“WORKSHOP ON PARENTING”
Venue :EBCC Delhi Chapel
Date :July 13, 2013 (Saturday)
First Session (10.30 AM to 1.00 PM)
Topic : “Biblical Values and Standards in Parenting”
Piitu : Pastor Nenglian
Hun masa ah Pathian phatna lasakkhawmna hun zat ahi a, lapitute’ (Thangsuanmung, Mungte, Nemkhanmawi, Florence Sonkim & Ching Lydia) makaih in anuai a phatna late in mipi’n Pathian phatna hun nuamtak kizang hi:-
1) “Insung maitam ah phatna la sa ni…”
2) “Nang na omna nuam…”
3) “Hatlou mi ka hi zong…”
Tua zawh in Keynote Address genna Upa Damsawmthang, Chairman, TBSUC in nei a, tuni hunzatna a piitu ding te Pastor Nenglian leh Pa Vumlunmang te pulakna leh amau tung a kipahthu genna aneih ban ah tate kepna poimawh petmah ahihdan leh theihna leh huai zatkhiakna akilual kuul ahihdan gen hi. Tua ban ah theih leh zuih dia hong kigenkhe ding thute lungluttak a ngaikhia a phatuampih ding in paikhawmte ngen a, tua zawh in Pathian kiang a kipahthu genna leh panpihna ngetna thumna nei hi.
Pastor Nenglian in amah hun ah thumapi in hiai workshop hong piankhiak dan tomkim a suina nei masa in a’ topic “Biblical Values and Standards in Parenting” pansan in sinsakna manphatak hon pia. Pastor Lian in ‘Biblical Parenting’ tungtang ah hiai bang in anuai a dotnate bawl masa hi:-
- Bangziak a tate kepna poimawh sa ihia (Why parenting)?
- Hiai in bang tun tupna nei ahia (Goals)?
- Hiai kibulphuhnate bang ahia (Foundations)?
Hiai dotnate tomkim a dawnna Pastor mah in agen na ah Bible’ kawkmuh bang a tate kepna poimawh mah ahi; aziak bel inkuan limsiamtu (designer) leh bawlkhetu (creator) Pathian hi a, tua ziak in tate Khris a pianthakna nei leh Khris batna nei a hong khantouh ua hong pichin nading ua kep leh makaih tuh Bible hon deih dan ahi hi (Sam 127, Paunakte 22:6, Genesis 1:27-28).
Pastor in ‘Biblical Standards in Parenting’ tungtang a’ sinsakna ah parenting standards/styles chituamtuam hiai bangte omthei chi:-
1) Authoritarian (or Over-protective) Style – tate khauhtak a thunun (iron control); vaulau(threatening); kemchip lua(over-protective). Hiai bang a tate etkolna in tate ah mannabei (useless) a kikoihna hiam, ahihkei vanglak leh thupailuat utna (bossy) ngaihsutna tun ut mahmah hi. Etsakna tallang mahmahte: Herod the Great, Kumpi Saul.
-2-
2) Permissive (or Uninvolved) Style – nu leh pa pangkhawmlou; tate gina-sana a enkollou a khahzan; thuhilh thou leleng hoihtak a tate enkai lou. Famous examples: Siampu Eli, Kumpi David.
3) Democratic (or Authoritative) Style – nu leh pa pangkhawm; naupangte ngaihsutna leh lunggeelna kichian nei dia chiil a makaih; tate amau’ theihsiamna tawh kituak a sinsak; kithununna (discipline) ngaisang. Famous examples: Kumpi Solomon, Mosi’ nu leh pa, Samuel’ nu leh pa.
4) God’s Parenting Style –
- Pathian in ‘Pa’ ahihna ah A’ ta it in ahinkhaw zatna a kihel lunglut mahmah hi.
- Amawkmai a thunun khum lou in A’ta’n akaan louh dia gii (boundary) A khun te chiangtak in theisak zaw hi.
- A’ta thumanglou a a hel chiang in A thunun in A bawldik zel hi.
- Thutak zuihding etsakna hoihtak tawh A kawkmuh zel.
- Suse thei thil te lak apan A’ ta kembit hi.
- Kul leh poimawh teng suktuahsak Pa ahi.
Pastor in atung a bang a sinsakna manphatak hon neihpih zawh in kikupkhawmna (discussion) hun ah hon lutpih a, hiai hun a ngaihdan kigen te leh dotna/dawnna kibawl te hiai bang ahi:-
i) Upa Damsawmthang (ngaihdan gen) – Inkuan a Laisiangthou simkhawm a Pathian kiang a kipahthu genkhawm zel manpha; thil khempeuh priority piaksiam poimawh lua.
ii) Upa Thangzalun (dotna bawl) –
Dotna: Corporal punishment piak tungtang bang ngaihdan nanei/inei a?
Dawnna: Hiai tawh kisai in Pathian’ deihdan (Biblical Standards) a thupipen a koih a khovel paidan zuih pen a thupipen a koih zawklouh mah hoih pen din gintakhuai. (Dawngtu: Pastor Nenglian)
iii) Pa Thangchinlian (dotna bawl) –
Dotna : Tate sawina a ‘chiang’ zat chih pen a chiang chitchiat genna hi khollou a,etsakna dan a gen ahi a chihtheih diam?
Dawnna:’Chiang’ kichi pen a literal meaning mah dan a khiak a dikpen mai diam maw. (Dawngtu: Pastor Nenglian)
iv) Upa Kamsuanthang (ngaihdan gen) – Chiang zat pen a mi’ zil a zat leh zatlouh ah a phattuamna kinga din uphuai.
-3-
v) Pa Chinhaugou (dotna bawl) –
Dotna : Tate etkolna a mohpuakna volhdan (prioritisation) piak didan guide piaktheih a om diam?
Dawnna:a)Inkuan leh tate tuh first priority piak ding mah hilou hiam(Pa Vumlunmang)
b)Mohpuakna got a I om te volhdan siamna Pathian apan pilna om hi. Mohpuakna zawhlouh di Pathian in hon pe lou ding hi. Ahitak in a poimawh masa zaw a unit neupen ahi – mimal; tua zawh in aban ban in inkuan, saptuam, khawtang. (Pastor Nenglian)
Pastor in a hun zawhna dia thunanung (concluding remarks) agenna ah thiltheihsiamna (discernment) Pathian kiang a thumna tungtawn a ngah ahi chi. Tua ban ah zi/pasal leh tate bang a ihmut nung ua thumsakna neih a Pathian’ khut a kepsak manpha lua ahi, chiin in neih sawm ni; chi in paikhawmte vaikhahna nei hi.
Tua zawh in lapitute’ makaih in anuai a Pathian phatna late sakkhawmna kinei hi:-
1) “Toupa aw kon ngen hi…”
2) “Sian lemgeel dan…”
Hun awng kaal a issue tuamtuam kikupna Upa Kamsuanthang’ makaih in neih hi a, hiai hun a issue/point tuamtuam hong ki vawkkhe te hiai te khawng ahi :- work-life balance, financial management, time management, sibling issues, insung a vanneih te (tv, computer, etc) zat dan toh kisai (Hiai te ahitheitan a second session a Pa Vumlunmang in hon take up din ngen zom hi).
Tua zawh in ankuang (lunch) Pathian kiang a latna thumna Upa Kamsuanthang in nei in First Session nuam leh manpha tak in kizou hi.
***********
Second Session (1.30 PM to 4.00 PM)
Topic : “Tips for Raising Children”
Piitu :Pa Vumlunmang Vualnam
Lapitute’ makaihna in Pathian phatna in “Nang na omna nuam…” sakkhawmna nuamtak a neih ahih zawh in Pastor Nenglian in Pathian kiang a panpihna thumna nei in Pa Vumlunmang kiang ah hun pekhia hi.
Pa Vumlunmang in a hun patna thugen (opening remarks) ah amah pentak hiai ‘thupi’ gen dia chin a kisaklouh dan leh a septu upate bang phuul uthuai sa phial ahih dan; hilele theihna hauh ziak hilou a poimawh sakna om ziak a seh ahihna a hihtheih bangbang a su buching dia hong ding hizaw ahihdan gen hi. Aban a genna ah tua leng abul a kipan tuung (nursery student) bang a kingai ahih dan leh mipi te leng akhen matric pass bang, graduate tan tungta bang, akhente lah kipan dek panpan bang om dia agintaak dan gen hi.
Piitu in aban a gen zel na ah nikum in leng heutupa Rev.Ginneithang in hiai tungtang naktak in hon sinsak a, huai a ahon gen point te bang genkhit zok zawh ding ahi kei. Hiai tawh kiton in ‘kha in zaw angap a, himahleh sa zaw a hat kei’ (‘spirit is willing but flesh is weak’) chih hongtung hi. Bangteng hileh Laisiangthou (Ephesate 1: 15-22) in agen bang in Pathian’ thilhihtheihna thupi misisa nangawn kaithou thei a kinga ihih a huai tungtawn a inkuan etkolna a Pathian’ hatna a kinga ihih apoimawh pen ahi. Inkuan etkolna a lawhching a kilangte’ thuguk (secret) tawh kisai in ka nu & pa te’n dotna a dong (receive) sek uh chih kathei. A dawn ut lam uh leh a dawn siam lam uh hilou ahi chih leng ka theihpih hi. Amau gen hi hetlou in kei muhdan neuchik hon gen leng, ka nu tuni chiang in kum 71 bang phata mahleh a omdan leh gamtatdan a etton huai ahih dan leh huai kizui zoulou kha nak ahihdan ka muchiang mahmah hi.
Nu leh pa te adia theihthak dia kuul leh poimawh hi a ka theihte tuh –
1) Recommitment - I mohpuakna te uh veelchian thak in huai adi’n kipiakna thak neichiat nawn le ichi hi.
2) Training – Naupangte/tate zaw chiil ngai mah ahi uh chih itheih di’n deihhuai isa. Khenkhat te bang kibawl a nu leh pa te thuzawh thei pawl omtham uhi.Hichibangte control a chiil (train) ngai mahmah uh hi in ka thei.
3) Discipline – Nu & pa te tate tung a thuneitu hi uh ahi chih naupangte’n a theihsiam nadi ua nu & pa te I om uh a poimawh mahmah hi. I tate I it in I hawmthoh tham ua, duat leng duat huai ahitham uh. Himahleh inkuan sung a thuneihna tawitu om a, huai tuh nu & pa te ahi uh chih taten a theihchiang uh poimawh lua hi.
4) Example – Tate etkolna a poimawh mahmah khat nawn tuh a gen zelzul lam siam sang a gen tamlou a omdan leh gamtat a ettontaak hih tup zawk ding ahi.
-5-
Nu leh pa te adia challenge omthei tuamtuam tamlou kikum nawn leng –
a) Sibling rivalry – Hiai tawh kisai in unau (tate) kina/kisual lepna ah zeep leh saat kuul a om leleng theihsiamsak a hih ding (amoh zaw pen tawh kisai in).
b) Financial management – I tate’ a dia a poimawh khollou te baan leisak zelzul louh ding.
c) Screen Addiction – Hiai tuh ‘key challenge of 21st century’ ka chi hi. Tua ban ah “whoever masters the ‘screen’ is on way to success – adult or child” ichi ut hi. Tuhun in technology advancement hat petmah hi. Hiai in I tate nakpitak a thunun (influence) zouta ahi chih ihaih louh hial ding uh ahi. Tua ahih tawh kiton in nu & pa ten leng hiai lampang ah itheihna uh khansak kuul ahi chih imangngilh louh uh adeih huai. Aziaktuh, itaten bang en ua bang hih uhiam chih itheih bat uh kuul petmah kasa hi.
Pa Vumlunmang in ahun zawhna thugen (concluding remarks) ah Pathian in hon awlmoh in hon deihsak ahi chih ithei. I kep leh etkol di i lak ah ta/naungek hon pe tou zel a, huaiziak in eite tung ah lametna nei ahi chih achiang a lungmuanhuai isa. Hiai hehpihna/deihsakna itan uh Amah deihdan a izat uh imohpuakna thupi leh lian petmah ahi; chi in sinsakna hun manphatak in zou hi.
Kisinsakna hun zawh ahih in Upa Chinsum in Wrap-up hon bawl in programme patna a Upa Damsawmthang in hon gen keynote address leh tua ban a sinsakna hon pia Pastor Nenglian leh Pa Vumlunmang in amau adia topic kipiate tungtawn a thumanpha taktak hon sinsak te uh tomkim a genna nei. Tua te ban ah tate etkolna tawh kisai a ana zak leh tuah bangzah hiam te kupbeh na hon nei hi.
Tua khit in mipi’n Pathian phatna in “Toupa aw kon ngen hi…” chih la sakkhawmna kinei a, huai zawh in Pastor Nenglian in mipite Pathian kiang a thumsakna nei hi.
Tua teng zawh in hunkhakna leh Pathian kiang a kipahthu genna thumna Upa Kaithang in nei in Parenting Workshop program manphatak kizou hi.
(Tuni “Workshop on Parenting” program a tel di’a minkhum kop 43 leh single 13 ban ah program a tanneite + BCD sinsaktute/tuanvaite gawm 110 vel lak ah mi 90 lak paikhawm thei in, BCD naupang lasin a paikhawmte tawh sim in bel mi 110 vel pha veve chih thu kiza)
*************************
Recorded by Upa Thiankhanmuan, Secretary, MC
