June 21, 2017 (Nilaini) (4:00 PM – 7:30P.M)
Hunzatna bawng (part) 2 kisuah a, Biakinn pua (Outdoor event) leh Biakinn sung (Indoor event) dan in.
Outdoor event: Hiai hunzat Pastor Biakson in makaih in mipi’n ‘thukidawng’ simna leh phatnala sakkhawmna kinei. Rev S Vungminthang, General Secretary (GS), Evangelical Baptist Convention (EBC) in “JUBILEE PLAQUE” honna leh Pathian kiang a latna aneih hun ah tanglai a Jakob in “Ebenezer” suangphuh ana phuh thu leh Israel ten Mosi thupiak a Tuipi San laitak apan suang a laak ua Toupa’ hutkhiakna thupi theihgigena dia a lep/phuh uh tungtang lungkhoihtak genna nei. Tua khit in teeltuam mi 25 ten ‘Jubilee Dak/Jam’ khet/sat na nei uhi. Hiai teng khit in mipin Pathian phatna in “Aw Pathian tang a hon panpih…..” sakkhawmna nei in biakinn sung kilut hi.
Indoor event: Biakinn sung ah Joint Worship Team (JWT) makaih in Praise & Worship hunzat manphatak in zat ahi. Hiai hun ah Pathian phatna in “Aw Toupa na vualzawlna pha….”, “Hatlou mi kahi zong…..”, “Van a Pa aw….” chih te nuamtak a sakkhawmna nei in akal ah ‘Mipi Thumkhawmna’ hun kizang hi. Tua teng zoh in Rev Paukhanmang Guite in ‘Jubilee Message’ genna hun zang a, atomkim in hiai bang ahi:
Tunung a omngei nawnlou ding EBCC Delhi toh kisai a Silver Jubilee Message gen dia seh a ka om thupi kasa a ka kipak petmah. “Toupa lamtouh Saptuam” (Mat. 16:18) kingakna Jesu Khrist ahi. Laisiangthou a Jesu’n Peter kiang a “…..hiai suangpi tung ah….” achih lai in a thumal zat ‘petra’ (‘suangpi’ in Greek) ahi a, huai tuh amah aki genna ahi; ‘petro’ (‘suangnou’ in Greek) hilou ahi, chih ahi. Tua bang in Jesu Khrist a kinga EBCC Delhi saptuam kum 25 paita a tawmchik a na kipan tuni a lam chituamtuam a akhandan i et chiang in Pathian hon pina thupi in lamdang nah e chihlouh theihlouh ahi. Tua ahihlai in maban a kalsuanna ding tampi leh saupi nei ihi chih mangngilh hetlouh ding ahi. Khrist a zungkha, thil dang a kilam/kinga hilou a Toupa lampihtheih saptuam ihih touh zel ding uh a poimoh pen ahi; Toupa lampih louh lah athawn a sepgimna ahi ngal a. Maban a ikalsuan na ding ua deihhuai tuh “puaninn mun keeklet ding” (Isai 54: 2-3) hita ahi. Eimah kibuaipih den a iom leh, Jordan Lui bang a, siangthou leh gahsuah hinapi Tuipi Si a aluanlut tak a luankhiakna mun nei nawnlou ahihman in hinna nei bangmah asung a teeng theilou/si ibang maimah kha ding. Delhi khopi leh akiim a khamangthang tampi te Jesu khebul tun din Pathian in hon lamen ahi, huai ding in Pathian in hon vualzawl hen.
Jubilee Message zoh in Pastor N Tuang Lang’ makaih in EBCC Delhi a heutu leh member hon mualliamsanta te (53) zahtakna leh sunna hun zat in om. Tua khit in BYF Choir in Pathian phatna in “Halleluiah Choir” siamtak in hon sa uh. Tua zoh in Upa L Ngulminthang, Chairman, TBSUC in saptuam’ Jubilee Commitments: (1) GBC a naupang huhtuak 3 tan tukum session apan course azoh tan uh (kum 5) huhna piak ding, (2) ‘Jubilee Endowment’ chih minvuah a kum 5 sung bek kumteng a seminar neih gige ding. Hiai khit in EBCC Shillong apan Jubilee hong siim Pastor Khankham leh Upa P Langbiaklian in EBCC Delhi in Silver Jubilee a melmuh kipahpihna in “Memento” pia ua, SJCC Chairman Pastor N Tuang Lang in sang. Pu Hausuanthang Guite, Secretary, SJCC EBCC in apaisa hun a EBCC Saptuam vaina pawkha, tuni Silver Jubilee ni a hong telthei te mellahna leh hong hoih theilou Nu Chhungi [w/o (L) T Gwite] laithon simkhiakna nei. Hiai teng zoh in Pathian phatna in mipi’n “Na thupi lua…..” sakkhawmna nei in Pastor N Khaikhuphang, Khazang in Vualzawlna gen in hun zoh ahi.
