JESU SIHNA MANPHA
Johan 12:27-36
27Tun ah ka kha a mangbang hi; bang ka gen dia? Pa, hiai hun lakah honhondam in, ka chi dia hia? Chi lou e. Hiai dinga tu tana na om hiing a.
28Pa na min pahtawi in, a chi a. Huchiin vana kipanin aw hongsuaka, Ka pahtawita, ka pahtawi lai ding achia a.
29Huan, mipi a kianga dingten huai a ja ua, Vanpi ging ahi, a chi ua; midangten, Angelin amah a houpih ahi, a chi ua.
30Jesun a dawnga, Huai aw keia dia hongsuak ahi kei, noumaua ding ahi jaw.
31Tu tuh hiai khovel vaihawmsakna hun ahi; tuin hiai khovel lal paih khiak ahi ding.
32Huan, leia kipana khai kanga ka om leh, mi tengteng kei mah kiangah ka hip ding, a chi a.
33Huai thu tuh a sih dingdan theihsakna dia a gen ahi.
34Huan, mipin a kiangah, Kris khantawnin a om ding chih dan bu ah ka thei uh, Nang, Mihing Tapa khaikanga om ding ahi, bangchi chiha chi na hia? Huai Mihing Tapa tuh kua ahia? a chi ua, adawng ua.
35Huan, Jesun a kianguah, Vak na lak uah sawt lou a omtadih hi. Vak na neih lai un vak ah khosa un, huchilouin jaw mialin honlap ding hi. Kuapeuh miala khosain a paina a theikei.
36Vak na neih lai un vak gingta un, vak tate na honghih theihna dingun, a chi a. Huai thute Jesun a gena; huan, a pia a, amuh louh dingun a buta.
Jesu sihna tuh sihna manpha ahi. Aziak bel, amah sihna ah Pathian pahtawina piak in om a, Pathian' thupina suklatna ahihman in. Tuni'n eiten leng Pathian pahtawi hinkhua zang lehang hinkhua manpha hi ding a, Pathian' thupina suklatna dingin i niteng hinkhua kisuk lehang huai mah tuh a manpha hinkhua hi ding hi. Pathian pahtawina hilou, Pathian' thupina suklatna hilou hinkhua, thilhih khat peuhpeuh thupi leh kilawm in kilang mahleh manphatna neilou hi, Pathian ading in.
Bangchibang a Jesu sihna in Pathian pahtawina pia hiam!
1) Pathian in Jesu sihna tungtawn in khovel ah vaihawmna tungding hi. Khovel vaihawm ding Pathian ahihdan leh Jesu pansan a vaihawm ding ahihna ah Pathian' thupina suklat in om hi. v.31a; 5:27-29.
2) Jesu sihna tungtawn in khovel Lal (Setan) hawlkhiak in om hi. Galvan hoih leh mihing' thahatna in a hawlkhiak theih ngeilouh ding Khovel Lal, tulel a khovel tunga vaihawmpa, tuh Jesu sihna tungtawn a hawlkhiak in om hi. v.31b
3) Pathian in a Belamte Jesu kiang tun in a hong sihna tungtawn in Amah toh kilemnawnna (reconciliation) bawl hi. Pathian in Jesu sihna tungtawn in michih kiangah tangtawn hinna leh Ta hihna chiam hi. v.32
4) Michihte kiangah vak tate hihtheihna ding a vak gintak theihna Pathian in Jesu sihna tungtawn in hon pia hi. Kuapeuh a gingta tuh a manthat louh a khantawn a hinna a neih zawk na ding un. v.36; 3:16
Hiai Jesu sihna in Pathian pahtawina pia in Pathian thupina taklang hi. Huaijiakin, Jesu sihna tuh manpha lua hi, eite ading kholdiak in.
Huchih ahihlaiin, hiai Jesu sihna nang mimal adingin bangzah in a manpha ale?
-------------------
April 18, 2014
