Notes
A New Year Day Message from Pastor V Nenglian at EBCC Delhi.
TIPS FOR YEAR 2013
1. Never Compromise with Sin (Khelhna tawh thukhun bawl louh ding)
Deut 7:1-3 sungah Pathian in Israel mite kiangah thupiak khauhtak mai pia hi. Huai thupiak tuh Kanan a luah hun chiang ua midang/namdang tawh thukhun bawllouh ding ahi. Kuamah hing hawi kei un, na tanute uh amau tapa te a dingin pe kei unla, na tapa te uh adingin a tanute uh la kei un, chi hi. Khelhna peuhmah nutsiat ding, taihsan ding ahi, kilawm bawl pih hetlouh ding ahi.
Rom. 12:2 ah- hiai khovel dan bangin om kei unla,.. achi hi. Khovel dan (norms) banga om lou a Pathian deihdan a om zaw dinga thupiak in i om uhi. Khovel in hoih sa mahleh, khovel in kilawm sa mahleh, Pathian dan tawh a kituah kei peuhmah leh deihlouh pumlum ding ahi.
2. Be Strong and Courageous (Hatak leh hangtakin om in)
Joshua 1:8-9 ah Pathian in Joshua kiangah hattak leh hangtaka om ding thupia hi. Eimah hatna a kinga hilou a Amah hon neitupa Pathian ziak a ki hatsak ding chihna ahi. Ahihkeileh, Toupa ah kihihhat ding chihna ahi. Lau lou a lunglel lou a om ding chihna ahi. Tu kumthak sungin na lunglelh na ding, na lungkiat na ding thil hong om kha thei hi. Toupa lam en inla'n AMah ah kihihhat in. Toupa'n huai haksatna akipan hon pi kai tou ding hi.
3. Stand Still (Ding dinden in)
Exo. 14:13 ah Pathian thu Mosi kiang hongtung a Mosi in mipite kiangah, ding dinden a Pathian hotdamna ngak ding in thupia hi. Haksatna genvuallouh i tung hong tun hun chiangin, theihsiam zawh louh ding ngenta tampi hong pai hun chiangin, a lampi ding i theih zawh louh hun chiangin, Pathian hunchiam, a hotdamna, ngaka din dinden ding ahi. Amah ngakzou te'n thupha ngah ding hi. Toupa Jesu adin Lazar misi kaihthoh ding tuh zekai lua omlou hi. Amah hun ah Pathian in naa hong sem mahmah ding hi. Amah ngak ni.
Kum 2013 in kituahna, kilemna, masawnna, khantouhna, kipahna leh lungmuanna Toupa Pathian akipan hong puak ta hen aw, Amen.
