Notes
(EBCC Delhi a Rev. G Kamzamuan'sermon masapen ahi.)
Pathian Lam En in.
Tangtel: Exodus 14:1-20; Hebrute 12:1-2.
India in a kum 65 na Independence Day lop din kisa, hiai kum 65 sung in India in nasatak in khang a, khovel theihphak in masawnna liantak nei, kipah huai lua. Huchi aileh, nang kum bangzah Kristian na hita a? na Kristian hihkum a kipan tunitan Khalam ah bangzahta a khang in na kithei a? masawnna ding bangzah na nei lai a? Kristian niamkiak pawl I hikha hiam kivel ni.
Thil I etdan jil in I muhdan/ngaihdan akibang kei hi, I puan hoihsilh in I omdan hon thunun a, I omna mun/tutna mun ding bang I pilvang mahmah, thil ei hon thunun tu jil in I omdan aki bang kei hi.
Isreal mite thil etdan chi tuamtuamte I en ding uh : Exod. 14:1-20.
I. Pharo Sepaih lam en pawl: ( Hunpaisa lamen pawl). Hiai lam en pawlte thil muh tuh, Pharo hatdan, a thupidan, a sakolte hatdan, hoihdan leh a sepaihte lauhuai dan a hi a, amau toh kimuhtuah ma a gal a aetlel unleng lau in ling khol khin uhi. Pathian Aigupta gam a kipan pikhetupa etsang in Pharo hatdan etna in a lungsim uh patausak in a lungbuaisak hi, Huai bang in en leng khovel ah eisang a hatzaw, neizoujaw, thupijawl te I etsungteng banglam peuh ah I lungkim ngei kei ding, insung khosak dan midangte a toh tehkhinden, ipasal/jite midangte toh tehkhinden, mi neihsate en in ei thilneih a lungkim thei mahmah lou, deihbeh den. Saptuam leng eisang a hithei zaw a I theihte en in ei a bang thringsa, halh jou kisa lou. Hichibang mite mi hehpih huai mahmah tea hi uhi. Pathian I pian a pan hiaitan honpitupa en lehang I lungkim hun mahmah ding in up huai hi.
II. Gamdai lam en Pawl: ( Tuhun enpawl). Hiai lam en pawl te leuleu in, Gamdai gam keu kia mu, gilkial dangtak nasa, sih ding bang leh lauh jawzen in, kivuina ding mun bang a buai a buai, Aigupta gam a han omlouhziak hia? Peuh chi a, thilteng phunna ding ngen a ngaihtuah, makaite mohsa, demna ding ngen ngaihtuah, mi buaihuai mahmah tea hi. Pathian honpina munte a khenchiang in ei deihthusam munpen ten a hi khollou thei, haksatna mun leng na hithei a, huai haksatna mun a I om a leng Pathian in I tuah ding phal hiding hiven chi a Pathian lamen a kuhkaltak a I pan ding tuh I mohpuak ahi. Na natna kia na etleh na dedeuh ding ahi.
III. Tupisan lam en pawl: (Maban ding en pawl). Hiai lam enpawlte le, a maban ding uh a etchiang ua, beiong in, hiai tuipisan lianpi mihing thahatna a kanzoh ding vual hilou bang chi ta ding, chi a mban bang bingsa mahmah, kingaihsiatna khuk a tusuk mai in sihlouh ngal maban ding omkei chi a, kingaisia gai (India Depression sanglua), ei hihtheih ban a Pathian pangthei ahi chihlam himhim phokban lou, Insung enin lungkia, ei mimal maban ding en in lungkia, lawm leh vualte en in lungkia, bangteng lungkiat huai savek mai, Hiai bang mite a ding in a damdawi a vang mahmah mai hi, bangteng hileh maban ding Toupan khut a na koihtheih leh hiaitan honpi kaipan na maban ding a thei lotel ding hi Tunglam en peuh mah photle chin lampi om ding hi.
IV. Pathian lam en: Mosi a makaipa un Pathian lamen kilkel a, mipi tengteng mundang en a a ki hawmdalh lai ua, amah kia pangkha mah leh, a etpa a theichian a, a muchian a, a hunpaisa uleh, tuhun leh amaban ding uh a theichian kilkel mai hi. “Toupa hotdamna thupi tuni a nou honensak ding en un” a chi mai hi. Makai na hihna ah na vision miten hon pompihtheih louh hun uh ommai thei, miteng in honpaisan a hondeihlouh hun un leng na belhpen Pathian ahi chih na theih tinten nak leh pang in Pathian in hon makaih na ding ahi.
Mosi Aigupta sepaihte hatdan theipen ahi, kum 40 sung Pharo insung a khanglian ahihman in
Mosi Gamdai haksatdan theipen ahi, kum 40 sung gamdai a belamching a om ahih man in
Isarel mite thiltuah ah a theichianpen a makaipa uh ahi, a thiltuah uah a tel kha vek hi.
Nang koilam en in na pai a? Pathian lam enni hang, Hiai tan hontunpan I ma honpi jel na ding hi.
