Gen 3:17 - nang ziakin leitung ka hamsiatta.
Tel! khosik, dengue, malaria, mitna, etc. aleng mahmah, eilawi mahmah in le nak thuak lua. News paper dt. 17.9.10 a i muh dan in, Delhi ah tutung dengue vei mi 1512 om a, 2 in sihna tuak, chi. Hiaite, Private Hospital tellou hi lai maithei hi. Huai lou kal ale, i natna di khop bei tuanlou. Tulai zaw, Hospital a ki-admit ding a om kei chih, chikmah a kiza lou. Huai sangsika, seat kimu zou lou chih, kiza tam zaw. Akhente, i satung, gil, lu, pang, etc. mawk natnat, akhente’n lah a thuakkhop uh natna neih-a-neih det thoh zomah. Akhen, pianken a natna nei, mitdel, nangong, elbai, etc. Akhen lah, ka hiaitak, hi ngeingui hive o, chih bang, ka hiaisan in honkal/chip zotzot hive aw, aikeh, Ka ha/hani mahmah, chia gen ding khop nei ngen. Natna in i sunglam khawng a hon kheuhkheuh hipeuhmah. Accident, kidou, kinak ziak a thiltung lah tam. Natna, igen seng kei ding, Aw, khovel!Unaute, hichituka thuakhak hiai natnate koi a hong kipan ahi tel ding uh?
Khatvei, sms in, si dia bawl i hikei, chih ka mu kha. Atung a zaw, damlou ding leh si ding lel a bawl hilou hi ve hang aw. Tangtawn Toupa’n, Adam kiangah, "nang ziakin leitung ka hamsiatta", achi. Hiai geih eive, numei nauvei natna hong puang a, loulingneite hong om in, khoul luanglou a nekmuhna hong om taak louh kha x (into) haksat x haksat = khelhna ziak a beidotna a hong omta hi. Hiait natna tengteng, khelhna ziaka, leitung hamsiat a aomna khonung gu ahi. Huaiziakin, china a om kia hilou in, sithei zomahte i hong hita.
Hamsiatna lakkik theihlouh adiam? chiin, Pathian i mohsa maithei. I biak Pathian zaw, ei bang a, khut lumleh bang Pathian ahita kei a, Thutak, siangthou leh dik, athuchiam, avaihawm pel ngeilou, zaan leh tuni leh tangtawn a dang ngeilou ana hi ei. I Bible, Old Testament lam i et leh, natna khenkhat
(i) Pathian sawl aom (Deu 28:59-61, 32:39, 2 Sam 12:15, Act 12:23).
(ii) Akhen chian Setan phalna piakin aom (Job2:6-7).
(iii) Khelh gawtna dia zat aom (Lev 26:14-16, Chr 21:12-15, 1 Cor 11:30).
(iv) A khial gamte vaihawmna dia zat le aom (Eze 14:19-21).
(v) Dam dia achiam leng aom (Exo 23:25, 2 King 20:5).
(vi) A damsak le om (Deu 32:39, Psa 103:3, Isa 38:5).
(vii) A khamuan leh a hatsak le om (Psa 41:3).
(viii) A thumna azak le om (Psa 30:2, 107:18-20).
(ix) Amite a human a zat le aom (Psa 91:3-7).
(x) Giloute tawpsanna in le azang (Jer 34:17).
(xi) Gilou sawina in a zang (Jer 29:18, Isa 38:9).
(xii) hihdamna a itna alatsakna le aom (Isa 38:17).
(xiii) Mikhial tung a ahehpih siamdan lahna in azang (Job 33:19-24, Psa 107:17-21).
(xiv) Amisiangthou etkhiakna din azang (Job 2:5-6).
(This para is extracted from NIV Life application study Bible).
Pathian ziak le ahivek kei. Khovel Lal Setan leng ahi thei lua. Himahleh, Pathian thu awi diktak, a hinna Pathian in alak ding a phal kei (Job 2:5-6). Huan, ei leh ei kibawl a china leng i om. Eg. Khamtheih hihte a sih hun lou in a si uh. Nu le Pa thuman louh ziaka china leng i om (Eph 6:1-3). Eg. Neulaiin, Truck a tuan di hon phalkei ua, Singat lam a, atungvum a huihhat lakpi a, ka vatuan uleh, ombing, hitangkhosik in sawtpi ka dam kei. Bangteng hileh, unaute, i dam thei lai hi:
Mat 4:23-24 - Natna chiteng Jesu’n a hihdam thei chih i mu, salam natna kia hilou in, khalam natna ah leng. Khelhna ahihkeileh haksatna amah adia lian leh haksa a om kei.
Mat 8:2,3 - Phak, tulai dia AIDS bang a natna lauhuai ahi. Aziaktuh, adam chih kitheilou ahi. Kilohtheih natna leng ahi. Mi’n avei leh siampu in phak ahi chih puanna nei in, inn leh khopi sung apan a nohkhia uhi. A hoih zawk, ahihkeileh asih matan phak dangte toh omkhawm uhi. Phak in Jesu kianga damna angen zomah a, avun natna a dim himahleh, Jesu’n akhut in len hi.
Khelhna leng natna damthei lou khat i vek ua i neih uh ahi. Jesu Christ hihdamna khut kia in lamdangtakin a lamang thei a, hinna thak ah a hon koih thei hi. Himahleh, amasa pen a i theih ngeingei ding tuh, phak natna mah bang a, ei leh ei kihihdam thei lou ihi a Jesu hotdamna a huhna i nget ding ahi.
Mat 8:16,17 - Khatvei chauh khoih in, Jesu’n natna a hihdam (8:3,15) thu khat kia agen in, kha gilou in a omna mun a taisan (8:16). Jesu’n dawi thilhihtheihnate leh khovel natnate tungah thuneihna anei. Huan, khelhna tungah leng vualzou thuneihna leh hatna anei hi. Natna leh gilou hiai khovel pukta khonunggu himahleh, tunung a, Pathian in khelhna tengteng alakmang chiangin, natna leh sihna a om nawn kei dia. Jesu hihdamna lamdangtakte khovel pumpi in a cheplawkna ahi chih Pathian lalgam ah hon theichian ding uhi.
Mar 5:25-34 - Numei sipawt damthei lou, doctor tampite kiensak a, aneih teng a sen nung in Jesu azuan. Numei ngeina ahihkeileh, suul natna ahi maithei, hiai in ngeina dan a sianglou asuah a (Lev 15:25-27), tangpi lak apan a tuam omsak hi. Beidongtakin, hihdamna a deih a, himahleh Judate dan dungzuiin, vakhoih leh Jesu su-nin ding ahi chih athei hi. Akhen chiangin, haksatnaten Pathian apan hon tuamkhen in i phawk ua, himahleh, amah ei hon panpih dia man gige ahi, i haksatnate ahitheilou ding bangin lang mahleh a poi kei. I lauhna, Jesu manoh ngamlouhna a zat i phal louh ding ahi.
Ahihleh, mi khenkhatte china a, khenkhatte na lou? Khenkhatte dam a khenkhatte damzou lou? Leitung ah i tuplouh dandan in i om a, ahihziakin, i duhthusam dan chiatin om lengle segai dimdem dite ihi. Pathian in thiltup anei hi, en bel i thei ban kei (Isa 55:9 - Lei sanga vante a saanzawk bang in, na lampite sanga ka lampite sangzaw a, ka ngaituahte zong na ngaihtuahte sanga zangzaw hi, chi hi). Aman atupna a azat dia hon bawl ahi. Leibel na bawl a, khat tuivot koihna din na zang a, adang pen vokvul mi na hihman in, vok-an koihna din na zang hi. Apoimoh tuaktuak uh. Khat pen et a kilawm zaw a zat himahleh, adang pen amah mun ah poimoh mahmah zel hi. Leibel in non zatna ka lungkim kei le achi thei vual kei hi. Nang azatna ding omsa a na bawl ahihziakin. Pathian honzatna i thei ban kei a, ina kihaza zomah sek hi.
Leitung ah mi damthei, milian, mihat, misiam leh pilte thupi pen isa sek. A thupina uh bel a om hi. Pathian in, a thiltup nei a abawl ahi ngei ding. I neulai in, lianpi pha in, kihatmahmah leh i ut diak. Goliath a lian mahmah a, Israelte’n a lau mahmah uh. Pharo lungtang a taak mahmah a, powerful mahmah. Hiaite khawng hilou hia, tulai a i ngaihsang le hi ut. Power hilou hia i deih pen leh aneite i en mahmah. Hiaite hamphathuai pen ahi kei. Amaute’n ahatna uh a suang ua, khalam hinna aneikei ua, Pathian adin bangmah lou ahi uh. Hat utna, pil ut luatna, kisaktheihna Pathian in a hua. Kingainiamte hehpihna a pe zel. I ut tata, ahoih lou ana hinak le zaw, buaihuaitak ahi. Unau hiai leitung hinkhua, a omden ding tangtawn hinkhua dan in ngaihtuah kha hetken, salam hinkhua sangin, khalam hinkhua a poimoh zaw gige, chih thei in.
Athuchiam pel ngei lou Pathian in, hamsia a lakik kei a, huai sangin, i haksatna, natna leh sihna tanpha a i suahtak theihna ding a, a itna ziakin, lampi khat honna sialsak i Toupa Jesu Khris i nei hi, Sala!
Aleh, na damlouh chia’n bang na loh dia le? Amuanhuai mahmah, lawm khat na nei, huai tuh i Toupa Jesu Khris ahi. Amah kianga gen in, avekin kemsak in. Ginna leh muanna toh amah tung ah nga in, aman ei adia hoih zaw athei hi. Paul in, Kei di’n hin Khris ahi a, sih leng punna ahi, chi hi. Pumpi a ka omlai noute adi’n apoimoh zaw, achi a, alangkhat ah, Khris toh omkhawm ding ka lunggulh hi. . . nakpitakin kei adi’n ahoih zaw hi, achi lai hi. Paul in, sih leh hin khatpeuh poisa lou hi. Bangkim Toupa khutah nga zaw hi. Nang muhna a hoihlou zaw a lang le Amah ngaih a hoih zaw ahi thei hi. Amah kiangah kikemsak leng, a man aut leh hon damask dinga, aut leh i natna leng manpha zaw in hon bawlsak thei ahi. I hoihna dingin bangkim hon hihsak zel zaw hi (Rom 8:28).
“Jesu a lawmhoih i neihdan,
I gitlouh dahna poding;
Hamphathuai mahmah i hilh thei,
Bangteng Toupa kiang thumna’n ”
