Notes
Text: Sam 90:12, Paunakte 3:5-7
Kibulpat thakna (New Beginning):
Kum thak, hun thak a om i hihman in kibulpat thak ngai hi. Tua i tunna tan leh i phakna chiang banah amanpha zaw masuanna i neih theih nang in tua i kibulpat thak ngai hi.
Bang dinga kibulpat thak ding? Eimah nopsak na ding lel hiam, kipahna ding lel hiam, eimah lungmuanna ding lel hiam a kibulpat thak ding hilou in, Pathian in nang leh kei' hinkhua a tup-leh-ngim a neihte tantun dinga kibulpat thak poimoh hi zaw hi. I kibulpat thak na ding ziak bel Toupa Pathian' lungtup tantun ding in ahi, huai tuh hinkhua manpha penpen ahi.
Banglam ah Kibulpat Thak Ding?
1. Pathian muanna ah kibulpat thak ni. Toupa Pathian muang lou kua i om a? Amah muanna tawh tuni tan kikhawm jelte ihi uhi. Himahleh, tunin kumthaa i ding toh kiton in Toupa i muanna enchian thak in Amah ah kibulpat thak nawn le chi ihi. Sam 18:8 ah, Mihing muan sang in Toupa a muanna koih tuh a hoih zaw chi hi. Kum paisa sungin na muanna taktak koi ah na koih a? Nangmah lemgel siamna ah hia? Nekzonna kichuptak na neihna ah hia? Education hoih hun tawk na neihna ah hia? Ta-leh-nau lamet huai mahmah ding na neih ziak a ki muang na hi hia? Paunakte 3:5-7 enle hang- lungtang tengteng toh Toupa a muanna nga ding, eimah mitmuh a pil mailou a gilou taisan dingin sinsak in i om hi. Tukum thak ah Toupa muanna ah kiknawn ni.
2. Toupa Dan kipahpihna ah kibulpat thak ni. Kum paita sungin na kipahna mahmah te bangah akinga ale? neih leh lam, thil thak na neihte ah hia? exam na lohchinna ah hia, ahihkeileh, na tup-leh-ngim bang a na om theihna ah hia? Hiaite a ikipah ding mah ahi. Himahleh, tuate ziak lel a kipak ihihin bel ahehpih huai pente ihi kha ding. Laisiangthou in tuate tunglam ah kipahna ding khat om chi hi, huai bel, Toupa Dan ah ahi. Sam 1:2 ah, akipahna tuh Toupa dan ah ahi zaw a, a danthu tuh sun leh zan in a ngiahtuah ngitnget hi, chi hi. Toupa dante ikipahna penpen ahong hih hun chiangin bangchi bangteng i hinkhua ah hongtung mahleh kipak gige in i om thei ding uhi.
3. Mimal hinkhua a Toupa deihdan zonna leh tua banga hinkhua kizatna ah i kibulpat thak ding uh. Na hinkhua a Pathian deihdan (God's will) thei khia dingin kibulpat thak chiat ni. Nang leh kei hinkhua ah Toupa'n tup kichiangtak nei ding hi. Tua mukhia ding leh tua bang a hing thei dingin kibulpat thak chiat ni.
4. Pathian itna ah kibulpat thak ni. Toupa Pathian ana it khin hita mah le hang, kumthak i kaitouh tawh kiton in Amah itna ah kipanthak nawn ni. Toupa nangmah mah kon it hi, nang mahmah kon ngai hi, chi in Toupa mah itpen ngaihpen a nei ding kibulpat thak ni. Nupa kop khat kum 30 val kitengta mah le uh kon it kichi tuah ngeilou uh ahi ding a zi'n apasal kiangah kum 30 bang ahih nunga kon it khat vei le non chihlouh, itna omlouhna mun ah ka ut nawn kei chin a pasal hon mawh sa hi. A pasal in ken ikiten laia Pastor mai a kon it ka chih ka khel nailouh pi, chin dawng hi kichi hi. Tuabanga itna nei napi genkhiak louh a a om nilouh chiangin itna manphatna nangpitakin kiam thei hi. Tu kum thak ah, Toupa nang mahmah kon it hi, kon it lua hi chi ding kipan thak ni.
Tu kum thak sung, nitang a Pathian sim tham, Pathian pom tak, vualzawl huai leh lohchin huai hinkhua zang a kum galkai chiat dingin Toupan mimal chihte hon makaih in hon vualzawl chait hen aw!
