EBCC CENTRAL DELHI AH MANPHATAKIN GOOD FRIDAY KIZANG
- L/Upa S. Thuambiaklian
Kris nungzui te adia ni poimawh, khawvel pumpi banah India sorkar inleng ahon theihpih Good Friday, 22 April 2011, EBCC Central Delhi biakna mun Gange Sr. Sec. School’ Auditorium, Rajniwas Marg ah leng zat in om hi. Ni poimoh ahih dungzui in, ahun-leh-ani zatdan ah leng chiamtehtham ompah hi:
1. Pathianni tenga a nitaklam dak khat (1 PM) a EBCC Central Delhi biakna programme kipansek hinapi, tutung Good Friday pen remchang takin nitaklam dak nih-leh-akim (2:30 PM) a zatpat theihdin lampi hong om mawk hi. Banah, programme pen kaihsaau khak ahih zenzen lehleng, dahhuai hetlou, EBCC te kikhop zawha kikhawm sek ten hiai ni programme hiai mun ah ana bawlkhalou chitchiat ua, tawldam huai hiveh aw.
2. EBCC Central Delhi a kiphuh khiaknung Good Friday zat masakpen ahihmanin, lungsim ah ngaihtuahna tampi hon piangsak hi. Pathian in ahoihna ahonvuk, lamzanna tawh honpi toujel ahihdan kilang mahmah mai.
3. Local Saptuam naupangchik leh member tamlou kisakna aki neihlai in, Pathian pina ziak mah in, Good Friday ni kaankaan a EBCC Central Delhi a Pathian bedia hong paikhawm atamlam ki mukha nailou hi. Ngaihtuahna tampi hon piangsak hi… Bangziaka hundang a mi hiaizah kikhawmkhawm lou ihi uh hiam ?? Biakziaka Good Friday ni a saptuam mipite ki hichi tam mawk hiam ?? Aziak tampi omkha ding. Ani mahmah inleng hon pawkhia himaithei. Ahihkeileh, saptuam mipite hotdamna lunggulh a abiakinn huangsung a tailut leng ihi maithei. I biak Pathian in Amite poimawh thei hiven maw.
“Nang maha na mite akipahthei nading un…..
Na hon hihhalh nawnkei dia hia, Toupa aw…….”
Amen..
BYF te makaih in Pathian phatkhawmna hunnuam takmai akinei a, lengkhawmna programme atuam akineih louhdek ziakmah adiam, hiai phatkhawmna hun manpha takin in kizang mawk hi. Good Friday thawhlawmte Upa Tualzapau in Pathian kianga piakkhikana honnei hi. Lapiten thumkhawmna tan honpi in, huaizawh in special nos. BCD leh BYF ten siamtak mai in hon present uhi. Naupangte special nos. in naupang heutute kipiak zawhdan hon sulang mahmah mai. Tuailaite lah, bangchik kara ana hichi siamtel lawmlawm ahi ua hon chisak mahmah. BCD leh BYF te item ten, Good Friday programme hon su piching sak mahmah hi.
Pathian thutak siangthou Local Pastor Nenglian apatin ngaihkhiak in om hi. Aman, Toupa Jesu Kris, kros tunga khai kanga a om laia, Jesu Kris paukam te zangin, message hoihtak mai hon gen hi. Hiai huna Jesu Kris paukam poimoh mahmah nih zangin, saulou genna nei. Hiai nihte ahih leh –
1. “Pa, amau ngaidam in; a thihih uh athei kei ua ahi”
2. “Pa, na khut ah ka kha kon keemsak hi”
Pastor in hiai tunga pansana thu manpha taktak hon gen in thil tampi hon ngaihtuah sak hi. Khovel a niteng khohei na ah, pawlam a seppih leh lawmte tawh kikar ah, insung ah hitaleh, ngaihdamna bawm lianpi neihngai ahihdan hon sinsak mahmah. A tamtheipen ngaihdam ding hileh atamtheipen ngaihdamna kidong ding hi. Banah, niteng a Kristian hinkhua a kalsuanna ah, eimah kifelsakna leh kimuanna a kinga ding ihilouhdan, I biak Pathian kianga I omdan ding (plan) leh I chetdan, Ama kianga kepsak ding kul ahihdan hon musak hi.
Pastor in hun sawtlou hon zatzawh nungin, Ankuang siangthou sawkkhawmna kinei hi. EBCC Central Delhi a saptuam upa nihte stage ah anading ua, mipiten stage lam awl-awl in kizuan hi…
Hichi maimah hi’ng suanding bei
Hizong keidin na sisan pawt
Nang kei nakiang ah non sama
Pathian belamnou aw, kon zuan…..
Tua zawh in, phatna la khat mipiten akisak khawm khitin, Upa Jamkhothang in vualzawlna tawh Good Friday Programme khak hi. Tua zawh in biakinn kongah, L/Upa Thangzalun & family te buatsaih, singpi leh samosa in kitai hi.
Pathian ompihna tangin, Good Friday programme manphatakin kizang a, hiai in Easter Sunday programme zatkar hon ngaklah sak mahmah hi.
