Note
LIMBELH KUMTAWN SUANGPI
Sam 86: 8-10, 90:1-2
Greetings- Kum 20 tan hon pikaitu Toupa Pathian kiangah thupina leh minletna pia in kipahthu i gen hi. Hiai tan i tun theihna dia Toupa mi zat heutu masate leh tu lel a heutu a i neihte'ziakin leng Toupa min i phat hi.
Hiai hun poimohtak i zatlaiin, i thu[pi uh- LIMBELH KUMTAWN SUANGPI- chih ahi. I Souvenir by min dingin leng Kumtawn Suangpi chih i zang hi. Bang ziaka Suangpi hichi thupi bawl i hia le?
Thukhun lui ah SUANGPI tuh Bitna, Kihumbitna/Kivenbitna genna in ki zang hi (Isai 32:2, 33:16).
Pathian tuh Suangpi banga gen in om hi. 2 Sam. 22:32 ah Toupa lou kua Pathian a om a? i Pathian lou kua Suangpi a om a? chi hi.
Huai banah, Sam 118:22 ah -Inlamte'suang deihlouh pen a ninga suang phatuam pen a suak hi...chi'n hongpai ding Messia-Jesu Khrist genna in ki zang hi.
Thukhun thak ah leng Jesu khrist tuh Khalam suangpi ahi chin paul in na gen hi (1 Cor. 10:4), Paul mah in Romte ah Judate'puukna suang tuh jesu Khrist ahi chin gen hi (Rom. 9:33)
Hiai te ziakin Suangpi tuh Pathian i genna ahi chih phawk ni.
Amah Toupa Pathian tuh i limbelh Kumtawn Suangpi ahi.
Amah Tapa Pathian tuh i hotdamna suangpi ahi.
Amah Khasiangthou Pathian tuh i hatna suangpi ahi.
Tuni a, i Kumtawn suangpi Pathian kianga kipahthu gena hun i zat khawm lai un, bangziaktaka Amah kianga kipahthu gen i hiam chih saulou in genchet i sawm ding-
Sam 86:8-10
v. 10 ah- Nang na THUPI ngala, thillamdangte na hih jela; nangmah kia Pathian na hi hi chi hi.
> Toupa Pathian in thillamdangte ahihziaka Pathian THUPI hongsuak hilou in, Pathian THUPI ahihziakin thillamdangte hih hi,
> Thillamdangte ahihziaka Amah kia Pathian om sun, pathian taktak hilou in, Pathian THUPI ahihziakin Amah kia Pathian taktak hi zaw hi.
Tuni'n Toupa'n EBCC Delhi kum 20 sunga hiai zahzah a, hiai tantan a honpi kai ziak kia amah pathian hoih leh THUPI hongsuak hilou in, Amah tangtawn apan tangtawn donga Pathian hoih leh THUPI ahihziakin hiai bangtan ah honpi hi zaw hi.
Vualzawlna tampitak i tante ziaka ...Pathian naw, na hoih lua hi... chi ding ihi kei a, Amah THUPINA ziakin Toupa aw na hoihin na THUPI hi, ichi ding.
v. 9 ah -Toupa aw, na siam namchihte ahongpai ding ua, na maah a hong kun ding ua; na min a honpahtawi ding uhi, chi hi.
> atunga i gen bangin, namchihte a kainga hongpai a hong kun ding ziak ua Pathian thupi hilou in, A THUPI luat ziakin Amaah namchihte hongpai in hong kun ding uhi.
> Tuni'n, Toupa a THUPINA ziakin amaah paiin amah bia ni, taksa damna, sepna hoih, siamna, sum leh pai chihte ahon piak ziaka amah bia hilou in Amah THUPINA ziaka Amah bia amite ihih ding ahi.
v. 8 ah- Toupa aw, pathiante lakah nang bang himhim a om kei ua; na thilhihte bang thilhih himhim leng a om kei hi, chi hi.
> amah thilhih bang thilhih a omlouh ziak ua pathiante' lak Toupa bang om lou uh hilou in Toupa Thupi ahihziakin Amah bang pathiante'lakah kuamah omlou hi zaw hi.
Huaiziakin, 1 jn. 4:4 ah- naute aw, Pathian akipan na hi ua, tuate na zouta uhi; noumaua om tuh khovel a omsanga a thupi zawk ziakin.
Huai Toupa Pathian THUPI eimah a om tuh khovel a thuneihnate' sangin a thupi zaw hi. haksatna, gentheihna, zum huaina leh zahlakna tampite thuak mualsuah zou dingin eimah a om tuh a thupi in a muanhuai hi.
Jesu'n vantung leh leitunga thuneihna tengteng ka kianga piak ahi, Huaiziakin, pai unla, namchih apan nungzuite bawl un.....ngai un, khovel tawn phain na kianguah ka om jel ching...chi hi.
Tuabang dingin neu na kisa lua hia? nang tungtawn a Pathian' thupina kiphuangzak dingin chin na kisa kei lua hia?
Telescope tuh vanzat lian hetlou ahi. Himahleh, hiai zangin mi'n vantung lam a thil omte chiangtakin en in mu thei uhi. Nang hatna, hoihna leh lunglutna mawk hilou in, nang a ompa a thupi ziakin, thil thupi nang'tungtawn in Toupa'n khovel musak nuam hi.
Mat. 16:24, Mt. 8:34 ah- Jesu'n ...kuapeuh in ahon zuih nop leh, amah gimthuak khoksa lou in, a cross pua in hon zui hen...chi hi.
Tuni'n nang leh kei' Khros bang ahia?
> thupi leh hihthei kisak luatna te bang,
> amau le bang a hi tuan ua,,, chih utna lungsim bang
> zanzeka Delhi hong tungpan akei ua,,, chih utna lungsim bang..
>kei tuh mi hichi mah ka hi...chi a kibawlphat sawmlouhna hinkhua bang
> hun ak nei kei,,,chi a hun neihngeilouhna hinkhua bang
> kidaihlou hi veh aw,,,chi a piakkhiak ngamlouhna lungsim bang...
Hiai te tengteng Khros a kilh lum in Toupa zui leng' nang leh kei tungtawn in midangten Toupa THUPINA mu ding uhi.
Midangte'n nang leh kei tungtawn in Toupa' muanhuaina mu in belhtaak ahihna chian thei pan ding uhi.
Tuabang hi thei chiat dingin paikhawmte tengteng Toupa'n hon ompih in hon makaih ta hen.
