{s5_mp3}http://ebccdelhi.org/sermon/khovel_haksatna.MP3{/s5_mp3}
KHOVEL HAKSATNA & PATHIAN HOIHNA
Buaina leh haksatna toh kidim khovel ah i teng uhi. Ki'm leh pam a thiltungte'n lungsim ngaithuahna lehlam lehlam ah hon nawk in a dik leh hoih theihhaksapi ah hon omsak sek uhi. Gitlouhna leh hiamgamna ziaka mualkimhuai taka kithahnate, mahni kithahna leh hing ut mahmahte khailupna, mihing telkha lou vuahtui tamluat ziaka sihna leh haksatna hong tungte, menchim ziaka sihna leh buaina, hiaite tengteng Pathian geel dan mah hi ding hiam? Gam leh minam kisia bawlhoihna leh tun dingna ah nang leh ken bang mawhpuakna i nei a le? Kisaktheihna lungtang toh midangte mohsakna ding kia geel dok himai lou in eite' Pathian naihna tungtawn in Pathian in i gam leh minam tungding nuam hikha zaw ding hi. Hiai dotnate bangchi kisa a?
#Khovel buaihuai leh haksa Pathian hon piak mah hi ding hiam?
#Pathian hon piak hilou khovel nei kha i hi zaw hiam?
Ki'm leh pam a thiltung toh kisai a Pathian' hihna theihkhelh baihlam mahmah ahi. Huchi bang theihkhelhnate tuh-
1) Pathian in bangmah theihpih lou leh Amah toh kisai kha lou-
2) Pathian diktat lou (unjust) ahi-
Huchihlaiin, bangziaka hiai bang haksatna leh buainate khovel a om uh ahia?
1) Pathian in geelkholhsa (planned) a nei a ahi- Pathian in a tangtawn thiltup tangtun na dingin tuma leh tuni a thiltungte tuh a hong om uh ahi zaw hi. Pathian' sehkholhsa tangtunna ahi uhi. "Aman tuh I thilhihte bang hilou in, amah seh leh ama hehpihna bang zaw in a hon hondam a, sapna siangthou in a hon sam hi; huai hehpihna tuh leilung pian ma a Kris Jesu-a a hon piak a hita." (2Tim.1:9)
2) Khovel Pathian hamsiatsa ahi- Tenna taak lou dia Pathian in ana hamsiatsa ahi. Thil hoihlou tampi om thei dia Pathian in a hamsiatsa ahi. Huaijiaka Pathian in thil hoih leh deihhuai hi a i ngaihsutte i taan ding hon phalsak hi. Uthuai leh kilophuai isak tampite tan a amah deihdan zong din hon deih hi. Huchi a Kilakna 20 &21 a kigente (Van thak leh lei thak) a hong om khiak theihna din. "Hi taktak hi, ka Toupa theihna manpha jiakin thil tengteng ka taan ta hi. Huan, thil tengteng ninneng bang phetin ka sima Kris ka tan theihna dingin (Phil.3:8) ref. Gen. 3; Rom. 8:18).
3) Jesu'n thuaka hong sih theihna dingin hichi bang khovel gitlouhna toh kidim i nei hi- Pathian tangtawn thiltup tangtunna leh akisepsuah theihna dingin gitlouhna chikim khovel ah a om hi. Hiai jesu sihna tungtawn in Pathian' hon itna suklat ahita. Pathian in a hon itna suklatna dingin sihna omsak hi- Jesu sihna ah. "Himahleh, Pathian in a hon itna a langsakta mi khialte ihihlaia Kris i sika a sihna ah.(Rom.5:8) ref. Nas. 4:28.
Haksatna, buaina leh gitlouhna tampi laka khosa ding ihihman in Pathian in chuchiam muanhuai taktak ahon pia hi. Huchi a khovel hatsakna laka Amah deihdan i zon a huai banga hinkhua i zat theih zawkna dingin. Bang dinga hiai Pathian hamsiatsa khovel a nang nopna bukim, muanna bukim zong neita? Koi mah ah tuabangte omlou ding hi Pathian kiang kia loungal ah. "Tulai a thuaknate peuh denchianga i tunga thupina hihlat ding toh tehpihthamin kasep kei," (Rom. 8:18).
Haksatnate'n Pathian Gam hon ngaisak semsem hi...
-----------------
August 02, 2015
