A Kiching Hinna
Jn. 10:7-10
7Huchiin, Jesun a kiang uah a gen nawna, Chihtaktakin, chihtaktakin kon hilh ahi, kei belam kongkhak ka hi. 8Ka maa hongpai tengteng gutate; suamhatte ahi vek uh; himahleh, belamten a thu uh a ngaihsak kei uhi. 9Kei kongkhak ka hi; keimaha mi a lut leh, humbitin a om dinga, a lutin a pawt dinga, nek ding leng a mu ding hi. 10Guta jaw, gu ding leh hihlum ding leh hihse ding louin a hongpai kei; kei jaw hinna a neihna ding ua, tampitaka a neihna ding ua, hong ka hi.
Khalam gama kha gilou douna ah Pathian in a tate vualzou sa din hon koih hi, a jiak tuh, zualzohna pansan a galdou ihihman in. Vualzou a zou jel dingin Jesu Khrist a bukimna, kiningchinna, omte pansan a dou ding ahi.
Huai Jesu Khrist a kiningchinna bang ahiam? Guta tuh gu ding, hihse ding leh hihlum ding kia in a hongpai hi, Bible in chi hi. Hiai guta in tuh Pathian in hoih mahmah dinga a bawlte hihsia in, gumang in, hihlum lai hi. Pathian a kipan ahoih leh manpha i tante tengteng lakmang, gukmang, hihsiatsak leh hihlupsak in i om uhi. Thuakzohna, kiniamkhiakna, dohzohna, theihsiamna, itna leh hehpihna, lametna leh kithalopna, siangthouna leh ginomna, leh tangtawn hinna Pathian apan i neihte tengteng tuh lakmangsak, guksak, hihbeisak in i om uhi.
Himahleh, Pathian in huai a mangthangte tengteng Jesu Khrist ah hon dinkik vek, hon pekik vek hi. A hoih khempeuh piak kikin i om uh a tangtawn hinna leng Pathian in Jesu khrist ah hon chiam lai hi. Huaijiakin, a kiching hinna tuh Jesu Khrist ah om hi. Hiai a kiching hinna zangin huai khalam gama kha gilou douna ah i vualzou jel ding uhi, eimah lohkhiak pilna, siamna, hatna, thilhihtheihna, thupina leh neih-le-lam pansan hilou in.
Hiai a kiningchinna tuh bangchi hi hiam? Jesu kei tuh a kongkhak (gate) ka hi chi hi. Huai kongkhak tawn lou in Belamte lut in pawt theilou uhi. Ganging dangte'n leng huai kongkhak tawn lou in Belamte hihse theilou ding uhi.
Jesu tuh i bitna kongkhak ahi. Amah tellou in bitna bukim om theilou ding hi.
Jesu tuh kongkhak ahihman in amah lou in lut leh pawt chih om theilou ding hi. Jesu tawn lou in kuamah in Pathian mu thei lou ding uh a, Pathian deihdan theilou ding uh a, Pathian kiang tung thei lou ding uhi. Jesu i lut leh pawt theihna in i zalenna tungding hi.
Jesu khrist lou in buklimna leh kichinna om lou hi.
----------------
March 16, 2014
