Eph. 1:1-4;
1Paula, Pathian deihlama Kris Jesu sawltakin, misiangthou Ephesa khuaa om Kris Jesu-a mi ginomte kiangah: 2Pathian i Pa leh Toupa Jesu Kris kianga kipan hehpihna leh lemna na kiang uah om hen. 3I Toupa Jesu Kris Pa leh Pathian phatin om hen. Aman vanmun khawnga khalam vualjawlna chitengin eite kris ah honvualjawlta, 4Amah maia siangthou leh dembeia om dinga leitung pian maa eite honnateltak bang ngeiin.
Gingtute' hamphatna thupi mahmah tuh Pathian in khalam vualzawlna hon piak ahi. Hiai khalam vualzawlna tuh taksa leh leitung a haksatna, buaina, lusuunna, beidotna, pangpatna, vuallelhna, lungkiatna, lopsapna te' tunglam pek ah Jesu Khrist ah om ahi. Hiai vualzawlna bangzahtan i hamphatpih hiam chih tuni a i kidot nop ahi.
t.1-2 ah Paul in ahihna, a dinmun Pathian apan ahihdan a theichian mahmah chih i mu hi. Sawltak=apostle=messenger.
t. 4na in Pathian' hon telna thu a gen hi. India gam ah general election om ding ahita. Deihtelna hun ahi. Tuhun a i telching te'n gamsung vaihawmna hon len ding uh ahi. Bangtan daih ding hiam chih bel i thei kei, khat vei kitel in kum 5 bek daihdia ngim bel ahi.
Pathian' hon telna bel Leitung pianma a kipan tangtawn daih ding ahi tel zouzen hi. Hiai a hon telna tuh Khrist Jesu ah ahi a, huai ah tuh siangthou (holy) ding leh dembei (blameless) ding in ahi. Pathian siangthou ahihman in amite leng a siangthou ding ahi. OT hun in ganhing demna ding nei peuhmah kithoihna dingin kizang theilou hi. Pathian ma a mi a kilat theihna ding un ganhing dembei a zat uh kul hi. Pathian ta i suahna dingin dembei ihih a kul hi. Huai tuh Jesu Khrist ah i hi thei uhi. Pathian ta hihna tuh keilam ah hilou in Pathian' hon telna ah ahi kinga ahi zaw hi. Huchia Pathian in a mi telte adin hamphatna sehkholhsak lai hi. Huai te tuh ta hihna, gouluahtu hihna, siangthouna, dembeina, leh Pathian hihna koppihna te ahi uhi.
Khalam Vualzawlna-
Hiai ahi khalam vualzawlna ichih- Pathian in Khrist Jesu a hon telna leh i tan ding hamphatna a hon sehkholhsakna. Huai tuh vanmun akipan ahi, vangam thilte ahi uhi. Huai tuh Pathian' hon itna ahi. Amah hon itna apan kuamah in hon sutkhe theilou ding hi. Ginlahna in, lungkiatna in, haksatna in, lusunna in, gal in, gilkialna in, bangmah in leng hon khenkhe theilou ding hi.
Huaijiakin, hon teltupa'n bang dinga hon deih hi hiam, chih ngaihsut a huai dinga hinkhua zat ding ahi.
------------------
April 06, 2014
