Notes
CHRISTMAS 2011 (BORN TO DIE TO SET THE SINNERS FREE)
LUKE 2:10-11, MK. 10:45
BANGZIAKA PATHIAN TAPA KHOVEL A HONGPAI POIMOH HIAM?
Pathian hehpihna tangin i ngaklah mahmah Khristmas tung hongtung nawn ta, ikipak mahmah a hiai tan honpitu i biak Pathian kiangah kipahthu gen in thupina tengteng amah i pia hi.
Hiai bang hun poimoh takah, minbang hongpiang i hondampa Jesu Khrist leh Pa Pathian be dia hong pai khawm tengteng itna chibai ka hon buuk hi.
Tuni'n Christmas hun a dotna poimoh mahmah "Bang ziaka Pathian Tapa Leitunga hongpai poimoh ahia?" chih dawnna Bible apan enkhawm leng ichi hi. Hia dotna dawnna bel Jesu khrist "Mikhialte suahtakna dinga Si dia hongpiang ahi"(Born to Die to set the sinners free) chih ahi.
Mi pawl khat ten Pathian pen a om taktak lou pi mihingten i om zak tawm maimai ahi chi uhi. Pathian kichi koi hiam a om, va gintaka va muan ding leh a thu va man ding thil hi theilou ahi chi uhi. German Philosopher Ludwig Feurbach in "Pathian in mihignte hon bawl hilou in, eiten Pathian ding i lungsim sunguah i bawl uh ahi zaw"chi hi.
Tuabang a Pathian pen eiten i lungism sungua i bawl tawm uh hileh Christmas kichi omlou ding hi. Pathian pen eiten i bawl tawm hilou in Amah i poimoh luat ziak ua eite theihtheih dia a tapa Jesu Khrist a hong kilak hi zaw hi. Huaiziaka Christmas hongpiang ahi hi.
