I gama gospel ahonglutna kum zakhat achingta hi. Akhang in gen leng khristian khang nihna ah i om hi. Khristianna khang thumna bang achi dia chih tulaitaka inkuan kikepdan apan galmuh theih hi. Pathian in nidanglai apan in poimoh asakte khotang a puangsak mai louin insung ah tate kiang a gen dingin na sawl zaw hi. Tulaiin khotang ah i pan ua, Pathian in inkuan ah napan hi. Tumlam gamte khristianna toh kisaia aniamkiak dan uh i gen sek uhi. Himahleh, amaubel gospel kum zali/zanga ana kem ta uhi. Sapte Pathian thu awidan etton huai mah mah khat om hi. Avek sip sip un zaw ahikei dinga himahleh, akiza sek tuh, Pastor in atate Pastor ding a sekkhia, missionary in atate missionary utsak, Upa in atate Upa hiam missionary dia utsak chihte a testimony te uapan kizasek khat ahi.
Eilawi inkuan kikep dan leh Pathian nna i sep dan kivel thak kul om hi. Pastor insung mite’n Pastor nasep khamthoh demdum maimah uhia, saptuam upate inkuante leh a taten Upa hih ngaihnep loh maimah uh adiam. Kum tamtak apaita a, Pastor khat in a testimony agen ka theigige a hichiin agen hi; “Ka pa Pastor ahi a, ka neulai un ka genthei mah mah ua, ka lung sim in ka let chiangin Pastor in ka pang hetkei ding, ka chi” achi hi. Gospel honglutna kum zakhat i chih hangin EBC kichi kum sawmguk leh thum khawng hipan ahi. Himahleh, tuailai camp khawng ah itaten Bible minte Thukhun Lui leh Thukhun Thak nasan theikak lou adim in omta uhi. Nu leh pate kivelthak nading om hi.
1. I Awlmoh (priority): Insung sang a apolam awlmoh zaw i hi hia? I awlmoh lam lam thupi bawl zaw ding i hi.
2. Insung Kikhem Theilou: Midang na khem zou kha thei, na tate na khem zou kei ding. Thupi ahonsak uleh nahihdan azui ding ua, thulim ahonsak kei uleh nahihlouhdan in ahih mai ding uh.
3. Na Ngaihpoimoh Pen: Na ngaih poimoh pen na tate’n thupipen in akoih ding uh. Khamtheih hihlou, amau kivak thei chih tan natupsak ahihleh awilou nu leh pa tup toh kilamdangpilou nahiding. Pathian nasep ding gengen ngal a, i tate’n full time hise kei taleh ahihtheih bang ua Pathian nasep ding nasan alunglut het kei uleh khovel a thil akuazopen hiam diklou a om chihna ahi.
4. Chetna: Missionary lunglut mi khat in hiai dotna thugentupa kiang ah dong hi; “Pathian nasep ka lunglut a himahleh ka nu leh ka pa teek ka kep angai a, kuankhiak ding haksatna ka nei, bang ka loh dia?”chiin a dong a, thugentupa’n “Central Service khat ah sepna mu inla mundang a sem dingin sapna mu lechin tua na dotna na dong diam” achih leh a daidide hi.
5. Tate Thuhilhna: Tate pen ei bawltheih ahikei chih i thei chiat hi. Himahleh asun azan a i genpih uh IIT, NDA, Doctor, Engineer, Civil Service khawng ahi. Hiaite ahoih lua ngen mah ahi. Himahleh, hiaite ah hong lohching vek le uh nang alohching khin na kichi diam? Pathian leh Ama’ nasepna in na hinna leh na tate hinna ah bang mun aluah a?
6. Nu leh Pa Kawkmuhna: I taten alet chiang ua bang ka sem dia chih a kizontawm sang un nu leh pate’n thumna toh lamkaih thei ding a, tutlai bang, lampi a pailai bang, luplai bang, thoh chiang bang a phatuam ngaitaka sinsak jel kisam hi.
Thukhitna: Siding lupna a na lup chianga, lungsim chiimtak toh kingaihtuah thei ding hile chin ka kisik hetkei na chih ding hinkhua ah na hing kha hia? Na sihkuan lupna tung ah na tate bang sem in nuselechin na lungkim pen dia? Tua ahi na hinkhua a na ngaihpoimoh (core value) pen. I tate adia i gou nutsiat thupi pen Pathian leh a nasepna ahihkei mawk leh khangthakte’n goudang luahsawn ding uh chihna ahi.
