Thupatna: Ushers/ Stewards i cih Toupa be diing, phat diing, leh Thutak ngaikhe di’a biakinn honzuan mipi te leh Van Pasian kal a ding (palai), naa poimawhtak len khate ahi uh. Usher tanvou, hamphatna leh mawhpuakna tawh tonkhawm ahi i ci thei. EBC By-law in bang gen? “Ushers/ Stewards: Kikhopna a tutna hawmte hi mi poimawh ahi uh. Tutna hawm kia hilou in mite na kipahpih siam, mikhual hong kikhawmte na pahtak leh na kipahpih a, makaih ahi uh. Naa dang mah bangin TOUPA nasepna poimawh ahi hi. Amaute thilpiak dong in pang pah le uh ahoih. Tualsung upa committee te amau lakah akha-akha in kisep le uh ahoih” [A vual nanunga kigelh ei EBCC Delhi te’ practice hi(thei)nailou phot ahi cih thei kawmin cihtak suah ni].
@ Usher/ Steward a pang mi adi’a theituak -
* Mihing muhtheihna ciang, taksa kilatdan a siangthoutak ahih diing;
* Kizepna leng, aman tam/ tawm thu hilou in, siangthou leh mam ahih diing;
* Nuihmai leh pilvang giugiuau banah, khaw-hei a cingkam leh zaidam ahih diing;
* A’ma(Kiginni) zan apan nasep lawhcinna dia panlaka zan sawtlua tut/pawt hihlouh diing.
A. Ushering a pangmi kihekzia diing:
1 Mipi tunma, kikhop pat hunma minit 30 bek a biakinn tun diing [leh biakna program zawh ci’a mipi kikhawmte paitheng tan ngaak/ om tuantual zek lai diing];
2 Biakinn tun ci’a Ushers badge laak diing, TOUPA ma a kilatkhiakna (thumkhawmna) hun zat ngeingei diing [leh badge pen kikhen kuan, kipahthu-genkhawmna neih nawn matan awhsuak/ awhdet diing];
3 Thugentu dawn diing tui, leh projector vante pastor quarter apan tuahsuk a akoihna diing mun lianlian a koihfel diing;
4 Huihmuhna (ceiling fan)te dinmun et diing, (mipi kikhawm tamsim di’a alat leh)sound box, innkong ah khat koihkhe ngal - on theihmai di’a mansa a koih diing;
5 Tanmun hawmna [mi 6 di’a hisap] - Biakinn sung, a malam pulpit naih (veilam & taklam ah) mi khat tuak; kongkhak bul ah khattuak, huan, balcony leh biakinn kim-le-kiang enzui deuh di’n mi 1 hiam 2 hiam.
B. Sep diing naa leh sepdan diing:
1 Usher pihte omlou omleh, tuate lungnoplouhpih mailou a, amau omlou a leng nasep kilawm theipen a sepkhiak sawm diing. DEW/ Gamchiam a kisuah, program a tannei peuhmahte pulpit or a mavual lam a tu di’a hisap banah, tua di’a lamlah diing;
2 Lawmte hi’n Pasian bedia hong kuante akua-akua hitaleh kuamah lak a lungkimlouh mel latsak louh a, mawhsakna kampau zong zat hetlouh diing (banah, meltheih mimalte mimuh a valatsak tuanlouh diing);
3 Biakna & phatna makai (Pastor/WT) in a dinna mun uh aluah ciang ua kongkhakpi langkhat khaak diing;
4 Biakinn sung (main sanctuary) adim khit ma, biakinn kong (cemented floor) a chair dawh louh himhim diing, main sanctuary dim khit cia’n balcony a tutnate luah dim ahihna di’a panlaak diing, balcony ah mi tu dimta uh maw… cih ci’a plastic chair te thawm neilou theihtawp a (biakinn konga) lep pat diing;
5 Biakna & phatna piitute’n tutna mun a luahkiik ciang ua kongkhak a langnih a khak diing (kalh/ lock bel hisamlou in), balcony a tu mi hongdim na khat omleh kongpi hongnawn dangdanga, chairte lep fitfit diing;
6 I pau theilou paudang zang hong kikhawm omleh, a theihsiam di’a kam1-kam2 bek houpih sawm diing;
7 Thumna nei om peuhmahleh, Vanglian Pasian zahhuaina phawkkawm a kongkhak paw-lam a mi khat va dinkhiak a, “Thumna/ Thumkhawmna a pailel a, thum zawh ciah i lut diing uh aw” cih diing;
8 Tutna a mavual lam zel apan tutdim ahihna theihna di’a panlaak diing. Usher te’ thu sanga mahni thu deihzaw hong kikhawm kha omleh tuate maisak (theisiam) kawma tutna dimlouhna munte ciamteh diing, tua munte a thuzuithei hong kikhawm khate awl-awl a guanlut/ tutsak diing;
9 Sound level, bildawh gige diing - vual nanung a tute adi’n leh balcony or innkong a tute adi’n bang aci a? Ngaih deuh hiam, awldeuh hiam, cianglou hiam ahihleh, sound operator te thuzak/ theihsak pah diing;
10 Thilpiak a biakna, Nipini thawhlawm don khit ci’a (lat diing dang omte tawh, list khia in), a koihna diing pulpit ma a dawhkan-bem a vakoih hiau diing - la kisa ahihleh la bei ngaak kullou. Thilpiak kitawi-khawmte gelhna ‘list/ slip’ pen thawhlawm lantu diing Upa khut a piak hiau diing;
11 2012 apan Nipini teng biakinn kaizah sim zelzel ahi. Biakinnpi leh balcony a tute, banah kongtual a tu omleh, tuate sim (head-count bawl) in biakinn kaizah milip, Local Secretary a piaklut diing.
Sutzopna...2
-:2:-
12 Biakinn sung numeite tutna zawn’ nung a mun-awng, Usher a pangte adia hisap deuh ahi. Banghiam ci’a kikhawm mi honghoih/ hongsah sim leh amau adia mun/tutna hisapa midang tusak in Usherte’n baang zul a ding dipdep kawm in Thu/ La a ngaikhe diing uh. Bangleh-bangleh, mikhat Usher a pang ahihman zen a kal 1 a khatvei khalam ankuang luina om, siimkhalou (chaan) ahihlouh teitei diing ahi.
C. Biakna kikhop tawpkuan leh tawpnung in:
1 La nanung a kisak cia’n, kaangkha a pawtkhia in –
(i) Pastor & ngainatute (mikhualte huamtel in) tut tawldamna diing chair bangzahhiam leh dawhkan, kong-tual cemented floor a na lep diudeu diing ahi.
(ii) Pastor/ Upate/ Mikhual te in kikhawm mipite cibai buuk sawm a kong lam ahonngim ngeingei uh leh, mipi kikhawm pawtpah sawm a dingtou di’a kisate, khut zaak kawma na khouh diing ahi (Esk. “Ana khawl zual di uh, pastor te pawtsak masa di awle…adg.”)
(iii) Zuak diing laibu, cd, adg. tawh hongkuan panpih ngai omleh, tuate zat diing dawhkan (rectangular shape) leh chair tamlou siikkongpi sunglam a na dawhsak diing ahi.
2. Saptuam department tuamtuam tawh kisai lai hawm diing omte, haksatna (mitheihlouh cih bang) om leh, tangtak a akisaipih Secretary piakkiikpah diing ahi – mulou, mu zekai cihte omlouhna di’n.
3 Pastor, a tutpih nuam tualsungmi/ mikhualte banah zuak diing nei sanggamte kianga amaute adi’a chair & dawhkan lepsak I hihdan hilh(brief) diing, remind akul leh polite taka amaute remind lai diing ahi.
4 Pastor, atutpihte leh biakinn sunga tu ‘sumsaite’ dawn diing singpi tray a valaak a piakkim ciat diing ahi.
5 Singpi tawh hawmkhawm diing sang/nektheih omni khua in Ushers 3 leh 4, singpi laakna mun (tea-can kidawhna mun) a na pan diing, naunen leh first-timer te kithuahpihna khut taklam piak sawm diing ahi.
6 Biakinn sung pawtsan sim vekta cih ci’a va-et giaugiau zel diing, naupang dontu omlou maingal law dek a omkha hia, light or fan kulloupi ki-on kha a om hia, leh adg.dg. enzui diing ahi.
7 Khawtual naupangte gate sung leh pua a kivei, kikhawmte nuamlou sakthei di’a lang a om hia, cih etzui a, tua bang omleh feltaka ahihlouh diing uh thilte na hilh a, zaidam tak a hepkhiak zel diing ahi.
D. Lunggulhhuai pawl khat, lungtup in nei le’ng:
1 Mikhual hong kikhawm (kha)te’ min, kipatna saptuam a a’ ahihna uh, huan, Delhi a tunna/ kingakna leh hong zinna san (uh) dot a tua information te biakna kikhop piitu khut a piaklut zel.
2 Kikhawm tawp, singpi kia hawm ni in zong Usher te khat leh nih, singpi laakna mun a duty - panpih ngai (mithak, naupom, leh adg.dg) om thei gige ahihman in.
3 Melthak-mithak hong kikhawm omte laka mi khat-le-nih bek cibai buuk, mahni kipulak kawma ‘hello’ ci-a kitheih-tuahna bawl; banah, Pastor hiam Saptuam makaite khattei mailahna bawl or kimeltheih sak.
4 Caretaker leh Pastor te innkuan’ haksatna/ tuailuaina etzuipih a kithuahpih theihna omleh Nipini (zingkal baihtak hiam, nitaklam deuh cih bang) a kithuahpihna piak zel. Esk. Department nih-le-thum in meeting a kiton a nei, lengla tutpih ngai om – innsung a gamtang diing kidaihlah cih bang thil omthei ahi.
E. Nikhat hun zat zawhna:
1 TOUPA bia a hongpai A’ misiangthoute paitheng simta uh maw cih ci’a vante hep pat diing, h.t. dawhkan/ chair tuahlut, tea-can te caretaker inn ah.
2 Projector tawh kisai leh van koihkiik ngai dang, labu leh zuak thilte a omna mun diing ua koihkiik diing.
3 Biakinn sung leh pua, leh kim-le-kianga hep diing, a.k.l lep fel diing omte zawhsiang vek ahihcia BADGE te tawldam di’a a koihna bawm a koihlut siausiau diing.
4 TOUPA kiang a kipahthu genkhawmna, biakinn sunga neih diing; tua khit, Amah phat leh pahtawi kawm zel a innlum zot siausiau diing.
Thukhupna: Gingloute tamzawkna mun a TOUPA be dia paikhawm sek I hihman un a paw-lam apan zong buaina tung guih thei ahi. Buai theihna gim, a.k.l thawm neukha bang zak om zenzen leh akintheilam a Iron Gate kalh a, Pastor or lawi-upa om khate theihsak pah diing ahi. Kikhop kuankawm/ Kikhop lai/ Kikhop khit phet, Biakinn geizek a kuva, khaini leh singpi zuaknate delh noinoi, siangthou TOUPA bia a kuan thei Hotdam tate thilciin di’n kilawm lou (unethical) hi. Huaiziakin, hiai ciindan deihhuailou, khaamtheih bikbek hikei mahleh, discourage tawntung diing ahi. Aw hongpai un TOUPA bia in kuun ni e…
By- Upa Chinsum
i/c, Ushering
******
