Tukum EBC Khawmpi Lian 76na, Centenary Hall, New Lamka a om ah Dec 7, 2024 in EBCC Delhi a Pastor masa Rev. Paukhanmang Guite leh tu ma deuh a hon kisuankhiaksan Pastor G. Khankham in Meritorious Certificate a na sang uhi. Huailou in Chairman masa Upa G Damsomthang in taksa kum upat 70 a chintaak toh kiton in pahtakna lai a na sang hi.
Pastor Masa Rev Paukhanmang Guite
June 1992 in EBCC Delhi kiphutkhia a, bang tan hiam pastor neilou a om nung in Hq. in pastor masapen ding in Rev. Paukhanmang Guite hon sawl hi. Amah leh a innkuante loplutna nisim 12.02.1995 in kinei a, 07.01.2001 tan saptuam hon kem hi. Tua zoh in Seoul, South Korea a Master of Theology sin in va om hi. Hong kiknawn in GBC leh EBC Hq. ah mohpuakna poimoh leh liantaktak lentou nilouh hi. A tanchin kimzaw hiai [Link] ah.
Pastor Khankham
EBCC Delhi saptuam kem ding in Jan. 2020 in a innkuan un hong tung uhi. Om dek pan chih ding in March kha apan Covid-19 hiipi leng in Delhi hon nuai pan a, hindan ngeina kipumkhek in, nidang a biakkhawmna leh kivehtuah chih bang leng deih bang a hih theihlouh hun hong tung hi. Haksatna, phutkhak ngeilouh gam leh saptuam pumpi in a tuahlai in, thuumna leh hunlemtang om bangbang ah taksa a kalsuan in saptuamte hon kem a, Jan 2023 kum in kisuankhe nawn hi. A tanchin kimzaw hiai [Link] ah.
Chairman Masa Upa G Damsomthang
EBCC Delhi saptuam a chairman masapen ahih ban ah kum 2002 a Upa thaunilhna tang ding a telching in om hi. Ama’n Delhi a omsung in saptuam ah mohpuakna poimoh taktak a na len den hi. Chairman masapen hihna tel in kum 8 sung bang chairman hihna a na len hi. Tua kia hilou in, Vice Chairman in kum 7, Secretary in kum 1, Finance Secretary in kum 3, Treasurer in kum 3 a na pang ahih man in Office Bearer a letkhak sung leng kum 22 pha zou hi.
Armed Forces Hq. ah Joint Director dia dopsang a om nung in Director dinmun a tutsak in om a, huai dinmun apan in 2017 Feb. in khawlta hi. 2020 kum in Delhi paisanta in tu in EBCC Pethuel ah khosa lel hi.
I Pastor deihtakte’n Delhi saptuam a kep ding bang ua kem khin a, lam chi tuamtuam a hon kalsuanpih khit nung un, mundang ah kizatna neizom lai uh a, tuate nangawn zou theita a, taksa damna toh pahtakna lai sang thei tan a Pathian’ ompihna a tan man un saptuam in kipahpih mahmah hi.
