KHRISTMAS LEH KEI
By- Pastor V Nenglian
{s5_mp3}http://ebccdelhi.org/sermon/khristmas_kei.MP3{/s5_mp3}
Isai 9:6
Ei dingin naungek a hongpiang a, Tapa piak in i omta. Vaihawmna a liangjang ah a tuang dinga, a Min Lamdang, Lemthei, Pathian hat, Khantawn Pa, Lemna Lal laha chisin ngal ua..
Khristmas kei a dingin bang hihiam chih tunin sutkhawm le'ng chi ihi. Chaing sem a i theihtheihna dingin Khristmas hongtun masakpen hunlaia mite' adin Khristmas tuh bang hihchih i en ding-
1) Belamchingte (Lk. 2:8-20): Belamchingte'n a Belamte uh chingin gamlakah jan giaksuak jel uhi. Huchilaiin, van apan Angel vakilak in Bethlehem a Jesu pianna thu vahilh hi. Huai hun a Belamchingte' panlakna thupi mahmah hiaite ahi- i) Angel thugen gingta uhi, ii) chiamtehna- gan an piakna kuanga lum- ana om ngeingei ding ahi chih chianngam uhi, iii) a Belamte uh nusia zenin naungek piang en dingin kuan khe ngam tazen uhi. Huchiin, a lamet leh gintak bang ngei un (Angel in a gentak mah bangin) naungek a vamu uh a Pathian phat leh pahtawi jelin hong kiknawn uhi.
2) Suahlam mipilte (Mat. 2:1-12): Suahlam mipilte'n a nasepna uah Pathian mu uhi. Huai bel a nasepna uapan Kumpi hongpiang ahi chih theiin amah be di'n hongpuan khia uhi. Amahni nasepna a Pathian' mukhia chih tuh tulai khovel adin thil haksapi ahi. Huchiin, naungek ma akhupboh in bia uh a a goumanphate uh pia uhi. Kumpi Herod thupiak sangin a manglam ua Pathian' thugen gingta zaw (lau zaw) in zui lai uhi.
3) Kumpi Herod (Mat. 2:7-18): Kumpi Herod in Jesu pianthu a theih in a omna mun leh thudik thei nuam hi. Himahleh, va zonkhiak a vabiak ding sangin chouna/douna dana la in sukchimit dingin vaihawm hi.
4) Mari (Lk. 1): Mari bel mihing eite mah bang lel ahi, eite mah bangin thil ngaihtuah hi- bangchin ahi thei dia Pasal lah neilou inga. Himahleh, aman Pathian' thu bangin amah leh ahinna kemsiangthou hi. Huchiin, kiniamkhiakna toh kipumpiak hi- na thu bangjel in ka tungah tung hen.
Nang leh kei a dingin Christmas bang ahia?
- Pathian toh kilemna (Jesu toh na kimuta uhia)
- Pathian biakna (phatna leh pahtawina) ahi hia?
- Khrist ginna hihkipthakna ahi hia?
- Pathian laka kipumpiakna ahi hia?
-----------------------
December 25, 2015
