Notes
Text: Mathai 21:1-11
2010 kum a Palm Sunday hun i zat lai un,"Bangziaka Jesu Vualzou a Jerusalem lut hi hiam?"chih toh kisai in "Jesun hiai thiltung tungtawn in Kumpipa ahihna taklang hi" ichi a, tuni'n "Hosanna- Toupa Pahtawini"chih thupi a neiin Jesu hunlai a miten bangchibanga Amah Pahtawi uh hiam chihleh tuhuna eiten bangchibanga pahtawi thei ding ihi hiam chih en khawm le'ng ichi hi.
> Hosanna= Hebrew thumal Greek expression dana kizang ahi akichi hi. Hebrew thumal hosan= save, or save us chihna ahi a, suffix na akibehlap chiangin phatna genna praise ahi kichi hi. Huaiziakin, mi khenkhat ten Hosanna chih tuh Toupa hon hondam in chihna ahi achih uleh, khenkhat ten, Toupa phatna /pahtawina kon pia hi chihna ahi achih chiangun anih in dik thei tuaktuak ding abang hi. Eite'n Dam sawt hen ichih toh kikaih dektak abang. OT a Hosanna thumal kinaihpihpen tuh Sam 118:25 ahi. Huai ah tuh Lord, save us chin kilet hi.
> Event- Palm Sunday ni tuh Jesu thaha a om ding ni 5 in a sap ni a thiltung ahi. Hiai ni'n Jesu'n anungzuite laka mi nih amazon ua khua a vapaia Sabengtung kikhih a nou toh va kai dingin sawl hi. Tua Sabengtung nou tunga tuangin Jesu tuh Jerusalem zuan in hongpai hi. Mipi tampitakin zui nainai uh hi dingdan ahi. Jesun Lazar misi a kaihthoh khita thiltung ahihman in miten Jesu mu nuam mahmah dan uh ahi. Huchiin, mi tamtakten Jesu Kumpipa pahtawina in a puannak, garments/cloaks te uh lampi a phah in, midangten singsawl/singnah khiak a lampi a phah in, amalama paite leh a nunga zuiten aw ngaihtakin slogan sam uhi- Hosanna, Toupa min a hongpai kumpipa tuh a hampha, tungnungpen ah... chi'n.
Tuni'n eiten bangchibangin Toupa Jesu I pahtawi thei dia le?
1. Thumanna in- Nungzui nihte'n thumangtaka Sabengtung leh a nou ava kaih bang un, leh Sabengtung nou in thumangtaka a tunga Jesu a tuansak pah bangin, eiten zong thumanna in Toupa Jesu nakpitakin i pahtawi thei uhi. OT ah kithoihna sanga thumanna hoih zaw ahihdan chiangtakin kigen hi (1 Samuel 15:22). Toupa'n hih dia a hon lamet te bang i lawh a, hihlouh ding ahihte bang i lawh a... Khat leh khat kiit tuah ding achihlaiin kigensetuah kha ihi hiam... munchih a paia tanchinhoih phuangzak ding achihlaiin eimah ading kia gelgel maimah ihi hiam... thumanna in Toupa pahtawi ni.
2. Neih leh lam in- Mipiten a puannak uh suahkhia in, neih leh lam suahkhia in Toupa pahtawi uhi. Huai tuh, a thupina uh leh a kilawmnate uh ahi. Tuni'n eiten i kilawmna uh suahkhiak ding i nei hia...i thupina uh suahkhiak ding i nei uhia.. Pilna leh siamna Toupan a honpiakte bangchin i zang uale... sum leh pai a vualzawlna thupitak itante bangchin i zang uale... Toupa thupina leh pahtawina dingin zang ni.
Saptuam in panlak theihna ding kong tuamtuam hong gige hi. Mission Committee tungtawn a ipanlaknate i mangngilh naikei. Missionary vakna, Tualsung Mission fund tungtawna missionary 3 i chomte leh Punjab Field thaka dinga Rs. 2 laks i guante bangchin i semkhia thei ding uale... Tuailai Pawl te tungtawna pan i laknate- laapawl zilding in tuailai bangzah ten commitment i bawl thei dia le..
Sum leh pai, tha leh zung kia hilou in a kilanglou lamah Thumna tungtawnin Toupa Jesu i pahtawi thei ding uhi. Tua dingin, Kha teng a Pathianni masapen ah Anngol thumna neih i sawm uh a, tunung chiangin eisung ading kia hilou in gingloute leh khamangthangte adingin i thum ding uhi. Thumna tungtawnin Toupa pahtawi ni.
Eiten leng thumanna toh i thupina leh kilawmnate uh suahkhia a Toupa adia kal i suan chiangun Toupa Jesu nakpitakin pahtawiin om ding hi. Tuabanga, Amah pahtawi gige thei dingin Toupa'n Palm Sunday zangte tengteng a vualzawlna hoihpen hon pia in hon ompih tawntung hen aw, Amen.
