June 25, 2017 (Nipini)
Biakna Kikhop Masa – EBCC Delhi Biakinn (10:00 AM – 12:00 Noon)
Pastor Biakson in akhual-atual Pathian bedia paikhawm te Jesu Khrist min a vaidawnna nei masa.
- Lapi te: Thangsuanmung, Vumsuan, PR Dinga, Biakmoi, Luni, Chingboi Vualnam, Elish Zousangpui, Margaret Goulun, Veven.
- Musician te: Siamkhum, Muanlal.
- La kisa te:
1) “Nunlui liamsa ka geel zel.....”
2) “Phat ding na kilawm hi…..”
3) “Aman honpi ka kipak hi…..” - Thilpiak lakkhawmna – Laantu: Upa T Thiankhanmuan
- Short sharing: Pastor Khaikhuphang –
EBCC Khazang area apan chibai. Hiai program manphatak siim dia chial khak a om kipak lua. Ka zi toh hon chial sawnsawn, kipak petmah. Tulel a Thanlon Division sung a Khazang station a nei a Phaitong leh Aibulon saptuamte enkol. Sepna hi in amun hileh nuam sa, nou leng hong zin in hong en un. EBCC Delhi mi’n Model Church a hon en/koih uh. Huaiziak a amite ihihna teng ua model ihih ding uh. Kum 25 tan pha Toupa’n honpi ta. Maban ah Amah adin manphasem in kizang ni. Kum 50 chinna (Golden Jubilee) muh ki lamen. Huai din Toupa’ muanhuaina lamen in pang ni.
- BCD Quartet apan Pathian phatnala sakna.
- TBSUC Lapawl: “Phatna zaila isa ding…..”
- Jubilee Message: Rev Kamzamuan, DS (Singngat Division) -
Singngat Division sik in chibai. Singngat Divn toh kisai report saulou –khua 24, inn 908, milip 5382. I Jubilee thupi “Toupa Lamtouh Saptuam” lakkhiakna Laisiangthou Matthai 16:18 simkhe nawn ni. A sangzaw lam delh tawntung Pathian’ saptuamte, kum 25 zoh lam a kalsuan tou zel dia hanchiam kul. Hiai EBCC Delhi saptuam na omlou hileh bang ichi ding ua chih kidot tham ching thu ahi. Hiai hun/ni (Silver Jubilee) Toupa’n hon piak ahihman in ikipak ding uh. Mi tawmchik akipan tampitak a hon khangsak Toupa’n maban ah hon khangsak tou lai ding. Mi malmal leh a pawlpi a Toupa’ hoihna sim zohlouh dongte ihi. Makai, sinsaktu muanhuai taktak hon pia, hamphalua ihi. Toupa lamtouh saptuam ikichih lai in bangbang ah hon lamtou hi in ithei a? Khopi ilut in vualzawlna leh hamsia a om tuaktuak. Huaiziakin Laisiangthou a ki bulphuh saptuam leh mimal ihih chiat ding ahi. Khalam a khanna ding a kipumkhat saptuam ihih ding. Toupa mittunna thilte semkhia saptuam hih itup ding ahi. Toupa lamtouh saptuam zaw a foundation akip ahi. Nang foundation bang achi a? Toupa lamtouh saptuam in midangte itna nei lian, melma ma a puk ngeilou, tua ban ah thumna, kikhopna leh thilpiak a ginom ahi. Home mission poimohngaih sem ni. Kilakna laibu a saptuam 7 kigen te a pan sin tuak:
- Tutan itunna apan ki etkik a hih khelh te kisik ding (Ephesa saptuam)
- Sih tanpha a ginom dia hilh a om (Smarna Saptuam)
- Jesu min ginomtak a lenkip, hilele sinsakna diklou lalut; a kisik ding (Pergamam saptuam)
- Itna a khang, hilele thudik theihtelna tasam, atawptan a thudik a kepbit ding (Thaiatira saptuam)
- Nasep si, kisik a a taisan sa Thu a lakkik ding (Sardi saptuam)
- Atawp tanpha a thutak a dingkip (hiai te dan a om tumni) (Philadelphia saptuam)
- Lum lah lum lou vot lah vot lou, kisik dia thuhilh a om (Laodisia saptuam)
Saptuam masa te’n ana neih te uh etton tak: lungsim munkhat a thumkhawm, neih kikop, kithuahkhawmna hoihtak nei uh. Jubilee khenlam ah Toupa adia naksem a kisuk in pang ni.
- Special No: “Hon domsang” – BYF Choir
- Special No: “Thupina nang a” – TBDF
- Special Item: Bible taang genna (Recitation) – TBMC
- Vualzawlna: Upa Ngulminthang, Chairman, EBCC Delhi.
June 25, 2017 (Nipini)
Biakna Kikhop Nihna – EBCC Central Delhi Biakinn (2:00 PM – 4:00 PM)
- Call to Worship: Pastor H Thangchinkhup, Local Pastor
- Praise & Worship: Joint Worship Team makaih in
- La kisa te: “Aw Vanglianpen…”, “Sa in Jesu itna lamdang…”,
- Short Sharing: Pastor Tunson –
Tulel a ka etkol saptuamte EBCC Lailam Veng leh EBCC Tuithapi sik-le-tang in chibai. Hiai biakinn a ka kikhop khak masakna pen ahi. Laisiangthou Matthai 16:13-19 ka zi Siami in hon simkhe leh. Pathian gam nasepna a ka hamphatnate kon gen di. 1992 a EFICOR a sepkawm a Delhi a I saptuam kipattung a telkha, hampha lua. Huai zoh 1994 apan Assistant Pastor dan a sem kha nawn. Huai khit a EBCC Shillong a Pastor masapen va hikha. Azoh EBCC Delhi a Pastor a hong pai. Huai khit a Bangalore a isaptuam kipat chiil a va omkha, huai kawm a Chennai a isaptuam kipatna dia pan nala kha, chih te ahi. I theih ding ua deihhuai kasak khat tuh, EBC Saptuam Paite-te a kia hilou in Nepali, Karbi, Meitei, Dhemaji leh tunung chiang a hong piang khe lai dia lamet mite a hivek ahi a, Jesu Khrist it a Hondampa a saang kuapeuhmah a ahi. - Special items:
1) “Kipak in Toupa nna…” – TBCD, EBCC CD
2) “Nisim in…” – BCD Quartet - Jubilee Message: Rev V Nenglian –
Pastorte, vaisaite, HQ heutuliante, saptuam mipite, na vek ua tung ah Pathian min in kipahthu kon gen. Silver Jubilee program izatsa te apan sinkhiaktheih bangzahhiam om a, huaite:
i) Toupa’n ei a hihtheihna hon piak te izat khiak chian manpha lawmahmah ahi
ii) Ei a hihtheihna te izatkhiak lai in ikiim-ipaam/ima-inung a te theih ngai mahmah ahi
‘Toupa Lamtouh Saptuam’ ichih lai in huai sung ah mi malmal in bangchi in iki zang a chih iki veel kuul kasa. Laisiangthou (Phil. 3:12-16) ah Sawltak Paul in agen poimoh mahmah a om a, huai tuh, bukimta or bukimna tangta hilou in malam a thil khat delh a tai lailai kahi achi. Hiai ah Sawltak Paul in, “nunglam a thil omte ka mangngilh a malam a thil omte ka delh” achi hi. Hiai achih in a thiltuahsa tengteng mangngilh vek chihna hilou in, leh, huaite hunsa a khawlden mai lou ahihdan a genna ahi zaw. Delhi a isaptuam Silver Jubilee manphatak leh feltak in izang zouta a, thupi in manpha lua. Himahleh hiai tan a lungkim suk a khawl mai lou in mailam en a ikalsuan ding poimoh petmah ahi. Hiai piching hinkhua zang ding in Pathian in hon deih –
a) Khrist batna (likeness) ah,
b) Eimah adia punna te manna a simtheihna ah. - Special No: “Aw Vanglianpen…” – BYF Choir, EBCC CD
- Special No: “Piandang sui senglouh…” – BDF, EBCC CD
- Special No: “Jesu kiang ka bit ding…” – TBSUC, EBCC CD
- Vualzawlna: Upa V Lianzathang, Chairman, EBCC CD.
# Kikhop tawp teng in Refreshment: Dawn ding/nek ding om gige. Siri Fort Auditorium a Silver Jubilee zat hun in breakfast mipi nek dingin ki buatsaih a; Programme tawp in mipi a dingmah in refreshment kihawm hi. Pathian hausakna ki dong mahmah Saptuamten… All for HIS glory….
