Notes
December 25, 2012
Significance of Christmas (Christmas Manphatna)
Hun paisate ah Christmas bangchi’n i zang ua? bang thilte manpha nasapen a? Puannak thak, lawmte toh kimawl, biakin kichet, khojang a ann nekhawm....
Christmas hun a dotna poimawh mahmah tuh- Bangziaka Jesu Khrist Leitung a hongpai ngai ahia? chih ahi.
Hiai dotna tuh 2011 Christmas ni’n “Born to Die” chih thupi pansan in i dawng khinta uhi.
Tukum in hiai a nuai a dotna nihte i ki dong ding uh.
- Bangin Christmas omsak ahia?
- Christmas in bang omsak ahi?
Khatna tuh December 23 ni’n a dawnna i genta ua, huai tuh “Pathian’ itna ahi” ichi uhi. Pathian itna Pathian ahi a, huai a itna in Christmas piangsak ahi, i chi uhi.
Tuni’n dotna nihna dawng le’ng- huai tuh Christmas Manphatna bang hi hiam, chih ahi.
1. Tangtawn hinna (eternal life) hon pia.
Christma som kei leh tangtawn hinna ki nei thei ngeilou ding hi. Christmas tungtawn in tangtawn hinna eite’ adingin bawlsak in i om uhi.
Johan 3:16 ah- Pathian in khawvel a it mahmah a, huchiin a tapa tang neihsun a pia hi. Huchi a, kuapeuh amah gingta tuh a manthat louh a, khantawn a hinna a neih theihna ding in.
2. Sih ding lauhna apan suahtakna (freedom) hon pia hi.
Launa (fear) sila hihna apan suahtakna hon pia hi.
Heb. 2:14,15- Heb. 2:14, 15-Huchiin, naupangte tuh sa leh sisan tangte ahihchiat ziak un, Amah ngeiin huai bangmah a tang samta; A sihna a sihna thuneipa (huai tuh Diabol) ahihmang theihna ding leh, Sih kihtak ziaka damsunga sila a om tengtengte tuh a suahtaaksak theihna dingin.
Lauh ding ki hau mahmah hi; khanvual phaklouh ding, mi’n siamlou hon sak ding, mi’n neilou hon sak ding, mi’n hihtheilou hon sak ding, leh sih ding bang ki lau hi. Hiai te ziakin launa sila (slavery by fear) in ki om vek hi. Himahleh, Christmas tungtawn in, Jesu Khrist khawvel a hongpaina tungtawn in, huai launa apan suahtaksak in i om uhi.
3. Leitung a lemna lengsak (Peace)
Christmas tungtawn in Leitung ah lemna hong om thei hi. Mihing leh Pathian kilem theihna, ei-le-ei kilem theihna, midangte toh kilem theihna, inkuan kilem theihna Christmas tungtawn in hongtung hi.
Luke 2:14Tungnungpen ah Pathian thupi henla, leitunga a kipahpih mahmah mihingte lakah lemthu leng hen, a chi uhi.
Tuni’n Christmas in a hon piak hiai a tungate i hamphatpihta hiam chih kivel ni. Tangtawn hinna ka nei hia? launa apan suahtaksakin ka om hia? chihleh, lemna leh muanna keimah hinkhua a om hiam? Chihte.
Hiai bang hamphatna Christmas tungtawn a hong omte phattuampih chiat dingin saptuamte Toupa’n hon kem chiat hen aw.
