THOHNAWN NI MANPHA
By- Upa Tualzapau
Toupa ompihna tangin, EBCC, Central Delhi, kum khat a chin ni ahih toh kiton in, Easter Sunday tuni 24.4.11 in Gange Sr. Sec. School’ hall, Rajniwas Marg ah milip 180 vel in, kipak leh lungluttakin biakna hun a kineihna ah, Conductor – L. Secy. Khamkhansuan; Thilpiakte latna – L. Chairman Upa Jamkhothang; Thugenna - L. Pastor Nenglian in nei a, Vualzawlna – V. Chairman Upa Tualzapau in nei hi. Biakna hun zoh in, Fin. Secy. Sawm-a-khat Thuambiaklian & family in honsaisak, cake leh singpi limtak leng kine in, kidawn khawm liailiai a, houlimna hun hoihtak suak hi.
Pastor in, 1 Cor. 15:12-19 pansan in, paikhawmte thutak in vak hi. Aman agenna ah, i Bible a thohnawnna kigen, a theory lel hilou in, mit ngei a mute’ gelh ahihdan leh mit ngei a mukha lou a gelh kha sun in leng (Luke), hoihtaka chian masa a agelh ahihdan taklang a, thoh nawnna in i ginna buchingsak ahih thu le gen hi. Makaitu tampite’n ei Bible thute pansan a kal ana suan dan uh leng gen hi. Eg. M.K. Gandhi in, India zalenna a sual lai un, Mathew bung 5-7na pansan in, non-violence, chihte ana pankhia in, pom mahmah mahleh, thoh nawnna a gintak louh ziakin, mi hehpihhuai pen hi ngei ding ahih dante, leh adangdang gen hi. Sahkho dang heutu sisate, thou nawn lou ahih dan uleh, ei Toupa bel thounawn ahih thu leng gen hi. Huaiziakin, i it leh ngaih thohnawnna gingta hon na paisansate leng misi hilou in, hiai tungtawn a, vaihawmna a thounawn di’a mun khat a ana om ahihdan uh le gen hi. Paikhawmte’n nuam kisa chiat a, tawp nung tanpha in, houlimna in kizang hi.
Toupa phatna lapawl, TBYF, CD-te apan, “Pathian thupi hen..”, chih siamtaka honsak banuah, tuailai hiai zah bang pha mawk dan i hi maw, chih bang hon ngaihtuahsak hi. TBYF (Gole Mkt. & Minto Rd. area-te) apan, “Toupa no’ng itna lian hi”, chih kingaikhia a, siam petmah zel uh. TBDF-te apan, “Ka tanpa ahing chih ka thei”, chih lamet phaklouh hial khat kingai khe nawn hi. Hiai phatna aw kilawm ging ziahziahte’n, i Toupa’ thounawnna ni thupi zeem kilawm mahmah a, kipahluat ziakin, mi tampite, mittui dai hial in om uhi. Hichi bang a, Toupa ompihna a khiaklahhuaitaka hunte kizang zou thei ahihman in, Amah tungah kipahthu igen hi.
