak khit manin panpihna thilpiak nusia in Thanlon ah hong kiknawn uhi. Deihsakna tawh khotual te’n Kelsa ana bawl uh taitaka ne in, nitakin biakna kikhop hun zat hi a, mipi tamtak kikhom in hun nuamtak zang uhi.
Jul 27 zingsang 6:30am in CES Thanlon etna leh naupangte toh interaction hun zat hi a, zingan nekhin 10:30am in Thanlon nusia uhi. Mualpheng CES etna neih hi a, huai apan CES Khajang leh Phaitong etna nei uhi. Phaitong ah nitakan nekhin nitak kikhopna nuamtak nei uh a kikhop tawp in Sinzawl ah tailut uhi. Assam Rifle te’n sawtlou a khawlsak nungun Sinzawl khua a Headmistress Qrts lut in huai ah Sinzawl CES committee te’n vaidawnna nei uhi. Jul 28 (Nipini) zing biakna kikhop ah D I in thugenna hun zanga kikhom tam mahmah hi. Sunnunglam teng school lam program nuamtak zat hi a, hosteler te tawh kithuahna leh huai mun mah a annekkhawmna nei ngal uhi.
Jul 29 zingin Khuanggin CES ah etna nei in, huai apan Songtal ah zingan delh uhi. Annekkhit in CES Songtal etna nei uh a, huai khit in Mualnuam CES etna nei zui ngal uhi. Nitak kikhop na nuamtak leng zat in om hi. Mualnuam ah Singngat DS in ana dawn a, hulum tuan mahmah uhi.
Jul 30 ni’n Thuangtam, Tumajang, Lungthul (D), Tuilakjang+Bualjang, leh Lungthul (T) a CES te etna nei uhi. Sungdoh khua nitak nungin tung uh a, Biakin a paisuak in biakna kikhop nuamtak zang uhi. Mipi tam mahmah in Biakin dimlet hial uhi. Jul 31 zingin Kaikhoen Academy etna nei uh a, huai zawh in Singngat manawh uhi. Singngat DS Office ah hun sawtlou khawl in nitaklam 3:30pm in Dorcas Hall tungkik uhi. EBC Central School Sub-Committee makaihna in Dorcas Hall staff te’n Tour a paite vaidawn kikhopna leh ankuang umpihna nei uhi. General Secretary in kipahpihna thugenna leh thumsakna nei in Director of Missions in hanthawn thugenna hun zang hi.
Hiai tour ah school 17 leh saptuam 5te veh in om uhi. School te ah naupangte group 2/3 banga khen in naupangte tawh interaction hun manphatak zat in om jel hi. Naupangte IQ niam tuanlou ahihdan bang, maban saupi amuhlawk louh lai un leng lametna leh kithalawpna nei uh ahihdan bang muh theih in om hi. Naupangte tawh Project Nehemia (PN) team te’n hun a zat kal un D (I) makaih in Pastor leh school staff+managing committee member om thei tengin school maban ding kikupna hun nei jel uhi. Bang chileh siamsinna tua sanga quality neizaw a paipih thei ding, naupangte’ personality development bangchi’n I etkaipih zou dia, chihleh, bangchi’n mahni kitoudelh school I suak thei dia, chihte kikupkhawmna hun in zang jel uhi. Nitak Biakna kikhop hunte ah PN team apan report tomkim leh phatna lapawl om a, D (I) in hanthawnna thugen saulou nei in, Pastor V Nenglian in thugenna hun la jel hi. Aman mahni mimal khalam kitunding thakna uangbawl dingin saptuam mite hanthawn hi. Pathian’ deihdan tehna diktak zanga niteng nektak zonna leh khosa a kalsuan kisam ahihdan gen in, tuma a nam diktat leh ginom I hihna uh mansuah dek I hi uh chi hi.
Rev V Thangkhangin, Director of Institutions, EBC in lamtawn in Tour paite makaih a, Rev V Khamvum, Singngat DS in amah division sungteng DWC memberte sawlin kithuahpihsak a, huai banah, amahmah in Mualnuam apan Singngat tan vamakaih lai hi. Hiai tour ah Zodawn mipite’ dinmun, a haksatna uleh a hamphatna uh tamtak muhsuah in om hi. Lam tuamtuam a suahtakna a hong om theihna dingin Toupa’ hatna muang a sahkhuana leh siamsinna naktaka uangbawl ding kisam hi.
Hiai Tour tungtawn in Toupa’n thupina tangta hen.
