{s5_mp3}http://ebccdelhi.org/sermon/PathianTeel_sehtuam.MP3{/s5_mp3}
PATHIAN' TEEL & SEHTUAM
1 Peter 1:1-2:
1Peter, Jesu Kris sawltak in, Ponto gamte Galatia gamte, Kappadosia gamte, Asia gamte, Bithinia gamte a dalh-te, 2thumang ding leh Jesu Kris sisan theh tang ding a Kha hihtuam, Pa Pathian theihkholh bang a telte kiang ah: Na tunguah hehpihna leh lemna hihkhanin omhen.
"Na Deihlam Lei ah Kihih Hen" chi a Pathian kiang a i thum laiin huai Amah deihdan akihihtheihna dinga Pathian' teel leh sehtuam ihih chih tuni'n i gen ding.
Hiai laikhak ah Peter in gingtute'n (saptuam) Khrist nungzuihna a haksatna a tuahte ua kipak ding leh huai a muanhuaitaka Toupa ngak dinga a hanthawnna thu kimu hi. Tuni'n ei gingtute'n leng Krist nung i zuihna uah leh saptuam kilamtouhna a panmun tuamtuam i let tiltelna uah gim-leh-tawl tampi i thuak uh a om ngei ding hi. Midangte hon theihpih bang kuamah hon theihpih khollouh inleng Khrist ziakin haksa tamtak i thuak khinta kha ding uhi. Hiai bang hun ah Peter laikhak tungtawn in Pathian in khamuanna leh kuhkalna thak hon guan leh chih i deih man a hiai text (1 Peter 1:1-2) telkhia ihi.
Hiai text ah thil poimoh mahmah nih kimu hi.
1) Gingtute (saptuam) hihna: a) Pathian' teelte (God's elect) ihi. Pathian in amah seh bang leh gelkholhna banga (huai tuh Jesu Khrist a) hon teelkhiakte ihi uhi. I text a t.2na ah Pa Pathian theihkhoh banga telte..chi hi. Huai bel Pathian in a seh-kholh leh lemgel banga a hon teelte chihna ahi. Huaiziakin, saptuam tuh mihing pilna leh lemgelsiamna a hongpiang ahi kei a, Pathian'telkhiak, amah deihna banga hong piang ahi zaw hi. b) Khualtamte (Strangers) ihi. Hiai leitungah gingtute (saptuam) khualtam (omden ding hilou) ihi chihna ahi. Hiai hihna nihna tuh LEI (bridge) toh tehkak in om hi. Lei a paite tuh a galkhat kai ut ngen ahi uh a, kuamah leitung ah awlmoh hau in sawtpi khawl ngeilou uhi. Gingtute leng hiai khovel nopsakna te toh kibual in sawtpi ki om theilou ding hi. Pathian lam en a niteng kalsuan dingte ihi. Huaiziakin, haksa leh tawlhuai a bat hun tam mahleh Pathian lam en a ginna mah toh niteng kalsuan dingte ihi, Pathian' teelkhiak ihihman in.
2) Gingtute (saptuam) hih ding: Pathian in a ziak (hih ding tumta) neiin gingtute (saptuam) telkhia hi. Huai tuh a) Jesu Khrist thumang ding, leh b) Jesu Khrist sisan theh tang ding in, chih ahi. Israel leh Pathian kizopna tuh thukhun ahi. Israelte'n huai thukhun a zuih ding, thumang a om ding uh ahi. Huaibangin, Pathian toh ikizopna tuh Jesu Khrist thumanna ahita hi. Sisan theh kichi in nidanglai a siampute nasep a gen a, Pathian nasepna a kawk thei hi. Siampu adiá Pathian nasepna tuh maitam a ganta sisan theh ahi. Sisan theh tang kichi in Pathian nasepna a kihel/telna a gen thei ding hi. Huchi hileh, gingtute (saptuam) tuh Pathian nasem dingte ihita uhi.
Khrist nungzuihna ah haksa in tawlhuai mahleh hiai dinga Pathian' hon teel ihihman in thumang taka kuhkal i suah ding uh ahi. Huai ah Pathian pahtawiin om ding a, huai mah eite adia lungkimna hong hi ding hi. Toupa'n Khrist nungzui a kalnasuanna ah hon ompih tawntung hen aw.
-----------------
July 27.07.2014
