Notes
Thou Ni in, Lam Ni
MAILAM NAWT A PAI (Moving Forward)
Saptuam khangtou lou, gingtu masawn lou, khut zaw leh khuk zawi bang mai a nem, angum hilou a nawitui piak ngailai, heutu hi theita ding hinapi Pathian' thubulte hilh kiphamawh lai, hiai bang saptuam leh gingtute kiangah hantawhna leh thupiak khauhtak mai piak in om hi.
12:1- Meipi thupi umsuak a i om thei in, honhihnok peuhmah leh khelhna eimah a belhte koih mang ni... chiin.
Ginna a masuan ding, mailam nawt ding, khut zaw te khauhsak ding, ginna a kalsuan ding a thupiak ahi.
Bang tungtawn a mailam nawt a pai ding i hiam?
- 1. Theihpihtu Meipi nei ihi (a cloud of witnesses)
Gingtu masate- Enoch, Abel, Noa, Abraham, Sara, Mosi te'n ginna ana lenkip paisuakta uhi. Khovel thilte sangin Pathian' thilte ana telzaw uh a, thupina gam ah hon lutsanta uhi.
Tuni'n amaute tuh theihpihtu Meipi thupi ahita uhi.
> Amaute'n van akipan hon enzui uhi- amaute hon chiantute ahi uh.
> Amaute'n ginna lampi tawn a paisuak theih taktak mah ahi chih a hinkhua uh tungtawn in hon sinsak uhi- etton ding hon pia uhi. Khovel ah Pathian theihdan bang a hin ding ahi theilou a bat laiin, hi thei taktak mah ahi chih hiai theihpihtute'n hon hilh khinta uhi. - 2. Thuchiam in hon ngak hi.
Theihpihtu, ginna a na lenkip paisuakta te'n leng Pahtian thuchiam teng ana tang khin vek nai zenzen lou uhi. 11:39-40 ah Pathian in eite a ding ahoih thei in thuchiam tuh amaute ana pe kei hi, chi hi. Ginna lenkip paisuakta ten leng eite' tunma thuchiam bukim ana tang tuanlou ding uhi. Tan kibang tang ding ihi. Huaiziakin, ginna a mailam nawt a pai ding a thupiak ihi. - 3. Jesu lam en in.
Eimah deihdan leh muhdan a mailam nawt ding, khovel kilawmna dan bang jel a mailam nawt ding hilou in, Jesu en in mailam i nawt ding uh. Amah tuh i ginna siampa (author) leh hihkippa (Perfecter) ahi. Amah tellou in Pathian deihdan kuamah in theithei lou ding hi.
Tuni'n 2013 sung ginna a mailam nawt a i paina ding ah bangzah nutsiat ding, koihmang ding, honhihnok na nei hiam? Ginna lenkip paisauk dingin Toupa'n nang leh kei hon sam lailai hi. Khut zaw te khauhsak ni, kihihhat ni, Toupa lam en ni, khelhna kia hilou in honhihnok thei peuhmah eimah akipan koih mang ni. Toupa'n thupha hon pe chiat hen.
