{s5_mp3}http://ebccdelhi.org/sermon/easter_sunday2014.mp3{/s5_mp3}
TOUPA KA MUTA!
Johan 20:18
18Mari Magdalini a va hoha, nungjuite kiangah, Toupa ka muta, a chi a, a kianga thu a gendante leng a hilh a.
"Easter" chih thumal bangle i buaipih dek simsim uh abang phing a. Khenkhat in Babulon te (ginglou mite) chindan kila sawn ahi achi au, word origin study bawl te adin thudik ahih leng ka lamen hi. Huai akipan a hongpiang easter egg leh a dangdangte leng telin. Hiai bang sim in gingtu pawl khat in "Christmas" kichi gingloute pat ahi, chi'n Christmas zanglou hithet uhi. Eipawl in leng i pi-leh-pute uh thilchin leh a ngeina (custom) uh bangzah hiam i pi bawl nawn louh uh a om dia, khenkhat lah amin kibang, zatdan tangpi leng kibang tou den, himahleh, a concept gingtute ngaihsut dingdan toh kituak a i zat touh nilouh uh a om ding hi. Hiai lampang chu theologian te bangin hon suisau deuh theih ua bangtan laktouh theih ding ahimah hiam chihte khenkak theih ding tan theihchet lunggulh huaipi ding ahi. Bangteng hileh, hiai tan ah tuh, zatlouh sangin Pathian min thupina dinga zat ahoih zaw ding a, a min i khek ut kei a lehleng ginglou mite ngaihsut dan leh zat dan hilou in Jesu sihna apan thounawn ahi chih kipahpihna lungsim toh zat ding tuh manpha mahmah ding hi.
Thohnawnna gintaklouhna chinih in khen theih ding hi-
1) Natural law gingta a huai kia hinpih (existentialist) te adin tuh Jesu sihna apan thounawn in sihna tuak nawn lou hi, chih tuh a lamdang hilou in, ahi theilou, gintak theihlouh ding thu ahi. Hiai ngaihdan paisau pihte'n Bible a miracle tengteng kilakhe leh Bible taktak (historical facts) ki nei ding, achi uhi. Huai tuh ngaihdan diklou ahi. Bible in natural law leh supernatural law om ahi chih a pom kichian mahmah hi.
2) Thohnawnna gintaklouhna chi dang tuh kei hon sukkhak kei nakleh bangmah poi kasa kei, "I don't care" chih ngaihdan neihna ahi. Jesu sihna apan thounawn bang mah poi kasa kei, kei hon sukha kei na ding, a utleh thounawn henla, aut keileh thounawn kei leh, bang a poina om lou, chih ngaihdan ahi. Hiai tuh ngaihdan dik hetlou ahi. Jesu sihna leh thohnawnna in mi tengteng hon sukha ding hi. Pathian in Jesu sihna leh thohnawnna pansan in khovel vaihawm ding ahihman in. Tuni a Jesu sihna leh thohnawnna in na hinkhua gen a neih kei a, I don't care, situation a om nahihleh hih khial ding na hi. Nasepte 17:30-31 ah hiai thohnawnna in michih hon sukha ahihdan kigen khinta hi.
Thohnawnna tanchin tangpi Johan 20:1-18 sungah chiang takin kigen hi. Tomkim tak a kigenna bel Matthai gelh ah om hi.
Huaijiakin, thohnawnna chetna (evidence) kichingtak a om laiin nangmah mimal in sihna apan thounawnta Jesu na muta hiam? Pau.3:7 ah, Nangmah mit ah pil ken la, Toupa kihta inla gilou taisan in, chi hi. Nang ngaihsutna dan a hong pai louh ziak a ginta nuam lou, nang theihsiamna dan toh akituah louh ziak a nawlkhin na hih leh poi mahmah ding hi. Mari Magdalini in "Toupa ka muta" achih banga sihna apan thounawn Jesu mu a amah a hinkhua kibulphuh hinpih thei chiat dingin Toupa'n Easter Sunday i zat uh hon vualzawl sak hen aw.
------------------------
April 20, 2014
