SINSAKTU’ KHALAM HINKHUA
By- Pastor V Nenglian for BCD Heutu Orientation 2012 (January 08, 2012, at EBC Church Delhi)
Naupang kepna nasep poimoh tak, Sunday School a Sinsaktu hihna nna, tungtawn a Toupa Pathian in siamna leh hihtheihna (gifts and talents) a hon piakte zangkhe thei dinga hamphatna tangte- EBCC Delhi a Naupang heutute tengteng, noute ziaka I biak Pathian kianga kipahthu gen in, zahna sangtak ka hon pia hi.
Naupang kepna leh sinsakna nasep tuni-a kipan thak nawn ta I hih uh toh ki tonin lamzangtak leh gahsuanga hiai nna I sep theihna dinga poimoh mahmah Sinsaktu’ Khalam Hinkhua chih toh kisai saulou chikin hiai a nuai a thulu te zangin gen leng I chi hi-
1. Thumna hinkhua- Lohchingtaka sinsakna piak ahih theihna dingin thumna toh kisak-kholhna neih ngeingei ding ahi. Hiai dingin-
- Sinsaktheihna Kha (teachable Spirit) nget ding ahi. Khasiangthou (Pathian thu’) sinsak theih ihih masak kiphamoh hi. Huai omdan bel, I sinlai sinsak ding in eimah hinkhua ah gen nei masa dinga Pathian Kha panpihna nget ding, chihna ahi. Ps. 119:18- Na dan thu akipan thillamdang ka muh theihna dingin, ka mitte hon hih vaksak in.
- Khasiangthou’ nasepna nget ding ahi. Sinlai in sinsaktu’ hinna a thu a gen khit chiangin Khasiangthou in sinsaktu zanga tua thutak naupangte kianga sinsak dinga thum ding ahi. Jn. 16:13- himahleh, amah thutak kha a hongtun chiangin, thutak tengeng ah nou a honpi ding: Pau. 3:5-6
- Sintute, amin uh gen-a, naktaka thumsak ding ahi.
2. Pathian’ nasep lamdang chiansa hinkhua- sinsaktu tuh piangthak mi mai hilou in, mahni hinkhua mahmah a Pathian’ nasep lamdangte chiansa ahih ding ahi. Hotdamna kitheitelna kichiantak neisa leh Pathian’ Kha pii hinkhua zang gige mi ahih ding ahi. Tua dingin Pathian’ thutak toh a ki khen ngei hetlouh uh kiphamoh hi.
3. Pathian’ adia kizang ut gige leh Ama nna a ginom hinkhua- sinsaktu lohching hihna dingin, thil dangteng sangin, Pathian adia kizat utna lungsim-put neih gige leh mahni nna a ginom mi hih kiphamoh hi. Pathian’ hon sapna ah ginom mahmah ding ahi, Aman mi ginomte kia manphatak a zang ahihman in. Pathian in lohching dinga hon sam hi masa lou in Amah adia ginom taka kizang dinga hon sam ahih chih mangngiloh hetlouh ding ahi. Jesu Khris nungzuihna ah leh mahni nna ah ginom taka hinkhua zang mite tuh Toupa’n manpha tak in zang jel hi. Lk. 9:23-kuapeuh in hon zuih ut leh amah kingaihsak lou in, niteng a khros puin hon jui hen.
4. Pathian’ thuchiam a kinga hinkhua- Bible a kigente gingta, Pathian’ thuchiam gingta- a tua a kinga hinkhua nei sinsaktu tuh sinsaktu lohching ahi nuam mahmah hi.Eph. 6:1-3
Itna toh kuhkaltaka, mahni hihtheihna teng kisuka, panla gige sinsaktu hi thei chiat dingin Toupa’n na vek un hon ompih in hon makaih chiat hen. Lohchinna Toupa Pathian khut a om ahihdan phawk khawm in eimah a hihtheihna piak a omte manphatak zang chiat dingin hamchiam ni, Toupa thupha.
