KIPAHNA LEH THUAKNA
(Rejoicing & Suffering)
{s5_mp3}http://ebccdelhi.org/sermon/kipahna_haksatna.mp3{/s5_mp3}
Text: 1 Peter 4:12-19
12Deih takte aw, na lak ua zeetna thupi tak hongom, noumau zeetna dinga na tung ua hong tung, thil lamdang na tung ua tung bangin lamdangsa kei un. 13Kris thuaknate bangah thuakpihte na hihdan bang jel un kipak jaw un; huchiin a thupinaa a hongkilak chiangin noumau leng nuamtakin na kipak thei ding uhi. 14Kris min jiaka tai nahih uleh, na hampha uhi; thupina kha leh Pathian kha tuh na tunguah a om ngala. 15Himahleh, na lak uah kuamahin tualthatmi a hih jiakin hiam, mi dangte thil hih gensakmi a hih jiakin hiam thuak kei hen. 16Ahihhangin, Kristian a hih jiakin thuakta leh zum kei hen; huai min jiakin Pathian pahtawi jaw hen. 17Vaihawmna tuh Pathian inkuanpihte ah pat a hunta ngala; huan, eite ngeia a pat masak leh, Pathian tanchin hoih thumang loute tawpna tuh bangchi phet ahi de aw? 18Huan, mi diktat nangawn hotdam liailiai a hih in tuh, Pathian limsaklou leh mi gilou tuh koiah a lang ding? 19Huai jiakin, Pathian hoihsak banga thuakten tuh thil hoih hihin a khate uh Siampa muanhuaitak kiangah kemsak hen.
Kim-le-pam ah buaina leh haksatna tuamtuam hongtung jelin, mihingte'n eimah puakkhop ding chiat haksatnate kithuak tou jel hi. Kidou thute hong thangin, nam kal buaina, leh sahkhua ziaka buaina tuamtuam te niteng a thiltungte ahi uhi. I pilvan louhman leh panlak louhman leng himasa khollou hon sukha buaina leh haksatna tampi i thuak jel uhi. Huchihlaiin, Pathian a kipahna, Khrist Jesu a kipahna ichih bang chibang hi a koimun a om hi hiam? Hiai haksana leh thuaknate omna mun ah tua kipahna omloou (silent) hi hiam, chih tuh mi tamtakte buaina ahi ding.
Tuni'n hiai thupi "Kipahna & Thuakna" chih pansan in thuakna leh haksatna mun ah leng tua kipahna om veve ahihdan gen leng' chi ihi.
I tangtel (v.13a) a Kipahna (Rejoice) kigen tuh thupiak (command) ahi a, gingtute' hihna (rights/status) khat leng ahi achih theih ding- Keep on Rejoicing.
Bangchibang a thuaknate leh haksatnate kipahna hi thei ding hiam? or Bangchidan a thuakna leh kipahna tawnkhom thei hiam?
1) Thuaknate Pathian' sehkholh ahihziakin.
Thuakna leh haksatna i tuah jelte tuh Pathian sehkholh ahi uhi. Pathian in khovel a hamsiatsa ahi a, haksatna leh buaina tampi om ding a a phal mah ahi. Haksatna leh buaina hongtun chianga thil omlou dingpi hong om hilou in Pathian' sehkholh, Pathian' phal, ei' tunga hongtung ahizaw uhi. Huaiziakin, haksatnate tuh surprised hilou planned ahi (vv.12, 17, 18, 19). Thuakna, haksatna, buaina, gitlouhna te tungtawn a Pathainin Amah kiang i naih semsem ding leh Amah khut hat thilhihthei a ikikepsak ding a lamet ahi. Huaijiakin, buaina leh haksatna tungtawnin zeetna hongpai ahi zaw hi.
2) Khrist toh kipumkhat hihna chetna (evidence) ahi.
Khrist Jesu'n le'ng hiai khovel ah haksatna chiteng hong tuak ahi. Nawlkhinna, enghouna, muhdahna, thawmhauna, gilkialna & dangtakna, deih teng bukim louhna chihte leh kingaihsiatna tanpha hong thuak hi. Eite'n haksatna leh buaina i tuahchiangin Khrist toh kipumkhat ihihna sulang semsem hi (vv.13a, 14)
3) Kipahna bukim itan ding chetna (assurance) ahi. Haksatna leh buaina ituah jelte'n tunung a kipahna bukim itan ding hon chiansak semsem hi (v.13b). Gitlouhna tengteng leh khelhna thuneihna tengteng lakkhiak ahih hun chiangin kipahna bukim ding hi. Tuhun a i thuakna te'n tua bukkimna tang ding ihihdan hon chiansak uhi.
4) Thuakna tuh Pathian pahtawina ahi.
Khrist nungzui muanhuai hiding a niteng a Toupa' lam en a pan i lak laiin hon su tuailuai thei thil tampi om hi; eimah mimal hinna apan, inkuan sung apan, sepna mun apan, gamsung kivaihawmna apan, muhtheih leh muhtheihlouh kal ah, lawmta kikal bang ah leng. Hiai te apan haksatna tuak a i thuaknate'n Pathian min pahtawi semsem zaw uhi. Aziak bel, hiai bang haksatna leh buaina te'n Pathian hon naihsak semsem uh hiven. Huaiziakin, thuaknate tuh zumhuaina (shame) hi peuhmah lou uhi. Mi'n Toupa naihna a zat chiang in Pathian min pahtawi in om zaw hi (v.16).
Huaiziakin, gingtute-Pathian inkuanpihte (kuhkaltaka Pathian' deihdan zong jelte) apan vaihawmna kipanta hi. Tuabang ahihleh, Pathian inkuanpih loute leh Amah deihdan zongloute tungah Pathian' thangpaihna nasa na maizen ichia....
--------------
September 07, 2014
