Notes
“Jesu Thuakna leh Nang Thuakna”
1 Peter 2:21-25
Tumalam in Jesu thuakna, sihna leh thohnawnna tungtawn a hamphatna thupitak itante i gen ua, adik mah ahi. Nakpitaka hamphatpihte ihihman in vangpha ikisa mahmah uhi.
Himahleh, tuni’n bel, tua hamphatna itante thei mahmah napiin tua dinmun apan kal khat bek suan le’ng ichi hi. Huai bel, Toupa Jesu’n nang leh kei’ hamphatna ding kia lel a, nuamtaka hinkhua izat theihna ding lel a, tangtawn hinna i neihna ding lel a, haksatna chiteng, mualphouna chiteng hong thuak a, Cross a hong si himailou in, amah nung izuih theihna dinga example, etton ding, hon pia ahi. Hiai tuh kal khat i suan na ding ahi. Jesu sihna hamphatpih ding lel hilou in amah banga thuak ding leh a khekhap zui dingin a hon sam hi.
Jesu, hiai leitunga hongpai nasan (purpose) tuni a, nang leh kei hinsan (purpose) ahong hih chiangin Pathian mission nang leh kei hinkhua ah buchinsak in a om ding. Tuamah bangin, Jesu’n nang leh kei adia sihna tanpha a hon thuak laiin Amah nung i zuih theihna dingin khekhap hon nutsiat hi.
v.22a- aman tuh thil himhim ahihkhial kei.. achi. Khiallou hinkhua zang thei chiat dingin Jesu’n lampi hon nutsiat ahi.
v.22b- akamah zekhemna leng a om sam kei..achi. Zekhemna pumpelh thei dingin leh kuamah khemtu a panglou dingin Jesu’n alampi hon sialsak khinta.
v.23a- mi kou a aom laiin leng a kou thuk kei a.. achi. Dohzoutaka hinkhua zang thei dingin Jesu’n akhekhap hon nutsiat hi.
v.23b-a thuak laiin a vau kei hi.. achi. Gilou gitlouhna in a thuk kei a, thangpaihna toh bangmah ahihkei, tuabang dingin a khekhap hon nutsiat hi.
> seven wonders of the Cross-kichi ah Cross tunga Jesu kampau nunung 7te a om a, tuate laka khat tuh- Pa, amau ngaidam in, a thilhih uh a theikei ua ahi..chih ahi. Nakpitaka bawl gentheitute, simmohtaka enghoutute leh amah sing lamteh tunga khai kangtute amuh chiangin Jesu’n lainatna toh hehpih mahmah ahi ngei ding, Pa amau ngaidam in chiin ngaihdam angetsak hi. Amah bawl gentheite tunga phuba la ding hilou in, ngaidam dingin Pathian a sam hi. Tua bang ngaihdam theihna hinkhua nei dingin Jesu’n akhekhap hon nutsiat hi.
v.23c- diktattaka ngaihtuah pa kiangah akipe zaw hi.. achi. Pathian khut a kipia in ahinna teng a lankhia hi. Tuabang dingin a khekhap hon nutsiat hi.
>Cross tunga Jesu kampau nungpen te laka khat tuh Pa, na khutah ka kha ka hon kemsak hi.. chih ahi. Pathian’khut a kikepsakna ah amah nungzui dingin Jesu alampi hon sialsak hi. Khovel haksatak ah i tenga, lungkiat theih nang tampi om hi. Lohsap theihna lam tuamtuam tam mahmah ding hi. Bangchibang hinkhua zang ding himahle hang, Jesu Pathian khut a i hinna kemsak gige thei dingin a khekhap hon nutsiat hi.
Tuabang ahihmanin, tuni’n eiten Jesu thuakna leh sihna apan hamphatna tampi- damna, hotdamna, suahtakna, thupina, zalenna, tangtawn hinna chihte ingah lai un, tuate toh lungkim den mai ding leh eimah hinhin a hing ding hilou in, amah nungzui ding leh amah khekhap nung zui dingin hon sam hi. Nang thuakna leh Jesu thuakna tehkak mah dih!
