A Bul leh A Tawp
March 08 2014 a Kuala Lumpur, Malaysia apan Beijing bawh dia lengkhia lenna MH 370 tunitan a omna ki thei nailou hi. Hiai lenna sungah mi 239 tuang uhi. Muhkhiak louh a mangthang den takpi ding adiam?
Hiai bang thiltung khovel in lamdang asak mahmah hangin a lamdang lua hilou ding hi. A ziak tuh Bible in- lei leh van a mang dia, ka thu a hihleh a mang kei ding, chi hi (Mat. 24:35). Hiai i tenna leitung leh a sunga omte tengteng khatvei ni chiangin hong mang dinga, bei mai ding dan ahi. Himahleh, a manglou ding leh a mang ngeilou ding khat om hi.
Hiai thu tuh Bible ah Kilakna laibu in leng ana gen hi- Huan van thak leh lei thak ka muta a: van masapen leh lei masapen tuh a beitak jiak un; huan tuipi leng a om nawnta kei hi (Kil. 21:1).
Thil tengteng piangkhe sak a tawpsak nawn ding tuh Pathian ahi. Amah tuh a bul leh a tawp, Alpha leh Omega, ahi.
6Huan aman tuh ka kiangah, A hongtungta uh. Kei Alpha leh Omega, a bul leh a tawp ka hi. Dangtakte kiangah manbeiin hinna tuikhuka tui amau kiangah ka pe ding. 7Kuapeuh a vualzoupan tuh hiai thilte a luah dia; huan a Pathian ka hi dia, huan amah tuh ka tapa ahi ding. 8Himahleh dawilokte leh gingtaloute leh, kihhuaite leh tualthatte leh, mingaihhatte leh bumhatte leh, milim bête leh zuautheite tengteng tuh, amau tan tuh dil, mei lek kata kang ahi dia; huai tuh sih nihna ahi. (Kil. 21)
A bul- hiai a A Bul kigen (Alpha) tuh Greek te alphabet genna lel ahi kei. Thil dangteng omma, kipat ma a omsa ahi. Amah akipan thilteng hong kipan chihna ahi. Aihleh, gitlouhna leh khelhna te leng Pathian akipan chihna ahi di maw? Hiai tak ah ahi Pathian hehpihna a kichin dan muh theih a om na. Pathian in a thilsiamte zalenna bukim pia hi. Amah thupina pahtawina dingin thilsiamte bawl hi. Huchihlaiin, automatic a amah pahtawina pe ding in hilou in a thilsiamte'n amau a utna leh kilawpna om bbangbang toh Pathian pahtawina a piak ding uh a deihdan ahi. Huai zalenna hamphatna ttuh a thilsiamte kiangah pia hi. Hiai in Pathian' hehpihna leh zahngaihna kiningchinna langsak hi. Huchi a, a thilsiamte'n amah taisan a Setan a zuih lai un, Amah kiang lam hong kik theih nawn na ding un lampi bawlsak a, huai tuh, A tapa Jesu Khrist ah ahi.
A Tawp- Hiai thilsiamte'n tawpna nei ding uhi. Setan adingin leng tawpna om ding a, huai tuh, meidil, tangtawn gawtna ahi. Huchibangin thilsiam dangte' adin leng tawpna om ding a, huai ah, khalam dangtakna toh amah kiang zuan peuhmah te adin hinna tui kiching pia dinga tangtawn a ahinna ding un, Huchihlaiin, a dangtak lou peuhmah te adingin vaihawmna om ding hi. Huai tuh a tawpna Pathian in a bawl dan ahi.
Huaijiakin, na tawpna koi ah a kinga hiam tunin kienchian in.
-----------------------
March 23, 2014
