INN LATNA TOH KISAI ( Based on Personal Experience)
By- David Nengsonlian
Finance Secy BYF
Sepna ziak a Delhi a ka hong kisuan in ka lawm hoih mahmah Christy ( Tua Nu Christy w/o Lalboi Khuptong Dwarka) in inn luahding khat honna muhsak hi. Ka luahdek tak in ama’n “ Latna neilou ding maw?” hon chi hi. Huai hunlai in ka ngaihtuahna ah mahni inn leng hilou ,mi I luah , latding dan in ka koih kei a, “lan mawk lou e” ka chi liuliau lel hi. Ban ah mi inn luah landing a Pastor hiam , Upate hiam va sapding zumna in ka ngai hi.
Inn ka hon luahtou ta ngei a, Delhi natna viral fever ka hon vei a, kal khat lupna ngak in ka hong lum dildel ta hi. Ka nau in zong viral hon veitou in ka nih un lupna ngak in ka om heelhuul uhi. Ka nau in AIIMS a interview ni ding bang in hohzou vual di hilou in bathroom ah law ziahziah mai hi. Hichibang a interview theilou a om pen ka Pa Khup ( N T Khankhup of Gurgaon) in hon awlmoh lua in sai theih dan omlou ding hia chih hon dong sek hi. I damlouh leh lungbuai hun Pathian mah kimitsuan chiat hive’n , ken zong ka nau interview theihlouh poisa mahleng Pathian in lem a sa naikei ahi, just wait upon the Lord chi'n ka na dawng hi.
Hucin hun hong paitou zel in damlouhna in hon maingal sim khat hita hia, jaundice natna in kha khat ka lum a, hospital bang ah ka lut hi. Damna neih hamphat huaidan, damna I chih hauhna ahihdan ka muchian sem hi.Hicibang damlouhna ka tuah pen ka ngaihsut chiang in ka tenna inn diklou deuh a diam chihkhawng ka zeldim thubawl theimawk hi.
Nikhat Pastor Khamkhanchin Ngaihte leh a innkuante ka innkong te inn a hoh hong bang kha ua, ka nau toh lemchang sa in ka damtheih louhdan ka gen ua , thumna hon neihsak ding ka ngiat uhi. Pastor pa’n hoihtak in thumna hon neihsak ngut a, ka lung uh leng a muang mahmah hi.
Hun hong paitou zel in ka nau AIIMS a interview theilou pen Pathian in chance dang hon penawn a, tu’n interview kia hilou in huaimun ah sem in omta hi. Isai 40: 31 a kigelh bang in Toupa muanna neih in hatna thak hon pia a, tan ding kilawmte hon tangsak hi. Pastorpa hon thumsakni a pan tuni tan Van Pasian hehpihna ka dongtou lai ua, damlouhna thupi gending ka tuaknai kei uh chih Pathian min thupina ding ka gen ahi
Ka ngaihsut kikciang in ka innluah dek hun in lawmte’n deihsakna thu hon gen uh mang in Pastorpa hiam, Bial Upa hiam ana samkha leng, thilthuah ka pumpelh theih ding om kha diam!
“Amah it tute, ama’n a tup bang a sapte a ding in;Pathian in thil bangkim ah a hoihna ding un asem chi I thei hi” Romte 8:31
