Notes
BIBLE THUNEIHNA LEH TUNGNUNNA
2 Tim. 3:16; Deut. 8:3; Jn 12:48
Na hinkhua a thunei sangpen, nang hon pitu bang ahia? Or Na hinna kibulphuhna bang ahia? Khrist Jesu gingtute a dingin hinna kibulphuhna tuh Bible ahih ngeingei ding ahi. Bible a ki bulphuh a iki lamtouh theih na dingin Bible bangchituka thunei hi hiam chih leh Bible bangchidana thil dang tengteng sanga tungnung zaw hi hiam chih I theih chiang mahmah kul hi. Kuapeuh Bible sinsakte zuiloua Bible tungtawn a hinkhua zang loute Khrist Gingtu hi theilou jel ding hi.
Bang ziaka Bible a thu kigente “thutak,” a dikpen, hi a pom ihia? Bang ziaka Bible gen bangbang a hing a gamta sese ding ihia? Bible thuneihna (authority) bang hi a, bang ziaka tungnungpen (supreme) hi thei ding hiam? A ziak tuh-
1. Bible Pathian hatkhum a piak ahi.
- Bible tuh Laibu 66 kigawm ahi (OT 39+27 NT)
- Mi 40 velin kum 1600 vel ding sunga a gelh uh ahi.
- Mi tamtakin, hun sawttak sunga a gelh uh himahleh a kikalh (contradict) omlou hi
- Etsakna: Johan 1:18 a kuamah in chikmah in Pathian a mu ngeingal kei ua, kichi leh Exodus 24:10 a kigen, Mosi, Aron leh Israel makai 70 ten Pathian a mu ua, kichi kikalh lou hi. Pathian kha hi a, kuaman mu theilou mah hi. Himahleh, Mosi leh a lawmten amuh uh bel Pathian sapum a kilak ahi. Kuamah in amahmah mel kimu ngei lou napi zingsangin michih in amahmah mel en gige uhi.
- Khatkhum (inspired) toh kisai in Robert Lee in hichin chi hi. Hatkhum kichi in OT leh NT hongpian theih na dia Pathian’ thilhihtheihna (supernatural control) genna ahi.
- William Evans in hichin chi hi. Hatkhum kichi Pathian mihingte’ tungtawn a hong paukhia ahi, huai mite thutak phuangkhe ding a chitna (qualifies) pia in.
- 2 Pet. 1:21 ah- Thugenkholh peuhmah himing thu a pawt a hi ngeikei a, Khasiangthou sawl a, Pathian akipan hong pai ahi, chi hi. Hiai mah Hatkhum genna hi ding ahi ichi uhi.
- Inspiration Theory tuamtuam om a tuate laka khenkhat- Verbatim reporting theory, Natural Inspiration, Though Inspiration, Verbal Inspiration, etc.
2. Mihingte’ hinna Pathian kam a thu pawt ah kinga hi.
- Mihing tanghou (sum leh pai=ann) kia in hinglou dinga Pathian kama thu chih pawt in hing zaw ding hi (Deut. 8:3).
- Taksa pumpi adingin tanghou kipha moh a, himahleh, mihing lungmuanna taktak khalam kipahna ah om zaw hi. khalam thilten tangtawn daih ding a, salam thil ten tomchih kia lel daih ding hi.
- Pathian kama thu pawt tuh Bible ahi.
3. Pathian thu (Bible) tungtawn a vaihawmsak (thukhensak) in ki om ding hi.
- Dik leh diklou tehna dikpen tuh Bible ahi.
- Johan 12:48 ah Jesun amah deihloute leh a thugen ngaikhe nuamlou te a tung ua vaihawmsak ding khat om chi hi. Huai tuh a kama thu pawtte, Pathian thu, tua Bible I neih ahi.
- Bible tungtawna thukhensaka om ding ihi.
Huaiziakin, Pathian thu, thutak, hinna thu, Bible ahi. Bible sinsakna sanga sinsakna dang hoih zaw, deihhuai zaw om peuhmah lou hi. Bible tungtawn a vaihawmsaka om ding ihihman in Bible thute I zuih ngeingei ding ahi. Bible thuneihna leh tungnunna bel Pathian thu ahihman ahi. Bible pomkip chiat ni.
