June 03, 2012 in EBCC Delhi kum 20 chingta, Ebenezer!
Kum 20 sung vingveng amah deihdan zonga tua banga kizang thei dia hunpha hon pia i biak Pathian’ kiang’ kipahthu genin thupina tengteng amah i khusak hi.
Aw, Toupa’ hoihdan chiam him dih ua; amah a muanna koih mi a hampha hi, chi a Sam laibu a i sim bangin (Sam 34:8) Toupa’ hoihna ki chiangtan lou hamphatpihte ihi, Halleluijah! Tuni dong amah hoihna chiam a mu gige theite hampha tungtuang hinatel hang e!
Toupa aw, ka Limbelh uh Kumtawn Suangpi muanhuai aw,
Ka kipak lua uhi; nang kiang kia ah
Thupina, Minletna, leh Pahtawina
ka hong pia uhi.
Ahi, Toupa tuh ei’ di’n i Limbelh uh Kumtawn Suangpi hi taktak hi. Tangtawn manthatna pan hon hunkhia a, tangtawn hinna ah a Tapa Jesu Khrist tawnin hon pilut hi. Tua kia hilou in, Minam manthat theihna apan hon hunkhia in khovel a Minam theihphak dingin hon tawisang hi. Khang mangthang lou dingin a Itna leh Hoihna in hon tuam kimvela, siamsinna sang zaw, sepna sang zaw, nek-taak zonna kichup zaw ah hon dingtou sak lai hi. Tuin, midangte’ laka ki hel ban dingin hamphatna lam tuamtuam ah hon pe lai hi. Thamlouin, midangte’ lakah makaitu dingin hon seka, tuabang mohpuakna i liangkou ah nga hi. Ahi, Amah a muanna koih mi a hampha hi.
Toupa aw, kua ahia ka hih ua, hiai tantan na hon pi. Hoihna leh chitna tuam neilou EBC saptuam mite Toupa’ hoih tungtuan tang bang mai in hamphatna leh vualzawlna in hon vuk hi. Kumpi David in, Toupa Pathian aw, huaite leng nang mitmuhin zaw thil bangmah tham lou zaw ahi na ua; himahleh, na sikha inkuan hong om dan ding thu kum tampi sunga dingin leng na gen khinta a...achih bangin, i om dan ding uh kum tampi adding Toupa’n ana gen khinta a, Toupa’ mah in ahon sepsak khinta a, tua i tun na tan tung thei i hong suak uhi. Toupa’n hon sepsak ziak ahi, amah lam en le’ng thupi in manpha mahmah hi. Toupa aw, kipak lua ung. Nang hoihna leh chitna ziaka mangthang lou a thupitaka dopsanga ka om uh.
Hiai te tengteng ziakin Toupa Pathian aw, nang tuh khangsawn sawn a leng ka bukna uh Limbelh Kumtawn Suangpi na hi hi. Belhtak Pathian, muantak Pathian, nang hong bel den ding hi ung....
Huaiziakin, Toupa Pathian aw, na kiangah bang ahia ka gen nawn tuan ding? Na sikha lah na thei vek ngal a... na mai ah sel ding bangmah ka nei kei uh, vuaktang leh ki hong sa ka hi uhi. Tuin, a thak in hon en inlan, hon chian in, kou mau ah diklouhna om hiam! Na Kha kiang akipan koiah ka pai mang ding ua? Na ma akipan koi ah ka tai mang ding ua? Paina ding dang ka neilou uh hi, taina ding dang ka nei lou uhi, nang kiang kia ka hon zuan ding uhi. Toupa Pathian aw, nang tawh om khawm dingin kou lakah a sianglou om hiam? Tuin, hon en chian inlan, hon sawp siang in. Nang deihna banga hinkhua zang gige ta dingin, nang deihdan banga inkuan pi-a makaih ta dingin, nang deihdan banga hunt e zang siamta dingin, aw, Toupa hon panpih in.
Sian lemgeel a hun hong tung te, a phal hanga ka tuah jel te,,, Toupa aw, na phal hanga ka tunga thil hongtung te ka theisiam ta ding. Bangkim nangmah thupina dingin. Ka hun leh nite nangmah min thupina ding kia in ka zang ta ding hi. Delhi a om hamphatna na hon piakte nangmah a ding kia in. EBC Saptuam mite’n nangmah thupina hong pia gige ding leh nangmah itna thu phuangzak tawntung ta ding hi ung!
~Pastor V Nenglian
