Notes
“God’s Supremacy In The Midst Of Terror And Fear”
Luke 13:1-5: Huan, huchihlaitakin, kuate hiam a na-om ua, huaiten, Galili gama Pilatin a sisan uh Pathian biakna sa gohte laka a helsakte tungtang Jesu a hilh ua. 2 Huan aman a kiang uah, Huai Galili gamate huchibang thil athuak jiak un Galili gama tengteng sangin mi gilou tuan hi un na gingta ua hia? 3 Hilou e, ka hon hilh ahi, nou leng na kisik kei uleh huchi bangmah in na mangthang vek ding uh. 4 Huan, Siloam insang in mi sawm leh giat a delhlupte leng Jerusalem khua a omte tengteng sangin mi gilopu tuan hi un na gingta ua hia? 5 Hilou e, ka hon hilh a hi, nou leng na kisik kei uleh huchibang mah in na mangthang vek ding uh, a chi a, a dawnga.
Terror ichih chiangin lauhna ichi hiam, a lauhthawng huai thil, ahihkeileh thil mulkim huai tak genna in i zang deuh uhi. Tuni New York khopi a World Trade Center insawng sang mahmah nih lenna zanga sukchip a a om ni kum 10 chinna ahi. Hiai hun a misi 2950 vel ahi kichi hi. Hiai thil tungin khovel ah muanna leh bitna nakpitakin kilingsak hi.
Tunaichin in, 7/9/2011, Dehi High Court ah bomb hattak puahsak in om a, mi 12 si in 70 vel ding ten liamna huaise taktak tuak uhi.
Lauhna khovel ah ki om a, bangchikchiangin koi mun ah bang thil piang ding hiam chih kuapeuh bildoh ahi gige lai hi.
Hiai te mihing lungsim sung apan hong piang gitlouh-thangpaihna tungtawn a kisem khia, khelhna gah, ahi uhi.
Mihingte gel leh ngaihsut hi hetlou, natural disaster-calamities, amah a hongpiang- zinling, tuipi kihot, tuilian etc., khovel ah thiltung lauhuai tam petmah hi.
Huchibang, buaina leh lauhthongna khovel ah Pathian’hoihna, Pathian thilhih theihna leh tungnunna ichih bang hi hiam chih tuh tuni a saulou a i gen ut ahi.
Hiai bang thil lauhuai pipi a hongtun chiangin, Pathian thilhih theihna leh tunnunna toh kisai a i theih dia poimoh mahmah hiai a nuai ah tamlou itaklang ding.
1. Pathian’theihlouh a thiltung khovel ah om ngeilou hi.
Mathai 10:29-30 ah, Jesu’n Kawlgit (Sparrow) nih dal dangka khat in an lei ua, Pathian’theihlouh / phallouh in hiai kawlgit khat leilak ah a ke kei ding chi hi. Tuabangin, na lu ua samzangte simvek ahi, chi hi. Kawlgit khat leng Pathian’phallouh a lei a kelou ahih chiangin Pathian’phallouh in khovel ah bangmah thiltung om lou ding hi. Jawlnei Amos in, 3:6 ah, Toupa hihlouh in hoihlouhna khopi ah atung dia hia? Chi hi. Job hinkhua ah leng Pathian phalna lou in Setan in bangmah sem theilou hi chih kichian mahmah hi. Huaiziakin, Pathian theihlouh in nang leh kei hinkhua ah, kim leh kiang ah, thiltung bangmah omlou hi. Toupa’n a theihvek ahi. Tua ahihlaiin, thiltung tengteng Toupa deih masak (perfect will) chihna hilou hi. Toupa deih masak hilou, himahleh, hong om dia a phal, permissive will, ahi uhi.
2. Pathian’diktatlouhna (unjust) ziak hilou hi.
Pathian ah diktatlouhna (unjust-favoritism) om lou hi. Sam gelhtu’n Toupa zaw ahoih in a diktat ahi, chi hi-good and just. Toupa mi a gawt ut deuh mawngmawng om hilou in, khelhna nasep kisem ding a phal ziaka Setan in a utut van a hon zang hi zaw hi. Toupa lam ah bel hiai bang ahi, Joseph in a sanggamte kiangah a gen- nou hoihlou nag eel ua, himahleh, Pathian in mi tampi a suaktaksak na din a hoihlam in a hon heisak chi hi (Gen. 50:20). Mihing ten hoihlou isak te leng Toupan i hoihna dingin hon heisak thei hi. Sawltak paul in, Pathian ah diktatlouhna a om hia? Om lou hial, na chi hi (Rom. 9:14). Tua bangin, thawmhau huai, lauhuai s amah le hang Pathian’tangtawn thiltup tangtun na dingin haksatna, sihna leh lauhthong na hong om hi zaw hi. Pathian in i hoihna dingun bangkim ah ahon sepsak hi (Rom 8:28).
3. Khelhna nasep (result) huaisiat dan taklatna ahi.
Pathianin hiai bang thil mulkim huai leh lauhuai a hongtun chiangin khelhna nasep a lauhhuai dan hon sinsakna ahi. Khovel Pathian’hamsiat sa ahi. Khelhna nna kisepna mun ahihmah in lauhuai, dipkuat huai thil tung khovel ah tam thei mahmah hi. Hiai bang thil lauhuai hongtung ten khelhna gah, kehlhna nasep, lau huai hina maizen e, Pathian in khelhna khuba a lak hun chiangin khelhna a kibual lailai te bangzah ta a gawt de aw, chih ngaihtuahna hon pia hi. Aziak tuh, Paul in, Khelhna man sihna ahi chi hi (Rom. 6:23). AIgupta Kumpi Pharoah in Mosi leh Israelte agam apan a pawt ding uh a phallouh laiin, gawtna huai se taktak 10 a gawt in om hi. A tawp in pangzou nawn lou a Mosi heu in a a paikhiak ding uh phal hi. Khelhna gah, khelhna nasep zaw lau huai lua hi, tangtawn manthatna ahihman in.
4. Jesu Khrist kia ah bukimna om hi.
Lametna hing, lametna bukim, tangtawn daih ding Jesu Khrist kia ah om hi. Amah tungtawn in tua khelhna khukpi apan Pathian kiang kizuan thei ahihman in, amah tuh bukimna ahi. Tuni a i lungkhamna te, haksatna, sihna, damlouhna, kim leh kiang a thawmhau huai thil tampi ahong om laiin, Jesu Khrist tugntawn a Pathian zuante a hampha pen te a hi uhi. Pathian in khelhna phuba a lak chiang a thuak khalou ding uh ahihman un. Tua Jesu Khrist a bukimna tan sawm in Paul in thil dangteng mahlou in sim thei hi (Phil. 3:8). Pathian’lungkimna a tapa Jesu Khrist kia ah om ahihman in, tua a tapa tawn lou peuhmah khelhna toh hing den, ni tawp ni chianga Pathian’phuba lak ding ngak ahi uhi.
Thukhitna: huaiziakin, kisik loute' tan ding tuh khovel a thomhauna leh lauhna'banah tangtawn Pathian’thangpaihna gawtmun ahi. Tuni a kisikloute tuh khelhna toh hing dente ahi uhi. Jesu Khrist tungtawn in Pathian lam i zuan ding uh. Jesu Khrist ah bukimna om hi. Amah tellou in leitung leh van ah bukimna omlou hi.
