I hinkhua ah haksatna leh beidotna hun i tuak chiat uhi. Mihing a piang kuapeuh in hiai bang thilte ana tuak kha chiat diing in leng gintakhuai hi. Hiaibang hun in lungkia in, damsung zat ngaplou, hin chimtaakna tanpha tuah theih ahi. Khenkhat lah lungliap leh mahni kihehpih in mibanglou kisakna toh nguai leh dahtak in hunte i na zang zel uhi. Himahleh, Pathian nei leh Amah a muanna nga mite bel haksatna bangteng tuakmahle uh khamuang leh lungkim/kipak in hinkhua zangthei zel uhi. Amaute’n haksatna alet semsem chiang in Pathian naihzaw deuhdeuh uhi. Tuabang mite midang lungkia leh thawmhaute adia panpihtu ana hi gige uhi. Laisiangthou a i muhte hiaibang haksatna leh lungkhamna chiteng ana thuak a, Pathian ana bel gige mite tanchin tamlou i sut diing uh.
- David haksatna (Samuel I & II): Goliath a zoh a pahtawina a tan ziak in Kumpipa Saul in a haza (18:8), Kumpi dia thaunilh himahleh ahun tamzaw Saul ziak in a hinna humbitna diing in gamlak ah/kokhuk ah kibu in a zangden hi (22-23). Azi leh tate leh kho mipite melmate’n gallak in ala ua, lungzing takmai in a om (30:4-8). Uria zi’ tung a a tatkhelh ziak in lungkhamna in a dim hi (II Sam 12:1-25, Sam 51). Amah tapa mahmah Absolom ama tung ah a hel (II Sam 15). Jerusalem apan lau in a taikhia a, khevuak in Oliv taang ah a paitou a, apai kawmkawm in alu puan a khuh in a kap..(15:30). Israel mipite a sim (census) ziak in Pathian a tung ah a lungkim kei a, David tung ah gawtna a tung (15:30). David hinkhua i etchiang in lungkhamna leh haksatna in a dim hi. “Damsung lungkhamna leh haksatnate ziak a kipahna/phatnala sa theilou diing mi a om leh David ahi ngei diing” a kichi hial hi. Himahleh, David in eite a diing in phatna la 150 (Sam laibu) gelhsa hon na koihsak hi. Hiaite tuni tan dong a hon khamuan leh hon kipaksakte ahi uhi.
Ahihleh, David in hiaibang haksatna leh lungkhamnate tung a a vualzohna thuguk bang ahi dia? Aman hichiin ana gelh hi. “Toupa kiang ah thilkhat ka ngen a, huai mahmah ka zong diing; Toupa kilawmdan mu diing leh a Biakin a thu dong diing in, ka damsung teng a Toupa inn a ka om gige theihna diing in” (Sam 27:4).
- David in khovelmi leh khovel thil a lametna koihlou in Pathian ah lametna ana neizaw hi. Alehlam ah eite’n bel mihing leh khovel lam ah lametna i nga khazaw naknak uhi. I hinna leh thil bangkim Pathian thu ahihdan i muhchian uh a poimoh mahmah hi. “Purpose driven Life” laibu ah Pathian in nang Amah adia hon siam ahi chiin gelh hi. Khristian thukizakna 2004 January Issue editorial ah Rev Luaichinthang in “ei Pathian na sem dia kumthak mu a na lamlaite’n” a chih in genkha ka sa mahmah hi.
- A nihna ah, David in a thilnget huaimah tuh muh tum in a zong hi. Eite, i thilngette bang leng muh tuam taktak a i nget a diam, tuni a i ngette zingchiang a manggilh zel maimah i hihkhak diing lauhhuai hi.
- A thumna ah, David thilnget tuh Pathian kilawmna/hoihna, thupina leh thilhihtheihnate mu a, theihsiam diing ahi hi. James Branon in Daily Bread a athugelh khat thupi mahmah ka sa hi. Aman a genna ah “biakna kikhop ah mipi’n phatnala -Itna lamdang a min ngaih e,..tuamun nuam ah nibang taang ah kum sangsawm i vei chian...- chih honsa ua, a chang tawpna sa theilou in ka muit ah khitui a hongluang a, ka tanu Melisa, kum 16 lel in accident a hon sihsan nung tua vangam ah kei hon na ngak ahi chih hon phawksak a kipahna toh la leng sa theilou in ka om mai” a chi hi.
- Joseph Haksatnate (Genesis 37-45): Joseph in mang a nei a tuakziak in a sanggamte’ huat in a om (37:5). A sanggamte’n thah a paihmang a sawm uh (37:19-20). A puanakte a suahsak ua, kokhuk tui omlouhna ah a khia uh (37:23-24). Ismail khualzin mite kiang ah dangka 20 in khot in a om hi (37:28). Egypt ah suangkulh mialtak sung a khum in a om (39:19). Suangkulh apan pawtkhiak theihna diing in kumpipa greptui petu kiang ah a ngen, himahleh tua pa’n suangkulh a a pawtkhiak nung in a mangngilh maimah hi (40:14; 41:9).
Joseph in hiaibang haksatnate apan bangchidan a suahtakna mu ahia? Joseph tangthu a lungmuan huai leh thupipen tuh, ‘Toupa kha tuh Joseph kiang ah a om a’ chih thumal ahi. A thupi mahmah tuh Joseph in a thil etdan (perception) ahi. Amah zuakmang a ute kimohsa a kisellai un, Joseph in ‘Pathian in kial leh haksatnate apan a a hon humbitna dia a hon sawl ahi’ (45:5) a chi thei hi. Ei lawi hileng bang i gen taphet diam aw! - Hanna (Elkan zi) haksatnate (I Samuel 1:1-10): Pianken a mibatlouhna nei (nau neitheilou) ahi (1:2). A pasal Elkan zi nihna (Benina) in tate a nei, Hanna a enghou nak hi. Hiai lungkhamna ziak in a kapkap a, ann leng a nekei hi (1:7). Pathian mai a a thumlai nasan in zukham hidia muanmoh in a om (1:15). Hanna in a haksatnate toh Pathian a buan a, Toupa mai ah a lungsim/lunggimna a sungkhia hi. Pathian in a thumna a za a vualzawlna tapa Samuel a nei hi. Hanna bang a pianken haksatna nei i hih in leng Amah kiang zuan lehang i lungkham leh mangbatnate Pathian a i kipahna tuntu a hong hithei hi.
- Hiaite banah, Phaknatna neite (phak natna toh kisai Leviticus 13:45-46) mi sawmte Jesu kiang ah hongpai ua, damna a ngah uhi (Luka 17:12-14, Mathai 8:3). Jesu’n “He, ka ut hi” chi’n a khut in a lawng a ahihdam maimah hi. Mite mai a zumhuai a, kuamah in hon phawkpihlouh lai in leng i lungsim a Amah Pathian a lametna leh muanna i neih leh hon hihdam, hon khamuan diing leh vualzawl diing in i kiang nai ah, hon sawkpha diing in a om gige hi. Lungmuanhuai hi.
